Parahulit 7 - Marahay na Bareta Biblia

Mga Kaisipan dapit sa Buhay

¹ An marahay na ngaran mas marahay ki sa mamahalon na olor; an aldaw nin kagadanan, mas marahay ki sa aldaw nin pagkamundag.

² Mas marahay an magduman sa harong na igwa nin pagmondo ki sa harong na igwa nin bangkete, huli ta an nabubuhay dapat na magromdom na naghahalat sato gabos an kagadanan.

³ An kamondoan mas marahay ki sa kaogmahan, huli ta maski nakakapamondo iyan nin lalawogon, nakakatao iyan nin pakasabot.

⁴ An tawong danay na nag-iisip dapit sa kaogmahan sarong lolong; an madonong na tawo nag-iisip dapit sa kagadanan.

⁵ Mas marahay para sa sarong tawo na sagweon siya nin sarong madonong ki sa omawon siya nin mga lolong.

⁶ An pagngisi kan mga lolong garo linagatik kan tonok na isinugba sa kalayo. Ini mayo man nin halaga.

⁷ Kun an sarong madonong nang-aapi sa iba, siya minagibo kan sa lolong. Kun an sarong tawo mag-ako nin suhol nagigin marompot an saiyang isip.

⁸ An kataposan kan sarong bagay orog na marahay ki sa kapinonan kaiyan. An pagkamatinios mas marahay ki sa kapaabaw-abawan.

⁹ Hare pag-anggot tolos-tolos, huli ta sa lolong an pagrimpos nin maraot na boot.

¹⁰ Hare paghapot, “Tadaw ta mas marahay an mga nakaaging aldaw ki sa mga aldaw na ini?” Huli ta bakong sa madonong an hapot na iyan.

¹¹ An gabos na tawong nabubuhay dapat magin madonong; marahay iyan siring sa pag-ako nin kahirasan.

¹² Magtatao iyan saimo nin katiwasayan, siring sa itinatao nin kwarta. Iingatan ka kan kadonongan—iyo ini an karahayan kan pakaaram.

¹³ Horophoropa an gibo nin Dios; siisay an makakatanos kan tiniko nin Dios?

¹⁴ Mag-ogma ka sa mga aldaw nin kauswagan, asin sa mga aldaw nin kasakitan, giromdoma na an Dios nagpapadara nin kaogmahan siring na nagpapadara siya nin kasakitan. Dai mo nanggad maaraman kun ano an sunod na maabot saimo.

¹⁵ Sa sakong mayong halagang buhay nahiling ko an gabos na bagay. An sarong matanos na tawo pwedeng magadan mantang an saro padagos na nabubuhay, maski siya sarong maraot na tawo.

¹⁶ Kaya dai ka magpakamatanos o magpakamadonong nin sobra; tano ta gagadanon mo an saimong sadiri?

¹⁷ Alagad dai ka man magpakatampalasan o magpakalolong nin sobra; tano ta magpapagadan ka sa bako pa tamang panahon?

¹⁸ Likayan mo an duwang kasobrahan na ini. Kun may pagkatakot ka sa Dios, magigin mauswag ka.

¹⁹ An kadonongan nagtatao nin kosog sa sarong tawo orog pa ki sa magigibo nin sampolong pamayo para sa sarong syudad.

²⁰ Sa kinaban, mayo nanggad nin sarong matanos na tawo na danay na naggigibo nin karahayan sa gabos na panahon asin dai nanggad nagkakasala.

²¹ Hare pagdangog sa gabos na sinasabi kan mga tawo, ta tibaad madangog mong minamaldisyon ka kan saimong sorogoon;

²² aram mong dakul na beses mo man na minaldisyon an ibang tawo.

²³ An gabos na ini binalo ko kan sakong kadonongan. Nagsabi ako, “Magigin madonong ako;” alagad dai ko iyan nakamtan.

²⁴ Siisay an makakaladop kan kahulogan nin buhay? Hararom iyan nin marahay, asin dipisil masabotan.

²⁵ Idinusay ko an sakong buhay sa pagsabot saka sa pagsiyasat, sa paghanap nin kadonongan saka nin kasimbagan sa sakong mga hapot, asin sa pagsabot kun gurano karaot asin kalolong an kamangmangan.

²⁶ Nakua ko na orog na mapait ki sa kagadanan an babae, na an saiyang pagkamoot arog sa sarong siod asin sa sarong hikot; dangan an saiyang mga kamot na pangkugos arog sa mga kadena. An lalaki na nakakapawili sa Dios makakadulag saiya; alagad an parakasala madadakop niya.

²⁷ Ini an dikit-dikit kong naaraman, mantang hinahanap ko an mga kasimbagan, an sabi kan Parahulit.

²⁸ Naghingowa akong makakua nin ibang kasimbagan, alagad mayo akong nakua. Sa sangribong lalaki, saro sana an nakua kong maninigong galangan; alagad mayo maski sarong babae.

²⁹ Ini sana an sakong nanodan: an tawo linalang na matanos nin Dios, alagad naghanap siya nin dakul na kapurisawan sa buhay.