Oseas 6 - Marahay na Bareta Biblia

An Bakong Totoong Pagsolsol kan mga Tawo

¹ Nagsasabi an mga tawo, “Magbaralik na kita sa Kagurangnan! Kinukulogan niya kita, alagad papaomayan niya kita; linugad niya kita, alagad bubugkoson niya an satong mga lugad.

² Pakalihis nin duwa o tolong aldaw, bubuhayon niya giraray kita asin mamumuhay kita sa saiyang atubang.

³ Hingowahon tang mamidbidan an Kagurangnan. Madolok nanggad siya sato siring na an bagong aldaw minasirang, siring na an uran minabaribi kan daga.”

⁴ Alagad nagsasabi an Kagurangnan, “Ano an gigibohon ko saimo Israel? Ano an gigibohon ko saimo Juda? Hidali sanang nawawara an saindong pagkamoot sako arog kan alopoop sa pagkaaga; nakakaagid iyan sa ambon na nawawara amay pa an aldaw.

⁵ Iyan an dahelan kun tadaw ta sinugo ko an sakong mga propeta sa saindo dara an sakong mensahe nin paghukom saka pagrumpag. Maliwanag asin malinaw an mawot ko saindo:

⁶ Mawot ko an danay nindong pagkamoot, bakong an isinasakripisyo nindong mga hayop. Mas boot ko pang mamidbidan ako kan sakong banwaan ki sa magtutong sinda nin mga atang para sako.

⁷ “Alagad pakalaog ninda sa daga duman sa Adan, linapas tolos ninda an tipan.

⁸ An Gilead sarong syudad na pano nin maraot na tawo saka mga paragadan.

⁹ An mga padi garo sarong grupo nin mga parahabon na naghihipa sa pagsalakay sa sarong tawo. Maski sa dalan pasiring sa banal na lugar sa Shekem, nanggagadan sinda; tuyo nindang ginibo an mga karatan na ini!

¹⁰ May nahiling akong mangirhat na bagay sa Israel; dinigtaan kan sakong banwaan an saindang sadiri huli sa pagsamba sa mga dios-dios.

¹¹ “Asin kamo man, banwaan nin Juda, itinalaan ko na man an panahon tanganing padusahan kamo huli kan saindong ginigibo.