Salmo 109 - Marahay na Bareta Biblia

Inagrangay nin Sarong Tawo na nasa Kasakitan

¹ Inoomaw taka, O Dios, hare pag-alo!

² Huli ta nagtataram tumang sako an mga tawong putikon asin maraot; pinagpapakaraot ninda ako.

³ Mga tataramon nin kaanggotan sinasabi ninda sako; asin maski mayo nin dahelan sinasalakay ninda ako.

⁴ Bilang balos sa sakong pagkamoot, sinasalungat ninda ako; mantang sinda ipinapamibi ko.

⁵ Binabalosan ninda ako nin karatan para sa karahayan; nin pagkaanggot para sa pagkamoot.

⁶ Magpili ka nin sarong maraot na hukom na mahatol sa sakong kaiwal; sarong kaiwal niya na masumbong tumang saiya.

⁷ Kun siya bistahon, mapadusahan logod siya; an saiyang pamibi ibilang logod na kasalan!

⁸ Dai logod maglawig an saiyang buhay; asin iba logod an magkapot kan saiyang katongdan!

⁹ Magin ilo logod an saiyang mga aki; magin balo logod an saiyang agom!

¹⁰ Magin lagalag asin makilimos logod an mga aki niya; pahaleon logod sinda sa gaba na nindang erokan!

¹¹ An gabos niyang rogaring kuahon logod kan saiyang mga inutangan. Samsamon logod kan mga dayuhan an mga bunga kan saiyang kapagalan.

¹² Mayo logod nin maherak saiya; ni maherak sa mga ilong aki niya.

¹³ Magadan logod an saiyang kapagarakian; sa sunod na henerasyon malingawan logod an saiyang ngaran.

¹⁴ Giromdomon logod nin Kagurangnan an karatan kan saiyang mga ginikanan; an kasalan kan saiyang ina dai logod mapatawad.

¹⁵ An saindang kasalan danay logod na magiromdoman nin Kagurangnan; alagad malingawan logod sinda sagkod pa man!

¹⁶ Huli ta dai siya nagpahiling nin pagkaherak. Pinatios niya an dukha asin an mga daing sukat; asin ginadan niya an makaherak-herak.

¹⁷ Nawili siyang magmaldisyon; maldisyonon logod siya! Habo siya nin bendisyon; magharayo logod ini saiya!

¹⁸ An pagmaldisyon niya garo sanang bado na isinusulot; makataros logod iyan sa hawak niya siring kan tubig, asin sa saiyang mga tulang siring kan lana!

¹⁹ Makaarog logod iyan sa gubing na sulot niya; makaarog sa hagkos na danay na ginagamit niya!

²⁰ Kagurangnan, arog logod kaiyan an saimong padusa sa mga kaiwal ko; sa mga nagtataram nin maraot tumang sako!

²¹ Alagad tabangan mo ako, Kagurangnan kong Dios, huli kan saimong ngaran; huli sa karahayan kan danay mong pagkamoot, ako ligtasan.

²² Ako dukha asin mayong sukat; nakukulogan nin makuri an puso ko.

²³ Siring kan anino sa banggi, ako napapara; siring kan doron, ako ipinapadpad.

²⁴ Nanluluya an tuhod ko huli sa pag-ayuno; nagniwang nin marahay an hawak ko.

²⁵ Ako nagigin ngingisihan kan mga nagsumbong tumang sako; nagtatango-tango kun nahihiling ninda ako.

²⁶ Kagurangnan kong Dios, tabangi ako! Huli kan danay mong pagkamoot ligtasan ako.

²⁷ Kagurangnan, pasaboton mo an mga kaiwal ko na ika an nagligtas sako.

²⁸ Maldisyonon man ninda ako, alagad ako bebendisyonan mo. Mapasopog logod an mga nang-aapi sako; asin mag-ogma logod an sorogoon mo.

²⁹ Mapano logod nin disonra an sakong mga kaiwal; mapatos sinda nin sopog na garo tamong.

³⁰ Sa makosog na tingog magpapasalamat ako sa Kagurangnan; oomawon ko siya sa tahaw kan katiriponan.

³¹ Huli ta an daing sukat sinusurog niya, asin iliniligtas sa mga nagkokondenar na siya magadan.