Parahulit 9 - Marahay na Bareta Biblia

¹ Ini gabos sakuyang inisip asin siniyasat nin marahay, kaya nasabotan ko na nasa kamot nin Dios an mga gibo kan mga matanos saka kan mga madonong, maski an saindang pagkamoot asin pagkaongis. Dai ninda aram kun ano an aatubangon ninda sa maabot na panahon,

² huli ta parareho an kataposan kan gabos, matanos man o tampalasan, marahay man o maraot, malinig man o maati, nagdodolot man nin atang o dai. An tawong banal mayo man nin kalaenan sa tawong parakasala; an tawong minasumpa arog man sa tawong dai minasumpa.

³ Pareho an kataposan kan gabos na tawo, asin ini saro man na karatan arog kan ibang nangyayari sa kinaban na ini. Mantang nabubuhay pa an mga tawo, an saindang isip pano nin karatan saka karungawan, dangan nagagadan sinda tolos.

⁴ Alagad an nabubuhay sa kinaban kan mga buhay, igwa nin paglaom; an sarong buhay na ayam mas marahay ki sa sarong gadan na leon.

⁵ Aram kan mga buhay na sinda magagadan, alagad an mga gadan mayo nin naaaraman. Dai na sinda magkakaigwa nin premyo; padagos na sindang malilingawan.

⁶ Kaiba nindang nagadan an saindang pagkamoot, an saindang pagkaongis asin pagkaori. Mayo na sinda nin kahirasan sa mga nangyayari sa kinaban.

⁷ Ipadagos mo an saimong pagkakan asin mag-ogma ka; inoma an saimong arak asin maggayagaya ka. Oyon kaiyan an Dios.

⁸ Danay kang magin maogma asin maggayagaya.

⁹ Mag-ogma ka sa buhay kaiba an agom na saimong namomotan, sagkod na igwa ka pa kan mayong halagang buhay na itinao saimo nin Dios sa kinaban na ini, huli ta iyan man lamang an kahirasan mo sa buhay para sa gabos mong kapagalan.

¹⁰ Sa bilog mong makakaya, gibohon mo an anoman na trabaho, huli ta mayo nin anoman na trabaho, kaisipan, pakaaram o kadonongan sa kinaban kan mga gadan, an lugar na saimong padudumanan.

¹¹ Nahiling ko man na sa kinaban na ini, bakong an gabos na marikas iyo an nanggagana sa karera; an mga maiisog dai man danay na nanggagana sa gera; bakong an gabos na madonong iyo an nagkakaigwa nin ikabubuhay; bakong an gabos na may abilidad an nagkakaigwa nin kayamanan; bakong an gabos na eksperto an nagkakamit kan haralangkaw na katongdan. An kadimalasan nangyayari sa kiisay man.

¹² Dai aram kan tawo an saiyang panahon. Siring na an sira nadadakop sa hikot, siring na an gamgam nadadakop sa litag, siring man an tawo nadadakop sa mga maraot na panahon, kun kasuarin dai ninda pinaglalaoman.

Mga Kaisipan Manongod sa Kadonongan asin Kalolongan

¹³ Saro pang arogan nin kadonongan an nahiling ko sa kinaban na ini, na garo marahay para sako.

¹⁴ Igwa kaidto nin sarong sadit na syudad na kadikit sana an mga tawong nag-eerok. Dangan sarong mapangyaring hade an nagsalakay duman. Pinalibotan niya idto asin nag-andam na lagbason an mga kudal.

¹⁵ Igwang nag-erok duman na sarong dukha alagad madonong na lalaki, na pwede kutanang magligtas kan syudad. Alagad mayo man lamang nin nakagiromdom saiya.

¹⁶ Danay kong sinasabi na an kadonongan marahay ki sa kosog, alagad mayo nin naghohona na an sarong dukha madonong o mayo nin nagdadangog kun siya nagtataram.

¹⁷ Mas marahay an magdangog sa maluway na mga tataramon nin sarong madonong na tawo, ki sa magdangog sa kurahaw nin sarong pamayo sa sarong konseho nin mga lolong.

¹⁸ Mas marahay an kadonongan ki sa mga armas nin gera, alagad an sarong parakasala nagraraot nin dakul na karahayan.