Ruth 3 - Marahay na Bareta Biblia

Nakakua nin Agom si Ruth

¹ Pakalihis nin nagkapirang aldaw, nagsabi si Naomi ki Ruth, “Kaipuhan ihanap taka nin magigin agom tanganing magkaigwa ka nin sadiring pamilya.

² Giromdoma na satong kadugo si Boaz; katrabaho mo an mga babaeng paraani niya. Kaya dangoga ako. Ngunyan na banggi papahimalidan niya an sebada,

³ kaya mangarigos ka, magbugtak nin pahamot asin magsangle kan pinakamagayon mong gubing. Dangan magduman ka sa saiyang ginikan, alagad dai ka magpahiling saiya sagkod na dai siya nakatapos na magkakan saka mag-inom.

⁴ Tandaan mo kun saen siya makatorog, asin kun torog na siya, rumani ka, haleon mo an tahob kan saiyang bitis asin humigda ka sa saiyang pamitisan. Sasabihan ka niya kun ano an gigibohon mo.”

⁵ Nagsimbag si Ruth, “Gigibohon ko an gabos na sinabi mo.”

⁶ Kaya nagduman si Ruth sa ginikan asin ginibo an mga sinabi kan saiyang panugangan na babae.

⁷ Pakatapos na magkakan asin mag-inom ni Boaz, maogma siyang nagduman sa tambak kan sebada dangan duman nagkatorog. Luway-luway na nagdolok saiya si Ruth, hinale an tahob kan saiyang bitis, asin naghigda sa pamitisan niya.

⁸ Kan matanga na an banggi, nagimata si Boaz. Nakubhanan siya kan mahiling na may babaeng nakahigda sa pamitisan niya.

⁹ “Siisay ka?” an hapot ni Boaz. “Ako si Ruth,” an simbag niya. “Huli ta harani ka pang kadugo, katongdan mo an pag-ataman sako.”

¹⁰ “Bendisyonan ka logod nin Kagurangnan,” an sabi ni Boaz. “Orog na kaimbodan sa pamilya an ipinahiling mo ngunyan ki sa ginibo mo sa saimong panugangan na babae. Pwede ka kutang maghanap nin hoben pang lalaki, mayaman man o dukha, alagad dai mo ginibo iyan.

¹¹ Dai ka maghadit, Ruth. Gigibohon ko an gabos mong hinahagad huli ta aram kan gabos kong kahimanwa na marahay kang babae.

¹² Totoo na ako harani pang kadugo asin may katongdan ako saimo, alagad may saro pang mas haraning kadugo ki sa sako.

¹³ Digdi ka sana ngunyan na banggi asin sa aga, aaramon ta kun aakoon niya o dai an katongdan niya saimo. Kun gibohon niya, marahay; kun dai, minasumpa ako sa buhay na Dios na aakoon ko an katongdan. Magkatorog ka na digdi sagkod na mag-aga.”

¹⁴ Kaya nagkatorog si Ruth sa pamitisan ni Boaz, alagad nagbangon siya bago magliwanag huli ta habo ni Boaz na may makaaram na nagduman siya sa ginikan.

¹⁵ Sinabihan siya ni Boaz, “Hukasa an saimong alikboy asin ibiklad mo digdi.” Ibiniklad ni Ruth an alikboy saka tinakadan ini ni Boaz nin beynte kilos na sebada asin ibinugtak sa abaga ni Ruth. Dangan nagpuli siya sa banwa na dara an sebada.

¹⁶ Pag-abot niya sa harong hinapot siya kan saiyang panugangan, “Ano an nangyari sa lakaw mo, aki ko?” Isinaysay ni Ruth an gabos na ginibo ni Boaz para saiya.

¹⁷ Olay niya, “Sinabi niya sako na dai ako magpuli na mayong dara, kaya tinao niya sako ining sebada.”

¹⁸ Sinabihan siya ni Naomi, “Maghalat ka sana, Ruth, sagkod na maaraman mo an aabotan kan bagay na ini. Dai maontok si Boaz ngunyan na aldaw sagkod na dai niya ini maareglar.”