Oseas 11 - Marahay na Bareta Biblia

An Pagkamoot nin Dios sa Masombikal Niyang Banwaan

¹ Nagsasabi an Kagurangnan, “Kan an Israel aki pa, namotan ko siya, asin bilang aki kong lalaki inapod ko siya paluwas sa Egipto.

² Alagad kan ako orog na mag-apod saiya, orog man siyang nagharayo sako. Nagsakripisyo ki Baal an sakong banwaan; nagtutong sinda nin insenso sa mga ladawan.

³ Alagad ako an nagtukdo sa Israel sa paglakaw. Sa sakong mga kamot, kinilik ko an sakong banwaan, alagad dai ninda inako na sinda sakong inataman.

⁴ Dinagka ko sinda sa sako huli sa pakikipagkatood asin pagkamoot. Initaas ko sinda dangan idinuta sa sakong pisngi; nagduko ako sainda asin pinakakan ko sinda.

⁵ “Habo nindang magbalik sako, kaya kaipuhan magbalik sinda sa Egipto, asin paghahadean sinda kan Asiria.

⁶ An gera madatong sa saindang syudad asin maraot kan saindang mga trangkahan. Magagadan sa gera an sakong banwaan huli ta ginigibo ninda an hinohona nindang tama.

⁷ Boot nindang magsinutil sako. Maagrangay sinda huli kan sakal na pasan ninda, alagad mayo nin siisay man na mahale kaiyan.

⁸ “Mapapabayaan taka daw, O Israel? Matitios ko daw na bayaan ka? Pwede daw na raoton taka siring kan ginibo ko sa Adma, o gibohon saimo an ginibo ko sa Zeboiim? Dai minatugot an sakong puso na gibohon ko iyan! Dakula nin marahay an sakong pagkamoot saimo.

⁹ Dai taka papadusahan sa sakong kaanggotan; dai ko na nanggad raraoton an Israel. Huli ta Dios ako asin bakong tawo. Ako, an Banal na Dios, kaibahan nindo. Dai ako madiyan saindo sa kaanggotan.

¹⁰ “Masunod sako an sakong banwaan kun ngaroban ko arog sa sarong leon an saindang mga kaiwal. Maghihidali sinda sa pagdolok sako hale sa solnopan.

¹¹ Madatong sinda hale sa Egipto siring sa marikas na mga gamgam, asin siring sa mga salampati hale sa Asiria. Ibabalik ko sinda sa sadiri nindang mga harong. Ako, an Kagurangnan, an nagtaram.”

Kinondenar an Israel asin Juda

¹² Nagsasabi an Kagurangnan, “Mga kaputikan saka pandadaya an ipinalibot sako kan banwaan nin Israel. An mga taga Juda padagos na nagrerebelde laban sako, an maimbod asin banal na Dios.