Oseas 2 - Marahay na Bareta Biblia

¹ Kaya an kapwa nindo Israelita ngaranan nindong “Banwaan nin Dios” asin “Namotan kan Kagurangnan.”

Dai Nagin Maimbod si Gomer—Dai Nagin Maimbod an Israel

² Mga aki ko, makimaherak kamo sa saindong ina—maski bako na siya sarong agom para sako, asin bako na ako an saiyang agom. Makimaherak kamo saiya na ontokon na niya an pakikidorog sa ibang lalaki asin an saiyang pagigin sarong maraot na babae.

³ Kun dai siya mag-ontok, huhubaan ko siya arog kan aldaw na siya namundag. Iaarog ko siya sa sarong alang saka mayong tanom na daga, dangan magagadan siya sa paha.

^4-5 Dai ko maheherakan an saiyang kaakian; mga aki sinda nin sarong mayong sopog na maraot na babae. Siya man sana an nagsabing, “Maduman ako sa mga lalaking namomoot sako—tinatawan ninda ako nin pagkakan saka tubig, telang lana asin lino, lana nin oliba saka arak.”

⁶ Kaya kukudalon ko siya nin matonok na mga tinanom asin matugdok ako nin kudal na maolang kan saiyang agihan.

⁷ Lalamagon niya an mga namomoot saiya alagad dai niya maaabotan. Hahanapon niya sinda alagad dai niya makukua. Dangan masabi siya, “Mabalik ako sa enot kong agom—mas marahay pa an kamugtakan ko kaidto sa kaibahan niya ki sa ngunyan.”

⁸ Dai niya nanggad aakoon na ako an nagtao saiya nin trigo, arak, lana nin oliba, asin kan gabos na plata saka bulawan na ginamit niya sa pagsamba ki Baal.

⁹ Kaya sa tig-ani, babawion ko an sakong mga regalong trigo saka arak, asin babawion ko man an mga telang lana saka lino na itinao ko saiya para sa saiyang gubing.

¹⁰ Huhubaan ko siya sa atubang kan mga lalaking namomoot saiya, asin mayo nin siisay man na pwedeng magligtas saiya sa sakong kapangyarihan.

¹¹ Tataposon ko na an saiyang kaogmahan—an saiyang taon-taon saka bulan-bulan na mga pyesta asin an saiyang mga Sabbath—an gabos niyang itinalaan na mga pyesta.

¹² Raraoton ko an saiyang tinanom na mga ubas asin mga kahoy na higera, na sinabi niyang ibinayad saiya kan mga namomoot saiya karibay kan saiyang paglingkod sainda. An saiyang mga ubasan saka mga kahoy na higera gigibohon kong sarong kalangtadan; raraoton an mga iyan kan mga lalaw na hayop.

¹³ Papadusahan ko siya huli kan mga panahon na liningawan niya ako, kan magsulo siya nin insenso ki Baal asin kan isulot niya an saiyang mga alahas tanganing lamagon an mga namomoot saiya. An Kagurangnan an nagtaram.

An Pagkamoot nin Kagurangnan para sa Saiyang Banwaan

¹⁴ Kaya ipag-iiba ko giraray siya sa desyerto; duman bibihagon ko giraray siya sa paagi nin mga tataramon nin pagkamoot.

¹⁵ Itatao ko giraray saiya an mga ubasan na sadiri niya asin an Kapantayan nin Kasakitan gigibohon kong sarong pintoan nin paglaom. Sisimbagon niya ako duman siring kan ginibo niya kan hoben pa siya, kan mag-abot siya hale sa Egipto.

¹⁶ Dangan aapodon niya giraray ako na saiyang agom—dai na niya nanggad ako aapodon na saiyang Baal.

¹⁷ Dai ko na nanggad siya tutugotan na sambiton pa an ngaran ni Baal.

¹⁸ Sa panahon na iyan makikipagtipan ako sa gabos na lalaw na hayop saka mga gamgam, tanganing dai na ninda pagkulogan an sakong banwaan. Hahaleon ko man an gabos na armas nin gera sa daga, an gabos na espada saka pana, asin tutugotan kong mamuhay an sakong banwaan na matoninong asin ligtas.

¹⁹ Israel, ika an sakong magigin agom; magigin tunay saka maimbod ako saimo; ipapahiling ko saimo an danay na pagkamoot saka pagkaherak asin magigin sadiri taka sagkod pa man.

²⁰ Ootobon ko an sakong panuga asin mapapasako ka, patin aakoon mo ako bilang saimong Kagurangnan.

^21-22 Sa panahon na iyan sisimbagon ko an mga pamibi kan sakong banwaan na Israel. Pahuhugpaon ko an uran sa daga dangan mamumunga iyan nin trigo, ubas asin oliba.

²³ Papadanayon ko an sakong banwaan sa daga asin papauswagon ko sinda. Ipapahiling ko an pagkamoot sa mga inapod “Dai Namotan,” asin sa mga nginaranan “Bako Kong Banwaan.” Masabi akong, “Kamo an sakong banwaan,” asin masimbag sindang, “Ika an samong Dios.”