Parahulit 10 - Marahay na Bareta Biblia

¹ An gadan na mga langaw nakakapabata sa sarong botelyang pahamot, asin an kadikit na kalolongan pwedeng makaraot sa kadonongan asin onra.

² Natural para sa sarong madonong an paggibo nin tama, asin para sa sarong lolong an paggibo nin sala.

³ An saiyang kalolongan mahahayag maski sa mga dayuhan na saiyang nasasabat sa dalan; ipinapaaram niya sa gabos na siya sarong lolong.

⁴ Kun maanggotan ka kan pamayo, dai ka maghale sa saimong katongdan; huli ta an dakulang mga kasalan pwedeng patawadon kun dai ka sana maggirong.

⁵ Nakahiling ako nin sarong karatan—karatan nin sarong namamayo.

⁶ Mga lolong na tawo an tinatawan nin halangkaw na katongdan, mantang an mga mayayaman tinatawan nin harababang katongdan.

⁷ Nakahiling ako nin mga oripon na nangangabayo mantang an mga kagurangnan naglalakaw na garo mga oripon.

⁸ Kun magkalot ka nin bubon, mahuhulog ka diyan; kun maglusot ka sa sarong kudal, pwedeng makagat ka nin halas.

⁹ Kun magtabas ka nin gapo, malulugadan ka kan mga gapo. Kun magtiak ka nin kahoy, makukulogan ka sa paggibo kaiyan.

¹⁰ Kun bakong matarom an saimong patok asin dai mo iyan taison, kaipuhan dugangan mo an saimong kosog kun ginagamit iyan. An kadonongan nakakatabang sa pag-uswag.

¹¹ Mayong halaga an pakaaram mong magdakop nin halas, kun pabayaan mong kagaton ka ngona kaiyan.

¹² An tataramon nin sarong madonong na tawo nagdadara saiya nin kaomawan; alagad an lolong nararaot kan sadiri niyang mga tataramon.

¹³ An lolong minapoon sa pagtaram nin kalolongan asin natatapos sa karungawan.

¹⁴ An lolong taram sanang taram. Mayong nakakaaram kun ano an sunod na mangyayari, asin mayong makakataram kun ano an mangyayari sato pakatapos na kita magadan.

¹⁵ An lolong sana an dai nakakakua kan dalan pasiring sa saiyang harong, kaya pinapagal niya an sadiri sa pagtrabaho.

¹⁶ Herak man sa sarong nasyon kun an naghahade diyan sarong hoben, asin an mga lider diyan nagpapaaga sa pagbangkete!

¹⁷ Alagad paladan an sarong nasyon kun an naghahade diyan sarong tawong igwa nin sadiring kaisipan, asin an mga lider nagbabangkete sa tamang panahon, tanganing magkosog asin bakong tanganing magburat.

¹⁸ Kun an tawo hugakon na maghirahay kan saiyang atop, matagdo iyan dangan magagaba an harong.

¹⁹ An tinapay nakakapaogma, asin an arak nakakapagian sa buhay; alagad dai iyan makakamtan kun mayo nin kwarta.

²⁰ Dai mo pagmaldisyonon an hade, maski sa isip sana, asin dai mo pagmaldisyonon an mayaman maski sa laog kan saimong kwarto. Huli ta may pakpak an bareta asin may talinga an daga.