Parahulit 6 - Marahay na Bareta Biblia

¹ Nahiling ko na igwa sa kinaban nin sarong mangirhat na karatan:

² an sarong tawo tinatawan nin Dios nin yaman, rogaring, kaomawan, saka gabos niyang kamawotan; alagad dai niya tinatawan nin kapangyarihan na gamiton iyan sa kaogmahan. An sarong dayuhan logod an igwa kan kapangyarihan na iyan. Ini mayo man nin halaga; sarong dakulang karaotan.

³ An sarong tawo pwedeng magkaigwa nin sanggatos na aki asin pwedeng mabuhay sa halawig na panahon. Alagad maski gurano kahalawig an saiyang buhay, kun dai niya nanamitan an mga marahay na bagay nin buhay asin dai siya nagkaigwa nin desenteng lubong, ako minasabi na mas marahay pa saiya idtong omboy na gadan nang namundag.

⁴ Mayo man nin halaga kun mamundag an aki; minaduman iyan sa kadikloman dangan nalilingawan.

⁵ Dai man iyan nakahiling kan liwanag nin aldaw o nakamidbid nin anoman, alagad nakakua nin katoninongan

⁶ orog pa ki sa tawo na dai man lamang nakakamate kan kaogmahan nin buhay, maski mabuhay pa siya nin duwang ribong taon. Huli ta sindang duwa maduman sa pareho man sanang lugar.

⁷ Ginigibo nin tawo an gabos niyang trabaho tanganing magkaigwa siya nin kakanon, alagad nakukulangan man giraray an tulak niya.

⁸ Paano magigin orog na paladan an tawong madonong ki sa tawong lolong? Ano an pakinabang nin sarong dukha maski masabotan pa niya kun paano an pag-atubang sa buhay?

⁹ Ini mayo man nin halaga, asin garo sana paglamag sa doros. Mas marahay pang makontento ka kan yaon na saimo ki sa sarong bagay na danay pang minamawot.

¹⁰ An gabos na nangyayari itinalaan na kaidto. Siring man, aram na nyato kun ano an tawo: dai siya pwedeng makidiskutir sa mas makosog sa saiya.

¹¹ Kun orog na haloy an diskutiran, orog na mayo iyan nin halaga, asin mayo nin pakinabang para sa tawo.

¹² Siisay an nakakaaram kun ano an marahay para sa tawo digdi sa halipot saka mayo nin halagang buhay—sarong buhay na minaagi sana siring sa sarong anino? Siisay an makakasabi kun ano an mangyayari sa kinaban pagkatapos na magadan siya?