Salmo 111 - Marahay na Bareta Biblia

Pag-omaw sa Kagurangnan

¹ Omawon an Kagurangnan! Bilog na puso kong papasalamatan an Kagurangnan sa katiriponan nin mga matanos.

² Makangangalas an mga gibo nin Kagurangnan, pinag-aadalan kan gabos na nawiwili kaiyan.

³ An saiyang gibo, pano nin onra asin kamahalan, asin an saiyang katanosan magdadanay sagkod pa man.

⁴ Ipinapagiromdom niya an makangangalas niyang mga gibo; maugayon an Kagurangnan asin maheherakon.

⁵ An mga natatakot saiya tinatawan niya nin pagkakan; dai niya nalilingawan an saiyang tipan.

⁶ Ipinapahiling niya an saiyang kapangyarihan sa saiyang banwaan, huli sa pagtao sainda kan daga kan mga dayuhan.

⁷ Maimbod asin matanos siya sa gabos niyang gibo; an gabos niyang pagboot masasarigan,

⁸ pagboot na magdadanay sagkod pa man, ginibo sa kaimbodan asin sa katanosan.

⁹ Pinatalingkas niya an saiyang banwaan, dangan naggibo sainda nin tipan na dai nin kasagkoran. Banal asin ginagalangan an saiyang ngaran!

¹⁰ An pagkatakot sa Kagurangnan iyo an kapinonan nin kadonongan; igwa nin marahay na pakasabot an mga naggigibo kaiyan. An saiyang kaomawan magdadanay sagkod pa man!