Mikas 6 - Marahay na Bareta Biblia

An Reklamo nin Kagurangnan Laban sa Israel

¹ Dangoga an reklamo nin Kagurangnan laban sa Israel. Pagbangon, O Kagurangnan, asin pahayagan an saimong reklamo; padangoga an kabukidan saka kabubuldan kan sasabihon mo.

² Kamong mga bukid, asin kamo na nagdadanay na mga pundasyon kan daga; dangoga nindo an reklamo nin Kagurangnan. An Kagurangnan igwa nin reklamo laban sa saiyang banwaan. Sasangatan niya nin kaso an Israel.

³ Nagtataram an Kagurangnan, “Banwaan ko, ano an ginibo ko saimo? Paano ako nagin sarong pagabat saimo? Simbaga ako!

⁴ Ako an nagluwas saimo sa Egipto; ilinigtas taka sa kaoripnan; ako an nagsugo ki Moises, ki Aaron saka ki Miriam tanganing pangenotan ka.

⁵ Banwaan ko, giromdoma an plano ni Hadeng Balak nin Moab sa saimo asin kun paano siya sinimbag ni Balaam na aking lalaki ni Beor. Giromdoma an mga pangyayari sa dalan magpoon sa kampo sa Sittim sagkod sa Gilgal. Giromdoma an mga bagay na ini asin maaaraman mo kun ano an ginibo ko tanganing iligtas ka.”

An Hinahagad nin Kagurangnan

⁶ Ano an dadarahon ko sa Kagurangnan, an Dios nin langit, sa pagdolok ko tanganing sambahon siya? Magdadara daw ako kan pinakamarahay na mga ogbon na baka na tututongon bilang mga dolot saiya?

⁷ Mawiwili daw an Kagurangnan kun darahan ko siya nin rinibong karnero o lana nin oliba na daing ontok sa pagbulos? Idodolot ko daw an matua kong aki tanganing mabayadan an sakong mga kasalan?

⁸ Dai, sinabihan na kita nin Kagurangnan kun ano an marahay. An hinahagad niya sato iyo ini: an paggibo kan matanos, an danay na mamoot, asin an mamuhay na mapakumbaba sa kaibahan nin satong Dios.

⁹ Marahay an magkaigwa nin takot sa Kagurangnan. Nag-aapod siya sa syudad, “Pagdangog kamo na mga tawong nagtitiripon sa syudad!

¹⁰ Sa mga harong nin mga maraot na tawo makukua an kayamanan na napasainda huli sa pandadaya. Naggagamit sinda nin mga salang takadan, sarong gibo na ikinakaongis ko.

¹¹ Paano ko mapapatawad an mga tawong naggagamit nin salang takadan saka timbangan?

¹² An saimong mga mayaman na namamanwaan nang-aapi sa mga dukha asin gabos sinda putikon.

¹³ Kaya pinoonan ko na an pagrumpag saka pagraot saimo huli kan mga kasalan mo.

¹⁴ Makakan ka alagad dai mababasog—sa katotoohan padagos kang magugutom. Magsasaray ka, alagad dai mo iyan mapapakinabangan; an anoman na saimong sarayon raraoton ko sa gera.

¹⁵ Magtatanom ka, alagad dai ka mag-aani. Magpupuga ka nin mga oliba tanganing makakua nin lana, alagad dai mo man iyan magagamit. Magibo ka nin arak, alagad dai mo man iyan maiinom.

¹⁶ Mangyayari iyan huli ta sinunod mo an mga maraot na gawe ni Hadeng Omri asin kan aki niyang si Ahab. Pinapadagos mo an saindang mga pagboot, kaya dadarahan taka nin karatan, asin pagngingisihan ka kan gabos. Pag-oolog-ologon ka kan mga tawo saen man na lugar.”