Oseas 12 - Marahay na Bareta Biblia

¹ An gabos na ginigibo kan banwaan nin Israel poon sa pagkaaga sagkod sa pagkabanggi, mayong halaga asin nakakaraot. An lambang saro sainda orog na nagigin mapasaluib asin madahas; nakikipagtipan sinda sa Asiria asin nakikipagnegosyo sa Egipto.”

² An Kagurangnan igwa nin reklamo laban sa mga taga Juda; papadusahan man niya an Israel huli kan mga gawe kan saiyang namamanwaan. Babalosan niya sinda sosog sa saindang mga gibo.

³ An saindang ginikanan na si Jacob nakipaggumolan sa kakambal niyang si Esau kan sinda nasa tulak pa kan saindang ina; kan dakula na si Jacob, nakilaban siya tumang sa Dios—

⁴ nakilaban siya sa sarong anghel asin nanggana siya. Naghibi siya dangan nakimaherak na bendisyonan. Sa Betel, dinolok nin Dios an satong ginikanan na si Jacob asin nakiolay saiya.

⁵ Siya an Kagurangnan, an Dios nin mga hukbo; Kagurangnan an saiyang ngaran.

⁶ Kaya ngunyan, kamong mga kapagarakian ni Jacob, magsarig kamo sa saindong Dios, asin magbalik kamo saiya. Magin maimbod kamo saka matanos, asin maghalat kamo na may pakatios sa saindong Dios.

Dagdag na mga Tataramon nin Paghukom

⁷ Nagsasabi an Kagurangnan, “Bakong onesto an banwaan nin Israel arog kan mga taga Canaan; nandadaya sinda huli sa paggamit nin may dayang timbangan.

⁸ Minasabi sinda, ‘Mayaman na kami. Dakulang halaga na an samong natipon asin mayong makakapagsabi na nagyaman kami huli sa pandadaya.’

⁹ Alagad ako, an Kagurangnan na saindong Dios na nangenot saindo paluwas sa Egipto, an mapaerok giraray saindo sa mga tolda, arog kaidto kan magdatong ako saindo sa desyerto.

¹⁰ “Nagtaram ako sa mga propeta asin tinawan ko sinda nin mga bisyon, asin sa paagi kan mga propeta, pinatanidan ko an sakong banwaan.

¹¹ Alagad an pagsamba sa mga dios-dios ginigibo sa Gilead, asin magagadan an mga nagsasamba sainda. Nagsasakripisyo sinda nin mga torong baka sa Gilgal, asin magigin mga tambak nin gapo sa kaawagan an mga altar duman.”

¹² Nagdulag an satong ginikanan na si Jacob pasiring sa Mesopotamia asin duman nag-agom. Nagtrabaho siya sa ibang tawo saka nag-ataman kan mga karnero kaini tanganing maagom an babaeng idto.

¹³ Nagsugo an Kagurangnan nin sarong propeta tanganing iluwas an banwaan nin Israel sa Egipto asin tanganing atamanon sinda.

¹⁴ Pinaanggot nin labi-labi kan mga Israelita an Kagurangnan; maninigo sindang magadan huli kan saindang mga ginibong karatan. Papadusahan sinda nin Kagurangnan huli kan kasosopgan na dinara ninda sa saiya.