Nehemias 6 - Marahay na Bareta Biblia

Mga Plano Laban ki Nehemias

¹ Nabaretaan ni Sanballat, ni Tobias, ni Gesem na Arab, asin kan gabos nyamong kaiwal na natapos mi na an paghirahay kan kudal saka mayo na ini nin mga labot, maski dai pa nyamo ikinabugtak an mga trangkahan.

² Kaya nagpadara sako nin mensahe si Sanballat saka si Gesem na hampangon ko sinda sa saro kan mga baryo duman sa Kapantayan nin Ono. Alagad maraot an plano ninda para sako.

³ May mga sinugo ako tanganing sabihan sinda, “Mahalaga an trabaho ko asin dai ako makakadiyan. Dai ko pwedeng ontokon an trabaho tangani sanang maghale asin makihampangan saindo.”

⁴ Apat na beses sindang nagpadara sako nin parehong mensahe, asin pareho man an simbag ko sainda.

⁵ Dangan nagsugo si Sanballat nin saro kan saiyang mga sorogoon, dara an ikalimang mensahe na nasa porma nin sarong bukas na surat,

^6-7 na iyo ini an laog: “Ipinag-oosip sa kataraed na nasyon asin sinasabi man ni Gesem na ika saka an mga Judio boot magrebelde, kaya hinihirahay nindo an kudal. Ibinareta man na boot mong magin hade, asin nagbugtak ka nin mga propeta na mapahayag sa Jerusalem na ika an hade nin Juda. Makakaabot an baretang ini sa emperador kaya magdigdi ka asin pag-olayan nyato an bagay na ini.”

⁸ Pinadarahan ko siya kan simbag na ini: “Bakong totoo an mga sinabi mo; gibo-gibo mo sana an gabos na iyan.”

⁹ Boot sana ninda kaming takoton tanganing maontok an trabaho. Dangan namibi ako, “O Dios, pakosoga man ako!”

¹⁰ Kan panahon na iyan, dinalaw ko si Semaias, na aking lalaki ni Delaias saka makoapo ni Mehetabel, na dai kaidto pwedeng maghale sa saiyang harong. Sinabihan niya ako, “Kaipuhan magtago kita sa Banal na Lugar kan Templo asin baratan ta an mga pintoan, huli ta madigdi sinda tanganing gadanon ka. Maabot sinda sa banggi tanganing gadanon ka!”

¹¹ Nagsimbag ako, “Bako ako an tawong basta na sanang minadulag asin minatago. Dai ako malaog sa Templo tanganing iligtas sana an sakong buhay.”

¹² Kan paghorophoropon ko ini, nahiling ko na dai siya sinugo nin Dios. Nagpropesiya siya laban sako huli ta sinuholan siya ni Tobias saka ni Sanballat.

¹³ Binayadan siya ninda tanganing takoton ako asin magkasala; dangan raoton an ngaran ko asin sopogon ako.

¹⁴ Namibi ako, “O Dios, giromdoma an ginibo ni Tobias saka ni Sanballat, asin padusahan mo sinda. Giromdoma an babaeng propetang si Nodias asin an gabos na propetang naghingowang takoton ako.”

Natapos an Paghirahay kan Kudal

¹⁵ Pakatapos nin singkwenta y dos na aldaw nin pagtrabaho, natapos an bilog na kudal kan ikabeynte y singkong aldaw kan bulan nin Elul.

¹⁶ Kan maaraman ini kan gabos ming kaiwal sa mga kataraed na nasyon, nagkatarakot sinda gabos asin nagkasoropog, huli ta aram ninda na an trabaho nahaman sa tabang nin samuyang Dios.

¹⁷ Kan mga aldaw na idto, an mga lider na Judio saka si Tobias nagsusuratan.

¹⁸ Kadakul na taga Juda an nanumpa na maapil saiya huli ta manugang siya kan Judiong si Secanias, na aking lalaki ni Ara. Laen pa kaini naagom kan aki niyang si Jehohanan an aking babae ni Mesullam na aking lalaki ni Berekias.

¹⁹ Kadakul an nagtaram sako manongod kan mga karahayan na ginibo ni Tobias, dangan inosip man ninda saiya an gabos kong itinaram. Padagos siyang nagpadara nin mga surat sako tanganing takoton ako.