Ruth 2 - Marahay na Bareta Biblia

Nagtrabaho si Ruth sa Oma ni Boaz

¹ Igwa si Naomi nin kadugo na an ngaran Boaz, sarong tawong mayaman asin mapangyari na gikan sa pamilya kan saiyang agom na si Elimelek.

² Sarong aldaw, nagsabi si Ruth ki Naomi, “Tugote akong magduman sa oma tanganing manirot kan mga nagkawaralat na trigo kan mga paraani. May paglaom ako na manunumpongan ko an tawong matugot sako na magtrabaho sa hurihan niya.” Nagsimbag si Naomi, “Lakaw na, aki ko.”

³ Kaya nagduman si Ruth sa oma asin naglakaw sa hurihan kan mga paraani. Sinirot niya an mga trigo na nagkawaralat ninda. Nangyari na an nadumanan niyang oma sadiri ni Boaz.

⁴ Dangan pakalihis nin nagkapirang oras, nag-abot si Boaz hale sa Betlehem. “Mapasaindo an Kagurangnan,” an sabi niya sa mga paraani. “Bendisyonan ka logod nin Kagurangnan,” an simbag ninda.

⁵ Hinapot ni Boaz an namamahala kan mga paraani, “Siisay an babaeng iyan?”

⁶ Nagsimbag an namamahala, “Siya an babaeng dayuhan na nag-iba ki Naomi hale sa Moab.

⁷ Nakiolay siya sako na tugotan kong magsunod sa mga paraani asin siroton an mga natada. Nagtrabaho siya poon pa kasubagong aga, asin ngunyan pa sana nag-ontok tanganing magpahingalo sa payag sa kadikit na panahon.”

⁸ Dangan sinabihan ni Boaz si Ruth, “Dangoga ining hatol ko: Dai ka manirot sa ibang oma kundi digdi sana. Magtrabaho ka kaiba kan mga babae digdi;

⁹ tandaan mo kun saen sinda nag-aani asin magsunod ka sainda. Pinagbotan ko an mga kalalakihan na dai ka pag-anohon. Dangan kun mapaha ka, uminom ka kan tubig sa mga tapayan na pinano kan sakong mga sorogoon.”

¹⁰ Duminuko si Ruth sa pagtao nin galang dangan hinapot si Boaz, “Tano ta may pagmalasakit ka sako? Tano ta pinapahilingan mo nin marahay na boot an sarong dayuhan?”

¹¹ Nagsimbag si Boaz, “Nabaretaan ko an gabos mong ginibo para sa saimong panugangan na babae poon na magadan an saimong agom. Naisihan kong binayaan mo an sadiri mong mga magurang asin an sadiri mong banwaan, dangan nagdigdi ka tanganing mag-erok sa kaibahan nin mga tawong dai mo man lamang midbid.

¹² Balosan ka logod nin Kagurangnan huli kan saimong ginibo. Magkaigwa ka logod kan maninigong kabayadan hale sa Kagurangnan, an Dios kan Israel, na dinolok mo tanganing magpaataman.”

¹³ Nagsimbag si Ruth, “Maboot ka sako. Natawan mo ako nin kaalingan huli sa marahay na pakipag-olay mo sako, maski ngani dai ako makapantay sa saimong mga sorogoon.”

¹⁴ Sa oras nin pagkarakan, nagsabi si Boaz ki Ruth, “Madya asin kumua ka nin tinapay, dangan isawsaw mo sa arak.” Kaya nagtukaw si Ruth sa kataed kan mga paraani, asin tinawan siya ni Boaz nin sinanlag na trigo. Nagkakan si Ruth sagkod na nabasog, asin may natada pa siyang pagkakan.

^15-16 Kan maghale na siya tanganing ipadagos an panirot, pinagbotan ni Boaz an saiyang mga paraani, “Pabayae nindo siyang manirot maski sa mga may ginuygoy asin dai nindo siya pagsawayon. Laen pa kaiyan, magbulnot kamo nin mga uhoy sa mga ginuygoy asin iwalat nindo tanganing mapurot niya.”

¹⁷ Kaya nagtipon si Ruth nin trigo sa oma sagkod na magdiklom, asin kan makaginik na siya, haros dyes kilos an nakua niya.

¹⁸ Dinara niya ini pabalik sa banwa, dangan ipinahiling niya ki Naomi an saiyang natipon na trigo. Itinao niya man an natada niyang pagkakan sa saiyang panugangan.

¹⁹ Hinapot siya ni Naomi, “Saen mo sinirot an mga trigong ini? Kiisay kang oma nagtrabaho? Bendisyonan logod nin Dios an tawong nagmakulog saimo.” Kaya isinabi ni Ruth ki Naomi na duman siya nanirot sa omang sadiri kan lalaking an ngaran Boaz.

²⁰ “Bendisyonan logod nin Kagurangnan si Boaz,” an olay ni Naomi. “Inootob nanggad nin Kagurangnan an saiyang mga panuga sa mga nabubuhay asin sa mga gadan.” Nagpadagos siya, “An tawong iyan harani ta pang kadugo; saro siya sa may katongdan na mag-ataman sato.”

²¹ Dangan nagsabi si Ruth, “Orog sa gabos, sinabihan niya ako na magpadagos sa panirot kasunod kan saiyang mga paraani sagkod na matapos ninda an pag-ani.”

²² Sinabihan ni Naomi si Ruth, “Marahay mananggad na manirot ka sa kaibahan kan mga babae sa oma ni Boaz. Tibaad kun ano pa an mangyari saimo kun sa ibang oma ka magduman.”

²³ Kaya nagtrabaho si Ruth kairiba kan mga babaeng paraani sa oma ni Boaz sagkod na maani an gabos na sebada saka trigo. Nagpadagos siyang mag-erok sa kaibahan kan saiyang panugangan na babae.