Ruth 1 - Marahay na Bareta Biblia

Nag-erok sa Moab si Elimelek asin an Saiyang Pamilya

^1-2 Kaidtong panahon, kan an Israel dai pa nin hade, nagkaigwa nin makuring gutom sa daga. Kaya an sarong lalaki na an ngaran Elimelek, na kaayon sa kamaganakan ni Efrat asin taga Betlehem sa Juda, nagduman sa Moab tanganing duman ngona mag-erok. Kaiba niya an saiyang agom na si Naomi asin an duwa nindang aking lalaki na si Malon saka si Chilion. Kan nag-eerok na sinda duman,

³ nagadan si Elimelek. Nawalat si Naomi asin an saiyang duwang aking lalaki,

⁴ na nag-aragom nin mga babaeng Moabita na iyo si Orpa saka si Ruth. Pakalihis nin may sampolong taon,

⁵ nagadan man si Malon saka si Chilion, kaya si Naomi an nawalat kan saiyang agom asin duwang aki.

Nagbalik sa Betlehem si Naomi kaiba si Ruth

⁶ Dai nahaloy, nabaretaan ni Naomi na benendisyonan nin Kagurangnan an saiyang banwaan sa pagtao sainda nin marahay na ani; kaya nag-andam siya na maghale sa Moab kaiba an saiyang mga manugang.

⁷ Naglakaw sinda tanganing magbalik sa Juda; alagad sa dalan,

⁸ sinabihan niya an duwa, “Magpuli na kamo sa harong kan saindong mga ina. Magin marahay logod saindo an Kagurangnan siring na kamo nagin marahay sako sagkod sa mga nagadan.

⁹ Itugot logod nin Kagurangnan na maagom giraray kamo asin magkaigwa nin pamilya.” Dangan hinadokan sinda ni Naomi bilang pagpaaram. Alagad napahibi an duwa

¹⁰ asin nagsabi saiya, “Dai mi ika babayaan. Maiba kami saimo pasiring sa saimong banwaan.”

¹¹ “Bumalik na kamo, mga aki ko,” an simbag ni Naomi. “Tano ta boot nindong mag-iba sako? Sa paghona daw nindo magkakaigwa pa ako nin mga aking lalaki na maagom saindo?

¹² Magpuli na kamo, huli ta gurang na ako para magpaagom giraray. Maski isipon ko na igwa pa akong paglaom, asin magpaagom ako ngunyan na banggi dangan mangaki nin mga lalaki,

¹³ makakahalat pa daw kamo sagkod na dakula na sinda? Sinda kaya an makapugol sa dai nindo pagpaagom sa iba? Mga aki ko, aram nindong imposible iyan. Pinadusahan ako nin Kagurangnan, asin nakakamati ako nin kamondoan para saindo.”

¹⁴ Naghibi na naman sinda. Dangan hinadokan ni Orpa si Naomi asin nagpaaram, alagad namugol si Ruth sa saiyang panugangan.

¹⁵ Kaya sinabihan siya ni Naomi, “Ruth, nagbalik na an saimong bilas sa saiyang banwaan asin sa saiyang dios. Magpuli ka na kaiba niya.”

¹⁶ Alagad nagsimbag si Ruth, “Dai mo ako pagsabihan na bayaan taka; tugote akong umiba saimo. Saen ka man magduman, maduman ako; saen ka man mag-erok, duman ako maerok. An saimong banwaan magigin banwaan ko, asin an saimong Dios magigin sakuyang Dios.

¹⁷ Saen ka man magadan, duman ako magagadan, asin duman ako ilulubong. Mapasako logod an pinakamagabat na padusa nin Kagurangnan kun tutugotan kong ikasiblag ako saimo kan ano man na bagay maski kan kagadanan.”

¹⁸ Kan mahiling ni Naomi na desidido si Ruth sa pag-iba saiya, dai na siya naggirong.

¹⁹ Kaya nagpadagos sa paglakaw an duwa sagkod na nakaabot sinda sa Betlehem. Pag-abot ninda duman, napangalas an bilog na banwaan asin nagsarabi an kababaehan, “Si Naomi kaya iyan?”

²⁰ “Dai nindo ako pag-apodon Naomi,” an simbag niya. “Apodon nindo akong Mara huli ta an sakong buhay ginibong mapait kan Makakamhan na Dios.

²¹ Dakul akong sadiri paghale ko digdi, alagad ibinalik ako nin Kagurangnan na mayo nin ano man. Tano ta pag-apodon nindo akong Naomi kun arog kaini na pinadusahan ako nin Kagurangnan na Makakamhan asin tinawan ako nin kasakitan?”

²² Kaya nagbalik si Naomi hale sa Moab kaiba an saiyang Moabitang manugang na si Ruth. Kan mag-abot sinda sa Betlehem, nagpopoon pa sana an pag-ani kan sebada.