Salmo 110 - Marahay na Bareta Biblia

An Kagurangnan asin an Pinili niyang Hade

¹ An Kagurangnan nagtaram sa sakong kagurangnan, “Tumukaw ka sa too ko, sagkod na an mga kaiwal mo gibohon kong tungtongan kan mga bitis mo.”

² Ipapadara nin Kagurangnan hale sa Sion an setro nin saimong kapangyarihan. Maghade ka sa tahaw kan saimong mga kaiwal!

³ Sa aldaw na labanan mo an saimong mga kaiwal, sa marahay na boot iibahan ka kan saimong banwaan. Siring sa ambon nin kaagahon, an mga hoben na lalaki madatong saimo diyan sa banal na kabubuldan.

⁴ An Kagurangnan nagsumpa asin dai niya ini babawion: “Ika padi sagkod pa man sosog sa orden ni Melkizedek.”

⁵ Yaon sa too mo an Kagurangnan; an mga hade dadaogon niya, kun siya maanggot.

⁶ Huhukoman niya an mga nasyon asin an daga papanoon niya nin mga bangkay; dadaogon niya an mga hade sa bilog na kinaban.

⁷ Mainom siya sa burabod na yaon sa tampi kan dalan, dangan makakamtan niya an kapangganahan.