Salmo 1 - Marahay na Bareta Biblia

AN ENOT NA LIBRO (Mga Salmo 1–41 ) An Totoong Kaogmahan

¹ Paladan an tawo na dai nagsusunod sa hatol nin mga maraot, na dai nagsusunod sa paarog nin mga parakasala o dai nakikisumaro sa mga dai nagpapahalaga sa Dios.

² Alagad an saiyang kaogmahan nasa Katogonan nin Kagurangnan; ini aldaw-banggi niyang pinag-aadalan.

³ Siya siring sa sarong kahoy na nagtatalubo sa kataed nin tubig na nagbubulos, na minabunga sa tamang panahon, asin dai naaalang an mga dahon. Minauswag siya sa gabos niyang gibo.

⁴ Alagad bakong siring kaini an mga maraot; siring sinda sa ata na pinapalid kan doros.

⁵ Kaya an mga maraot dai makakatindog sa paghukom, ni an mga parakasala sa katiriponan kan mga matanos;

⁶ huli ta aram nin Kagurangnan an dalan kan mga matanos, alagad an dalan kan mga maraot mapapahamak.