Biblia Todo Logo
Bìoball air-loidhne

- Sanasan -

Oseas 7 - Marahay na Bareta Biblia

1 “Sa mga panahon na boot ko nang bolongon an sakong banwaan na Israel asin pauswagon giraray sinda, mayo akong nahihiling kundi an saindang katampalasan na saindang ginigibo. Dinadaya ninda an saindang kapwa; sinasalakat ninda an mga harong; asin hinahabonan ninda an mga tawo sa mga tinampo.

2 Dai lamang naglaog sa saindang isip na magigiromdoman ko an gabos na karatan na ini; alagad napapalibotan sinda kan saindang mga kasalan, asin dai pwedeng dai ko mahiling an mga iyan.”


Mga Maraot na Plano sa Laog kan Palasyo

3 Nagsasabi an Kagurangnan, “Dinadaya kan mga tawo an hade asin an saiyang mga opisyal huli kan saindang mga maraot na plano.

4 Gabos sinda mga parapasaluib asin bakong maimbod. Arog sinda sa sarong mainit na horno, na dai ginagatongan kan panadero kun dai pa andam an minasa.

5 An hade saka an mga opisyal kaini binurat ninda asin pinangagin mga lolong huli sa arak kan magselebrar an hade kan saiyang kaaldawan.

6 Iyo, nagkalayo sinda siring sa horno huli kan saindang mga maraot na plano. Bilog na bangging nag-iinit an saindang kaanggotan, asin pagkaaga, nagkakalayo iyan.

7 “Sa init kan saindang kaanggotan, ginadan ninda an saindang mga pamayo; saro-sarong ginadan ninda an saindang mga hade, alagad mayo nin namimibi sa sako sa paghagad nin tabang.”


An Israel asin an mga Nasyon

8 Nagsasabi an Kagurangnan, “An banwaan nin Israel garong hilaw na tinapay. Nagsasarig sinda sa mga nasyon sa palibot ninda

9 asin dai ninda naaaraman na an pagsarig na ini sa mga dayuhan iyo an nagpaluya sainda. Nabibilang na an saindang mga aldaw, alagad dai pa ninda iyan aram.

10 An kapaabaw-abawan kan banwaan nin Israel nagsasaksi laban sa sainda. Dai pa sinda nagbalik sako, an Kagurangnan na saindang Dios, pakatapos na mangyari an gabos.

11 Nakakaarog sinda sa sarong salampati, mangmang asin mayong pakasabot; pakatapos na magpatabang sinda sa Egipto, nagduman sinda sa Asiria!

12 Alagad bibikladon ko an sarong hikot asin dadakopon ko sinda siring sa mga gamgam sa saindang paglayog. Papadusahan ko sinda huli kan karatan na saindang ginibo.

13 “Herak man sainda, huli ta tinalikodan ninda ako asin nagrebelde sinda sako! Magkakagaradan sinda! Boot ko kutanang iligtas sinda, alagad bakong totoo an pagsamba ninda sako.

14 Bakong tudok sa puso an pagpamibi ninda sako, kundi minadarapa saka minaharayo sinda arog kan ginigibo kan mga pagano. Kun namimibi sinda para sa trigo saka arak, linulugad ninda an saindang sadiri siring sa mga pagano. Mga rebelde nanggad sinda!

15 Maski ngani ako an nagpadakula saka nagpakosog sainda, naggiribo sinda nin plano laban sako.

16 Padagos sinda sa pagtalikod sako asin minaduman sinda sa sarong dios-dios na mayong kapangyarihan. Dai sinda malalaoman siring sa sarong tiko na pana. Magagadan sinda sa espada huli kan kapalangkawan kan saindang mga lider, asin ngingisihan sinda kan mga taga Egipto.”

Marahay na Bareta Biblia © Philippine Bible Society, 1992.

Philippine Bible Society
Lean sinn:



Sanasan