Salmo 105 - Marahay na Bareta Biblia

An Dios asin an Saiyang Banwaan

¹ Magpasalamat kamo sa Kagurangnan, mag-apod sa saiyang ngaran; irukyaw nindo an saiyang mga gibo sa mga banwaan.

² Awiton nindo an awit nin pag-omaw sa saiya; ibareta an gabos na ngangalasan na ginibo niya.

³ Magmuraway kita sa banal niyang ngaran; mag-ogma an mga pusong naghahanap sa Kagurangnan.

⁴ Hanapa nindo an Kagurangnan asin an saiyang tabang; danay na sambahon nindo siya.

^5-6 Kamong kapagarakian ni Abraham na sorogoon nin Dios; kamong kapagarakian ni Jacob na saiyang pinili; giromdomon nindo an mga ginibo niyang ngangalasan, an mga milagro, asin an mga itinaram niyang mga sentensya.

⁷ Siya an Kagurangnan na satuyang Dios; an mga pagboot niya para sa bilog na kinaban.

⁸ An saiyang tipan ginigiromdom niya sagkod pa man, an saiyang panuga para sa rinibong henerasyon;

⁹ tipan na ginibo niya ki Abraham, panuga na isinumpa niya ki Isaac,

¹⁰ na pinatotoohan niya ki Jacob bilang sarong togon, asin ki Israel bilang daing kataposan na tipan.

¹¹ Nagtaram siya, “Itatao ko saimo an daga nin Canaan, bilang sadiri mong kahirasan.”

¹² An banwaan nin Dios dikit pa sana kaidto sa bilang, sinda mga dayuhan sa daga nin Canaan.

¹³ Nakaabot sinda sa manlaen-laen na nasyon asin sa manlaen-laen na kahadean.

¹⁴ Alagad dai nagtugot an Dios na igwang mag-api sainda; an mga hade saiyang pinatanidan huli sainda.

¹⁵ Nagtaram siya, “Dai nindo pagdutaan an sakong mga linahidan; an sakong mga propeta dai nindo pagkulogan.”

¹⁶ Sa Canaan, gutom an ipinadara nin Kagurangnan; hinale niya an gabos nindang pagkakan.

¹⁷ Alagad sarong lalaki an pinaenot niya sainda, si Jose na ipinabakal bilang oripon.

¹⁸ An saiyang mga bitis kinadenahan, an saiyang liog binugtakan nin kwelyong lansang,

¹⁹ sagkod na naotob an saiyang sinabi, na pinatotoohan kan tataramon nin Kagurangnan.

²⁰ Nagboot an hade asin siya pinaluwas; pinatalingkas siya kan hade nin mga nasyon.

²¹ Ginibo siyang kagurangnan nin saiyang harong asin parapamahala kan gabos niyang rogaring;

²² igwa siya nin kapangyarihan sa mga opisyal kan hade asin deretso na magtukdo sa saiyang mga parahatol.

²³ Dangan nagpasiring si Jacob sa Egipto asin nag-erok duman.

²⁴ Pinadakul nin Kagurangnan an saiyang banwaan, asin orog na pinakosog ki sa saindang mga kaiwal.

²⁵ Pinangagin niyang kaongisan kan mga Egipcio an saiyang banwaan, asin dayaon an saiyang mga sorogoon.

²⁶ Dangan sinugo niya si Moises na saiyang sorogoon, asin si Aaron na saiyang pinili.

²⁷ Mga ngangalasan nin Dios asin mga milagro ipinahiling ninda sa daga nin Egipto.

²⁸ Ipinadara nin Dios sa daga an diklom alagad dai ninda tinubod an saiyang tataramon.

²⁹ Pinangagin niyang dugo an mga katubigan asin ginadan an mga sira duman.

³⁰ Napano nin talapang an daga kan mga Egipcio, sagkod an mga kwarto kan saindang hade.

³¹ Nagboot an Dios, asin nag-abot an mga langaw; mga noknok nakapano sa bilog na daga.

³² Embes na uran, yelo asin kikilat an ipinadara niya sa saindang daga.

³³ Rinaot niya an saindang mga ubasan saka mga kahoy na higera; gabos na kahoy saiyang rinonot.

³⁴ Nagboot siya, asin an mga doron duminatong, mga doron na dai mabilang sa kadakulan.

³⁵ Rinaot kan mga doron an gabos na tinanom asin kinakan an mga bunga kan saindang daga.

³⁶ Ginadan niya an matuang aking lalaki kan gabos na pamilya sa Egipto.

³⁷ Dangan ilinuwas niya an mga Israelita; dara ninda plata asin bulawan, gabos sinda mababaskog asin makokosog.

³⁸ Nag-orogma an mga Egipcio kan sinda naghale huli ta inabotan sinda gabos nin takot.

³⁹ Nagbugtak siya nin sarong panganoron bilang pantahob, asin kalayo nganing magtao nin liwanag kun banggi.

⁴⁰ Naghagad sinda, asin an Dios nagpadara nin mga pugo; tinawan niya sinda nin dakul na tinapay hale sa langit.

⁴¹ Binuksan niya an sarong gapo, asin nagbulos an tubig, garo salog na nagbulos sa desyerto.

⁴² Huli ta nagiromdoman niya an banal niyang panuga ki Abraham na saiyang sorogoon.

⁴³ Kaya ilinuwas niya an saiyang piniling banwaan, nag-awit sinda asin nagkurahaw sa kaogmahan.

⁴⁴ Itinao niya sainda an daga nin ibang nasyon; asin kinua ninda an bunga kan pinagalan nin ibang mga tawo.

⁴⁵ Tanganing otobon ninda an saiyang kabotan asin kuyogon an saiyang mga katogonan. Omawon an Kagurangnan!