Parahulit 8 - Marahay na Bareta Biblia

¹ An madonong sana an nakakasabot kan tunay na kahulogan kan mga bagay. An kadonongan iyo an nakakapaliwanag kan saiyang lalawogon asin nakakapara kan mga korondot sa saiyang angog.

Kuyogon an Hade

² Kuyogon mo an pagboot kan hade asin dai ka maghidali sa paggibo nin panuga sa Dios.

³ An hade makakagibo kan anoman na boot niya, kaya humale ka sa saiyang atubang; dai ka mag-ontok sa siring kapeligrosong lugar.

⁴ Mapangyari an tataramon kan hade asin mayo nin makakasalungat sa ginigibo niya.

⁵ An minakuyog kan kabotan kan hade dai namumugtak sa pag-alaman; an sarong madonong na tawo nakakaaram kan paagi asin kun nuarin gibohon iyan.

⁶ Igwa nin tamang panahon saka paagi sa paggibo kan gabos na bagay, alagad dikit sana an satong naaaraman!

⁷ Mayo satong nakakaaram kun ano an mangyayari, asin mayong mataram sato.

⁸ Maski siisay mayo nin kapangyarihan sa pagpahalawig kan saiyang buhay o sa pagpanuodma kan aldaw nin saiyang kagadanan. Iyan sarong gera na dai ta madudulagan, maski gamitan pa nin daya.

An Tampalasan asin an Matanos

⁹ Nahiling ko ini gabos kan horophoropon ko an nangyari sa kinaban, saen an ibang tawo igwa nin kapangyarihan, mantang an iba minatios sa pananakop kan mga tawong iyan.

¹⁰ Dangan nahiling ko an ilinubong na mga tampalasan. Laog-luwas sinda kaidto sa banal na lugar, asin inomaw sa mga syudad saen naggibo sinda nin karatan. Ini mayo man nin halaga.

¹¹ An mga tawo andam sa paggibo nin karatan, huli ta an krimen dai tolos pinapadusahan.

¹² An sarong parakasala pwedeng gumibo nin ginatos na karatan, asin padagos pang mabuhay. Aram ko kun ano an saindang sinasabi: “Kun kuyogon nindo an Dios, an gabos magigin marahay,

¹³ alagad bako iyan magigin marahay para sa mga tampalasan. An saindang buhay arog sa sarong anino, asin hoben pa sindang magagadan huli ta dai sinda nagkukuyog sa Dios.”

¹⁴ Alagad iyan masakit na saboton. Kun minsan igwa nin mga matanos na iyo an nag-aako kan padusa kan mga tampalasan; kun minsan an mga tampalasan iyo an nag-aako kan premyo kan mga matanos. Minasabi ako na ini mayo man nin halaga.

¹⁵ Kaya napatotoohan ko sa sadiri ko na an tawo dapat na maghanap nin kaogmahan, huli ta an marahay saiya sa buhay na ini iyo an pagkakan saka pag-inom asin pagpaogma sa sadiri. Ini magigibo niya mantang nagpapagal siya sa buhay na itinao saiya nin Dios sa kinaban na ini.

¹⁶ Kan hiningowa kong magin madonong asin masabotan an nangyayari sa kinaban, nasabotan kong maski aldaw-bangging dai magtorog an tawo,

¹⁷ dai nanggad niya masasabotan an ginigibo nin Dios. Maski gurano niyang paghingowa, dai nanggad niya masasabotan. An madonong na tawo pwedeng magsabing nakakasabot siya, alagad dai nanggad!