Salmo 102 - Marahay na Bareta Biblia

Pamibi nin Sarong Tawong Nasasakitan

¹ Dangoga an sakong pamibi, Kagurangnan; an sakong inagrangay makaabot logod saimo!

² Hare pagtagoa sako an saimong lalawogon, sa mga aldaw nin sakong kasakitan! Himatea ako; simbaga tolos sa aldaw na ako mag-apod.

³ Huli ta an sakong buhay napapara siring sa aso; naglalaad an hawak ko siring sa kalayo.

⁴ Siring sa doot, naroronot an puso ko asin naaalang; nawawaraan ako nin gana na magkakan.

⁵ Huli kan makosog kong inagrangay maniwang na akong marahay.

⁶ Arog ako sa bwitre na yaon sa desyerto, arog sa kuwaw sa mga binayaan na lugar.

⁷ Dai ako nagkakatorog; kabaing ako sa mamondong gamgam na nasa atop.

⁸ Bilog na aldaw pinagtutuya-tuya ako kan mga kaiwal; ginagamit kan mga nagngingisi sako an sakuyang ngaran sa pagmaldisyon.

⁹ Abo an tinapay na kinakakan ko; igwang kasalak na mga luha an inomon ko;

¹⁰ huli kan saimong kabaldian asin kaanggotan, ako saimong pinoporot dangan itinatapok.

¹¹ An mga aldaw ko arog kan anino sa banggi; siring sa doot naaalang ako.

¹² Alagad ika, Kagurangnan, naghahade sagkod lamang; an ngaran mo magdadanay sa gabos na henerasyon.

¹³ Mabangon ka asin maheherak sa Sion, huli ta panahon ini nin pagkaherak saiya; an talaan na panahon uminabot na.

¹⁴ Padangat siya kan saimong mga sorogoon, maski ngani siya naraot; naheherak sinda saiya, maski ngani siya naronot.

¹⁵ An mga nasyon matatakot sa ngaran nin Kagurangnan; an mga hade sa daga matatakot sa saiyang kamurawayan.

¹⁶ Kun an Sion pakarahayon na nin Kagurangnan, ipapahiling niya an saiyang kadakulaan.

¹⁷ Dadangogon niya an pamibi kan mga dukha; dai niya ikakaanggot an saindang pakimaherak.

¹⁸ Isurat logod ini para sa maabot na henerasyon, tanganing an Kagurangnan omawon kan mga dai pa namundag.

¹⁹ Duminungaw an Kagurangnan hale sa banal na lugar sa itaas; hale sa langit duminungaw siya sa daga,

²⁰ tanganing dangogon an inagrangay kan mga bilanggo, asin patalingkason an mga nakondenar na magadan.

²¹ Dangan irurukyaw sa Sion an ngaran nin Kagurangnan, asin sa Jerusalem an saiyang kaomawan,

²² kun magtiripon an mga banwaan asin kahadean sa pagsamba sa Kagurangnan.

²³ Pinangagin niya akong maluya sa kaodtohan nin sakong buhay; pinangagin niyang halipot an sakuyang mga aldaw.

²⁴ Olay ko, “O Dios, hare ako pagkuaha ngunyan, bago ako gumurang, ika na nabubuhay sagkod pa man sa gabos na kapagarakian.”

²⁵ Kaidto saimong linalang an daga; asin an kalangitan hinaman kan saimong kamot.

²⁶ Matutunaw ini gabos, alagad ika magdadanay; magigin daan sinda siring sa gubing. Riribayan mo sinda arog kan pagsangle mo nin gubing, asin sinda mapapara.

²⁷ Alagad ika mayong pagbabago, mayo nin kataposan an saimong buhay.

²⁸ An samuyang mga aki mabubuhay na ligtas; sa saimong atubang mayong kahandalan an saindang kapagarakian.