Salmo 104 - Marahay na Bareta Biblia

Awit nin Pag-omaw sa Kaglalang

¹ Kalag ko, mag-omaw ka sa Kagurangnan! O Kagurangnan na sakong Dios, ika tunay na dakula! Nagugubingan ka nin kamurawayan asin kamahalan;

² natatahoban ka nin kaliwanagan. An kalangitan biniklad mo arog sa sarong tolda.

³ Itinugdok mo an saimong harong sa ibabaw kan katubigan sa itaas. Ginamit mo an mga panganoron bilang karwahe, asin naglulunad ka sa mga pakpak kan doros.

⁴ Ginagamit mo an mga doros bilang saimong mga sugo; an nagsisilyab na kikilat bilang saimong mga sorogoon.

⁵ An daga masarig na pinatindog mo sa saiyang pundasyon, tanganing dai nanggad matanyog.

⁶ Tinahoban mo ini kan dagat siring sa gubing; an mga tubig nakalabaw sa kabukidan.

⁷ Sa pagsagwe mo an mga tubig duminurulag; nagharale pakadangog kan saimong daguldol.

⁸ Buminulos sinda sa mga bukid asin sa mga kapantayan, pasiring sa lugar na itinalaan mo para sainda.

⁹ Nagbugtak ka nin kasagkoran na dai nanggad ninda pwedeng lampasan, nganing an daga dai na ninda giraray malantopan.

¹⁰ An mga burabod pinabulos mo sa mga kapantayan; asin an mga salog, sa pagultanan kan kabubuldan.

¹¹ Tinatawan ninda nin inomon an gabos na hayop sa oma; an mga lalaw na asno sa saindang pagkapaha.

¹² Sa mga kahoy na harani sainda, naggigibo nin salagan an mga gamgam asin nag-aawit sa kaogmahan.

¹³ Hale sa langit binabaribi mo an mga bulod; napapano an daga kan saimong mga balaog.

¹⁴ An doot pinapatalubo mo para sa mga baka, an tinanom para sa mga kaipuhan nin tawo, nganing magkaigwa siya nin kakanon hale sa daga,

¹⁵ asin arak para sa kaogmahan nin saiyang puso, lana sa pagpakintab kan saiyang lalawogon, asin tinapay sa pagpakosog saiya.

¹⁶ Dakul na uran minabaribi sa mga kahoy nin Kagurangnan; sa mga sedro na saiyang itinanom sa Lebanon.

¹⁷ Duman minagibo nin salagan an mga gamgam; sa kahoy na aguho igwa nin harong an kalaw.

¹⁸ An haralangkaw na bukid para sa mga lalaw na kanding; an kagapoan sarong pailihan para sa mga kuneho.

¹⁹ An bulan ginibo mong tanda para sa mga panahon; aram kan aldaw an oras nin saiyang pagsolnop.

²⁰ Ginibo mo an banggi, asin sa kadikloman minaluwas an gabos na hayop sa kadlagan.

²¹ Nag-uurungal an mga ogbon na leon mantang naghahanap kan kakanon na hale sa Dios.

²² Pagsirang kan aldaw sinda minabalik asin minapahingalo sa saindang mga lungib.

²³ An tawo minaluwas sa pagtrabaho asin minatrabaho siya sagkod magbanggi.

²⁴ Kagurangnan, kadakul an saimong mga gibo! Sa kadonongan, iyan gabos ginibo mo! An daga pano kan saimong mga linalang.

²⁵ Yaon an dagat, dakula asin mahiwas, pano nin dai mabilang na linalang, nin mga bagay na buhay, sadit asin dakula.

²⁶ Sa ibabaw kan dagat naglalayag an mga sakayan, mantang sa irarom nagkakawat an Leviatan na saimong linalang.

²⁷ Sinda gabos minasarig saimo, na tawan mo nin kakanon sa tamang panahon.

²⁸ Kun tinatawan mo sinda, ini saindang inaako; kun binubuksan mo an saimong palad, napapano sinda nin mga marahay na bagay.

²⁹ Kun minatalikod ka, nahahandal sinda; kun hinahale mo an saindang hinangos, nagagadan sinda asin minabalik sa alpog na saindang ginikanan.

³⁰ Alagad kun isinusubol mo an saimong Espiritu, sinda nagkakaburuhay; binabago mo an lalawogon nin kinaban.

³¹ Magdanay logod sagkod lamang an kamurawayan nin Kagurangnan! An saiyang mga gibo ipag-ogma logod nin Kagurangnan!

³² Hinihiling niya an daga, asin ini tinatakigan; dinudutaan niya an mga bukid, asin ini minaaso.

³³ Aawitan ko an Kagurangnan sa bilog kong buhay; oomawon ko an sakong Dios mantang ako buhay.

³⁴ Mawilihan niya logod an sakong awit, huli ta yaon saiya an sakong kaogmahan.

³⁵ Mapara logod sa daga an mga parakasala; magadan logod an mga maraot. Kalag ko, mag-omaw ka sa Kagurangnan! Omawa an Kagurangnan!