Ruth 4 - Marahay na Bareta Biblia

Inagom ni Boaz si Ruth

¹ Nagduman si Boaz sa may trangkahan kan banwa, sa lugar na pinagtitiriponan kan mga tawo, asin nagtukaw duman. Dai nahaloy, nag-agi an sinabi niyang pinakaharaning kadugo ni Elimelek. Inapod siya ni Boaz, “Katood, madya asin tukaw ngona digdi.” Kaya nagrani an inapod asin nagtukaw.

² Dangan nag-apod si Boaz nin sampolong lider kan banwa asin inalok man na magtukaw duman. Kan nakaturukaw na sinda,

³ nagsabi siya sa saiyang kadugo, “Ngunyan na nagbalik na si Naomi hale sa Moab, boot niyang ipabakal an oma na sadiri kan satong kadugong si Elimelek,

⁴ asin pinagmarahay ko na ipaisi saimo iyan. Ngunyan, kun boot mong bakalon iyan, bakalon mo sa atubangan kan mga tawong nagtuturukaw digdi. Alagad kun habo mo, magsabi ka sana, huli ta ika an enot na may deretso sa pagbakal kan daga, asin ako an ikaduwa.” “Babakalon ko,” an simbag kan lalaki.

⁵ Nagsimbag si Boaz, “Sa aldaw na bakalon mo ki Naomi an oma, binabakal mo man si Ruth, an Moabitang balo, tanganing an oma danay na masadirihan kan pamilya kan nagadan.”

⁶ Nagsimbag an lalaki, “Kun siring, dai ko gagamiton an sakuyang deretso sa pagbakal kan oma, huli ta nangangahulogan iyan na dai man mamamana kan sakong mga aki an daga. Ika na an magbakal.”

⁷ Sarong kaugalean kaidtong panahon sa Israel na tanganing mahaman an sarong pagpabakal o pagbalyo nin pagsadiri, hinuhubad kan nagpabakal an saro niyang sandalyas asin itinatao sa mabakal. Sa paaging ini, ipinapahiling kan mga Israelita na nagkaoroyon na sinda.

⁸ Kaya kan magsabi an lalaki ki Boaz na “Ika na an magbakal,” hinale niya an saro niyang sandalyas asin itinao ki Boaz.

⁹ Dangan nagsabi si Boaz sa mga lider sagkod sa gabos na yaon duman, “Mga saksi kamo ngunyan na binakal ko ki Naomi an gabos na pagsadiri ni Elimelek, asin kan mga aki niya na si Chilion saka si Malon.

¹⁰ Siring man, magigin agom ko si Ruth, an Moabitang balo ni Malon tanganing an pagrogaring danay na masadirihan kan pamilya kan nagadan, asin dai mapara an saiyang ngaran sa linya kan saiyang mga tugang sagkod sa saiyang banwaan. Mga saksi kamo ngunyan.”

¹¹ Nagsabi an mga lider asin an gabos na yaon duman, “Mga saksi kami. Gibohon logod nin Kagurangnan na an saimong agom magin arog ki Rachel saka ki Lea, na nagtao nin dakul na aki ki Jacob. Yumaman ka logod sa kamaganakan ni Efrat asin magin bantog sa Betlehem.

¹² Makaarog logod an saimong pamilya sa pamilya ni Perez, na aki ni Juda asin ni Tamar, huli sa mga aki na itatao saimo nin Kagurangnan digdi sa hoben na babaeng ini.”

Si Boaz asin an saiyang Kapagarakian

¹³ Kaya dinara ni Boaz sa saiyang harong si Ruth bilang agom. Benendisyonan nin Kagurangnan si Ruth. Nagbados siya asin nangaki nin sarong lalaki.

¹⁴ Nagsarabi ki Naomi an kababaehan, “Pag-omawon an Kagurangnan! Ngunyan na aldaw, tinawan ka niya nin sarong makoapo; magin bantog logod an ngaran niya sa Israel!

¹⁵ Namomotan ka kan saimong manugang asin orog pa siya ki sa pitong aking lalaki; tinawan ka niya nin sarong makoapo. Ini an magtatao saimo nin bagong kosog asin mag-aataman saimo sa saimong paggurang.”

¹⁶ Kinua ni Naomi an aki, kinugos nin marahay, asin inataman.

¹⁷ Nagsarabi an mga babaeng kanatad, “Sarong aking lalaki an namundag ki Naomi!” An aki nginaranan nindang Obed. Si Obed an nagin ama ni Jesse na ama ni David.

^18-22 Ini an kapagarakian magpoon ki Perez sagkod ki David: Perez, Hezron, Ram, Amminadab, Nason, Salmon, Boaz, Obed, Jesse, David.