Oseas 4 - Marahay na Bareta Biblia

An Reklamo nin Kagurangnan laban sa Israel

¹ An Kagurangnan igwa nin reklamo laban sa mga tawo na nag-eerok sa dagang ini. Dangoga, Israel, an sinasabi niya: “Mayo nin kaimbodan o pagkaherak sa daga, asin dai ako inaako kan mga tawo bilang Dios.

² Nanunuga sinda alagad dai iyan inootob; nagpuputik sinda, nanggagadan, nanghahabon, asin nagdodorog sa bako nindang agom. Nagdadakul an krimen, asin sunod-sunod an garadanan.

³ Kaya maaalang an daga, asin magagadan an gabos na nabubuhay diyan. Magagadan man an gabos na hayop, gamgam saka sira.”

An Reklamo nin Kagurangnan laban sa mga Padi

⁴ Nagsasabi an Kagurangnan, “Dai pagtugotan an siisay man na mag-akusar sa mga tawo o magtuyaw sainda—an sakong reklamo laban saindo, na mga padi.

⁵ Aldaw-banggi, mayo kamong gibong matanos; an mga propeta siring man saindo. Raraoton ko an Israel, an saindong ina.

⁶ Mayong paglaom an sakong banwaan huli ta dai ninda ako minimidbid. Kamo man na mga padi habong magmidbid sako asin isinikwal nindo an sakong katukdoan, kaya isinisikwal ko man kamo asin dai ko man aakoon an saindong mga aking lalaki bilang mga padi ko.

⁷ “Mantang nagdadakul kamong mga padi, nagdadakul man an saindong kasalan tumang sako, kaya gigibohon kong kasosopgan an saindong kamurawayan.

⁸ Nagyayaman kamo huli sa mga kasalan kan sakong banwaan, kaya boot pa nindong magdugang an saindang pagkakasala.

⁹ Parehong padusa an aakoon nindo asin kan mga tawo. Papadusahan ko kamo asin papabayadon kan mga karatan na saindong ginigibo.

¹⁰ Makakan kamo kan saindong kahirasan kan mga sakripisyo alagad dai kamo mababasog. Magsasamba kamo sa mga dios-dios, alagad dai kamo makakaigwa nin mga aki, huli ta tinalikodan nindo ako tanganing magsunod sa mga dios-dios.”

Kinondenar nin Kagurangnan an Paganong Pagsasamba

¹¹ Nagsasabi an Kagurangnan, “An arak, daan man o bago, iyo an naghahale kan pakasabot kan sakong banwaan!

¹² Minahagad sinda nin kapahayagan sa sarong pedasong kahoy! An sarong sanga an nagsasabi sainda kan boot nindang maaraman! Tinalikodan na ninda ako. Siring sa sarong babae na nagin maraot, idinusay na ninda an saindang sadiri sa mga dios-dios.

¹³ Nagdodolot sinda nin mga sakripisyo sa sagradong mga lugar sa ibabaw nin kabukidan, asin nagsusulo sinda nin insenso sa lindong nin mga haralangkaw saka marambong na mga kahoy sa kabubuldan, huli ta marahay an lindong duman! “Huli kaini, naglilingkod bilang mga maraot na babae an saindong mga aking babae, asin nagpapasambay an saindong mga manugang na babae.

¹⁴ Alagad dai ko sinda papadusahan huli sa siring na bagay, huli ta kamo mismo nakikidorog man sa mga maraot na babae sa templo, asin sa kaibahan ninda, nagdodolot kamo nin mga paganong sakripisyo. Siring sa kasabihan, ‘An banwaan na mayong pakasabot mararaot.’

¹⁵ “O Israel, maski dai ka nagin maimbod sako, an mga taga Juda dai man logod magkasala nin siring. Dai kamo magsamba sa Gilgal o sa Bet-Aven, ni magsumpa duman sa ngaran kan buhay na Kagurangnan.

¹⁶ An mga taga Israel matatagas an payo siring sa mga mula. Paano ko sinda mapapakakan arog sa mga kordero sa sarong mahiwas na pasabsaban?

¹⁷ An mga taga Israel nadadara na kan kapangyarihan kan mga dios-dios; pabayaan na nindo sinda sa saindang gawe.

¹⁸ Pakainom nin dakul na arak, nawiwilihan ninda an pakikidorog sa bako nindang agom; boot pa ninda an kasosopgan ki sa onra.

¹⁹ Dadarahon sinda sa harayo na garo ipinalid kan doros, asin magkakasoropog sinda huli kan saindang paganong mga sakripisyo.