Obadias 1 - Marahay na Bareta Biblia

¹ Iyo ini an propesiya ni Obadias—an itinaram nin Kagurangnan Dios manongod sa nasyon nin Edom. Ipinadara nin Kagurangnan an saiyang sugo sa mga nasyon, asin nadangog mi an saiyang mensahe: “Pag-andam! Makigera kita sa Edom!”

Papadusahan nin Kagurangnan an Edom

² Tinataraman nin Kagurangnan an Edom, “Gigibohon takang pinakamaluyang nasyon asin pag-oolog-ologon ka kan gabos.

³ Dinaya ka kan saimong kapalangkawan. An pangenot mong syudad sarong bantayan na gapo; an saimong erokan nasa halangkaw na lugar sa kabukidan, kaya nagsasaboot kang, ‘Siisay an makakapababa sako?’

⁴ Maski siring kahalangkaw kan salagan nin agila an saimong harong; maski pa iyan kapantay kan mga bitoon, alagad guguyodon taka paibaba.

⁵ “Kun minadatong sa banggi an mga parahabon, kinukua sana ninda an magustohan ninda. Kun minaguno nin mga ubas an mga tawo, minatada sinda nin dikit na bunga. Alagad pinara ka nanggad kan saimong mga kawal.

⁶ Mga kapagarakian ni Esau, sinamsam an mga kayamanan nindo.

⁷ Dinaya kamo kan saindong mga kaalyansa; pinahale kamo ninda sa sadiri nindong daga. Nasakop kamo ngunyan kan saindong mga katood. An mga katood na nagkakan sa kaibahan nindo iyo an nagsiod saindo. Nagsabi sinda, ‘Haen an saindang katusohan?’

⁸ “Sa aldaw na padusahan ko an Edom, gagadanon ko an saiyang mga madonong, asin paparaon ko an gabos nindang kadonongan.

⁹ An makokosog na lalaki nin Teman magkakatarakot, asin an lambang soldados nin Edom magagadan.

An mga Dahelan kan Pagpadusa sa Edom

¹⁰ “Huli ta hinabonan mo asin ginadan an mga tugang mong lalaki, an mga kapagarakian ni Jacob, gagadanon ka asin sosopogon sagkod lamang.

¹¹ Naghiling ka sana kan laogon nin mga dayuhan an saindang mga trangkahan. Maraot ka siring kan mga dayuhan na nagsamsam kan mga kayamanan nin Jerusalem, dangan nagparanga kaiyan.

¹² Dai ka kutana nag-ogma sa kasakitan kan mga tugang mong lalaki sa Juda. Dai ka kutana nag-ogma sa aldaw kan saindang pagkarumpag. Dai ka kutana nagngisi sa aldaw nin saindang kasakitan.

¹³ Dai ka kutana naglaog sa syudad nin sakuyang banwaan, tanganing pagngisihan an saindang pagtios, asin tanganing habonon an saindang mga kayamanan sa aldaw nin saindang kasakitan.

¹⁴ Dai ka kutana nagtindog sa pinagsasangahan kan dalan tanganing dakopon an mga nagdudulag mong mga tugang. Dai mo kutana sinda itinao sa mga kaiwal sa aldaw nin saindang kasakitan.

Huhukoman nin Dios an mga Nasyon

¹⁵ “Harani na an aldaw na ako, an Kagurangnan, mahukom sa mga nasyon. Edom, an ginibo mo iyo man an gigibohon saimo. Ibabalik saimo an itinao mo.

¹⁶ Ininom kan sakuyang banwaan an mapait na kalis nin padusa sa sakong banal na bulod. Alagad an gabos na nasyon sa palibot mainom kan orog pang mapait na kalis nin padusa; iinomon ninda iyan gabos asin mapapara sinda.

An Kapangganahan nin Israel

¹⁷ “Alagad may nagkapirang makakadulag pasiring sa Bukid nin Sion, asin iyan magigin sarong banal na lugar. Masasadirihan giraray kan banwaan ni Jacob an daga na talagang pagsadiri ninda.

¹⁸ An banwaan ni Jacob saka ni Jose magigin arog sa kalayo; tutunawon ninda an banwaan ni Esau, siring kan pagsulo sa dagami. Mayong matatada sa mga kapagarakian ni Esau. Ako, an Kagurangnan, an nagtaram.

¹⁹ “Masasadirihan kan mga hale an habagat nin Juda an daga nin Edom; asin sasakopon kan mga hale sa pamitisan kan kabubuldan sa solnopan an Filistia. Sasadirihon kan mga Israelita an teritoryo nin Efraim saka Samaria; asin kukuahon kan mga taga Benjamin an Gilead.

²⁰ An hukbo nin mga itinapok hale sa amihan nin Israel mabalik asin sasakopon an Fenicia sagkod sa Sarefat sa amihan. An mga taga Jerusalem na itinapok sa Sardis iyo an masakop kan mga banwa sa habagat nin Juda.

²¹ An mga mapangganang mga lalaki nin Jerusalem masalakay sa Edom saka mamamayo duman, dangan an Kagurangnan mismo iyo an magigin Hade.”