Nehemias 5 - Marahay na Bareta Biblia

Pang-aapi sa mga Dukha

¹ Dangan kadaklan kan mga tawo, babae saka lalaki, nagreklamo laban sa kapwa ninda mga Judio.

² May mga nagsarabi, “Darakula an samuyang mga pamilya, kaya kaipuhan makakua kami nin kakanon tanganing mabuhay.”

³ An iba nagsarabi, “Isinangra mi an samong mga oma, mga ubasan saka mga harong tanganing igwa kami nin kakanon asin dai kami magutom.”

⁴ Igwa man na nagsarabi, “Nangutang kami nin kwarta tanganing an samong oma saka mga ubasan mabuhisan mi sa hade.

⁵ An samong rasa pareho man kan rasa kan kapwa mi Judio; an samong mga aki pareho man kan saindang mga aki. Alagad napipiritan kaming ipaoripon an samong mga aki. An nagkapira ming aking babae ipinabakal na bilang mga oripon. Mayo kaming magiginibo kaini huli ta kinua na kan iba an samong mga oma saka mga ubasan.”

⁶ Naanggot ako kan madangog ko an mga inagrangay na ini.

⁷ Pinaghorophorop ko ini asin sinagwe ko an mga lider saka mga opisyal. Sinabihan ko sinda, “Inaapi nindo an saindong mga tugang!” Nag-apod ako nin sarong dakulang pagtiripon laban sainda,

⁸ dangan nagtaram ako, “Sagkod na kaya mi pa, tinutubos mi an kapwa ta Judio na nagpabarakal kan saindang sadiri sa mga dayuhan. Alagad ngunyan pinipirit nindo an sadiri nindong mga tugang na ipabakal an sadiri ninda sa saindo na kapwa ninda Judio!” Dai sinda naggirong asin dai nakasimbag nin anoman.

⁹ Dangan nagtaram ako, “Bakong marahay an ginigibo nindo. Dapat magkaigwa kamo nin pagkatakot sa Dios asin gibohon an matanos tanganing dai kita pagtuyatuyaon kan satong mga kaiwal na nasyon.

¹⁰ An satong mga tugang pinautang ko nin kwarta saka pagkakan; pinautang man sinda kan sakong mga kairiba asin mga sorogoon. Kaya lingawan na nyato an kaisipan nin pagsingil sa pautang.

¹¹ Patawada an gabos nindang utang saindo; iuli nindo ngunyan man sanang aldaw an saindang mga oma, mga ubasan, mga tatamnan nin oliba, mga harong, mga kwarta, trigo, arak, saka lana.”

¹² Nagsirimbag an mga lider, “Kukuyogon mi an sinabi mo. Iuuli mi an pagsadiri ninda asin dai mi na sisingilon an samong mga pautang.” Inapod ko an mga padi asin pinasumpa an mga lider sa atubang ninda tanganing otobon ninda an saindang panuga.

¹³ Dangan pinagpag ko an sakong gubing, saka nagsabi ako, “Pagpagon logod nin Dios siring kaini an siisay man na dai mag-otob kan saiyang panuga. Kuahon logod nin Dios an saindong mga harong asin an gabos nindong pagsadiri, dangan mayo nin matada saindo.” An gabos na nagtiripon nagsimbag nin “Amen!” asin nag-omaw sa Kagurangnan. Dangan inotob kan mga lider an saindang panuga.

An Pagkamatinao ni Nehemias

¹⁴ Sa bilog na doseng taon kan sakong pagigin gobernador sa daga nin Juda, magpoon kan ikabeynte sagkod sa ikatreynta y dos na taon kan pagigin emperador ni Artajerjes, ako asin an sakong kadugo dai nagkakan kan kakanon na talaan para sako bilang gobernador.

¹⁵ An mga gobernador na nagkaerenot sako nagbugtak nin magabat na pasanon sa mga tawo asin naghagad sinda nin kakanon saka arak, laen pa kan kwarentang kwartang plata sa sarong aldaw. Sagkod an saindang mga sorogoon nang-api man sa mga tawo. Alagad dai ko iyan ginibo, huli ta may pagkatakot ako sa Dios.

¹⁶ An bilog kong kosog ginamit ko sa paghirahay kan kudal asin mayo akong nakamtan na anoman na pagsadiri. An gabos kong sorogoon nagtarabang man sa paghirahay.

¹⁷ Syento singkwentang mga Judio saka mga lider an danay kong pinakakan, laen pa kan mga tawo na nagdolok sako hale sa mga nasyon sa palibot.

¹⁸ Aroaldaw nag-andam ako nin sarong baka, anom na piling karnero asin dakol na manok; lambang sampolong aldaw, nagtatao ako nin dakul na arak. Aram ko an gabat na pinapasan kan mga tawo, kaya dai ko inako an pagkakan na talaan sako bilang gobernador.

¹⁹ O Dios, namimibi ako, na para sa karahayan ko, giromdomon mo an gabos na ginibo ko para sa banwaan na ini.