Nehemias 8 - Marahay na Bareta Biblia

Binasa ni Esdras sa mga Tawo an Katogonan

¹ Kan ikapitong bulan, an banwaan nin Israel napamugtak na sa saindang mga banwa. Kan enot na aldaw kan bulan na idto, nagtiripon sinda gabos sa Jerusalem, duman sa atubangan kan Trangkahan nin Tubig. Sinabihan kan mga tawo si Esdras, na sarong padi asin paratukdo kan Katogonan, na darahon an Libro kan Katogonan na itinao nin Kagurangnan sa Israel huli ki Moises.

² Kaya dinara ini ni Esdras duman sa lugar na pinagtiriponan kan mga tawo—mga lalaki, mga babae, saka mga aki na tatao nang magsabot.

³ Binasa niya sainda duman an Katogonan, magpoon pagsirang kan aldaw sagkod odto, asin hinimate siya ninda nin marahay.

⁴ Nakatindog si Esdras sa ibabaw nin sarong platapormang kahoy na ginibo para sa okasyon na idto. Nagtirindog sa saiyang too si Mattitias, si Sema, si Anaias, si Urias, si Hilkias, saka si Maaseias; nagtirindog sa wala niya si Pedaias, si Misael, si Malkias, si Hasum, si Hasbaddana, si Zacarias, saka si Mesullam.

⁵ Nahiling si Esdras kan gabos na tawo huli ta halangkaw an platapormang tinindogan niya. Nagtirindog an gabos kan bukasan niya an libro.

⁶ Inomaw ni Esdras an Kagurangnan, an dakulang Dios, asin initaas kan gabos an saindang mga kamot saka nagsirimbag, “Amen! Amen!” Nagdarapa sinda asin nagsaramba sa Kagurangnan.

⁷ Dangan nagbarangon sinda asin nagtirindog sa dati nindang lugar. An Katogonan ipinaliwanag sainda kan mga Levita na si Jesua, Bani, Serebias, Jamin, Akkub, Sabbetai, Odias, Maaseias, Kelita, Azarias, Jozabad, Hanan, asin Pelaias.

⁸ Malinaw na itrinadusir asin ipinaliwanag ninda an binabasa na Katogonan nin Dios tanganing masabotan kan mga tawo.

⁹ Kan madangog kan mga tawo an hinahagad kan Katogonan, natanyog an saindang boot asin huminibi sinda. Kaya sinabihan sinda ni Nehemias, na iyo an gobernador, ni Esdras na padi saka paratukdo kan Katogonan, asin kan mga Levita na nagtukdo sa mga tawo, “An aldaw na ini banal sa Kagurangnan na saindong Dios, kaya dai kamo magmondo o maghibi.

¹⁰ Magpuli na kamo asin magbangkete. Hirasan nindo nin kakanon saka inomon an mga mayo kaiyan. An aldaw na ini banal para sa satong Kagurangnan, kaya dai kamo magmondo. An kaogmahan na itinao saindo nin Kagurangnan magigin kakosogan nindo.”

¹¹ Naglibot an mga Levita sa pagpaontok kan mga tawo asin sa pagsabi sainda na dai magmondo sa banal na aldaw na idto.

¹² Kaya nagpuli an gabos na tawo tanganing mag-orogma; nagkakan sinda, nag-inom asin naghiras sa iba kan yaon sainda, huli ta nasabotan ninda an ipinahayag sainda.

An Pyesta nin mga Harong-harong

¹³ Kan sunod na aldaw, an mga pamayo kan mga kamaganakan, kaiba an mga padi saka an mga Levita, nagduman ki Esdras tanganing adalan an mga katukdoan kan Katogonan.

¹⁴ Naaraman ninda na an Katogonan, na itinao nin Kagurangnan sa paagi ni Moises, nagboot na an banwaan nin Israel dapat mag-erok sa mga harong-harong sa laog kan Pyesta nin mga Harong-harong.

¹⁵ Kaya ipinagboot ninda asin ibinalangibog sa bilog na Jerusalem asin sa iba pang mga syudad saka banwa an siring: “Magduman kamo sa kabubuldan asin magkua nin mga sanga nin aguho, mga oliba, mga mirto, mga palma, saka iba pang madahon na mga sanga tanganing gibohon na mga harong-harong, siring sa ipinagboot kan Katogonan.”

¹⁶ Kaya nagkurua nin mga sanga an mga tawo asin naggiribo nin mga harong-harong sa mga atop kan saindang harong, sa saindang mga patyo, sa patyo kan Templo nin Dios, sa plasa na harani sa Trangkahan nin Tubig asin sa plasa na harani sa Trangkahan nin Efraim.

¹⁷ An gabos na nagbalik hale sa pagkatapokan naggibo nin harong-harong dangan nag-erok duman. Dakula an saindang kaogmahan huli ta haloy nang dai sinda naggibo kaini; an huring paggibo ninda iyo kan panahon pa ni Josue na aking lalaki ni Nun.

¹⁸ Nagbasa sinda sa libro kan Katogonan nin Dios aroaldaw, poon sa enot na aldaw kan pyesta sagkod sa huring aldaw. Nagselebrar sinda sa laog nin pitong aldaw, asin sa ikawalong aldaw, nagtiripon sinda sa pagtapos kan pyesta, siring sa ipinagboot kan Katogonan.