Mga Talinhaga 8 - Marahay na Bareta Biblia

Pag-omaw sa Kadonongan

¹ Hinanyoga an pag-apod kan kadonongan asin an pagkurahaw kan pakasabot.

² Nagtitindog an kadonongan sa alitoktok kan kabubuldan sa may tinampo, asin sa mga pinagsasangahan kan dalan.

³ Sa may palaog kan syudad, sa kataed kan mga trangkahan, nag-aapod an kadonongan:

⁴ “O mga tawo, inaapodan ko kamo! Inaapodan ko an lambang tawo sa kinaban.

⁵ Kamong mga mangmang, saboton nindo an marahay na hatol; kamong mga lolong, adalan nindo an marahay na kaisipan.

⁶ Paghinanyog kamo, huli ta mahalagang bagay an itinataram ko; an gabos kong sinasabi saindo matanos.

⁷ Katotoohan an sinasabi ko; an kaputikan ikinakauyam ko.

⁸ An lambang tataramon ko totoo; mayo ini nin sala, mayo nin minadara sa maraot.

⁹ Malinaw ini para sa tawong may pakasabot; sa madonong, tama ini gabos.

¹⁰ Pilion nindo an sakong katukdoan embes na plata; an pakasabot ki sa pinong bulawan.

¹¹ “Ako, an kadonongan, orog na marahay ki sa mga alahas; mayo kamo nin mamawoton na pwedeng ikapantay sako.

¹² Ako, an kadonongan, igwa nin pakasabot; igwa ako nin pakaaram saka marahay na hatol.

¹³ An pagkatakot sa Kagurangnan iyo an pagkaongis sa karatan; ikinakaongis ko an kapalangkawan asin an kapaabaw-abawan, an mga karatan saka an mga bikong tataramon.

¹⁴ Minaplano ako saka ginigibo ko iyan. Igwa ako nin pakasabot asin kosog.

¹⁵ Tinatabangan ko an mga hade sa saindang mga palakaw asin an mga pamayo sa paggibo nin tamang mga pagboot.

¹⁶ An lambang pamayo sa kinaban namamahala huli kan sakong tabang, siring man an mga gobernador saka an mga ginagalangan na tawo.

¹⁷ Namomotan ko an namomoot sako; an naghahanap sako nakakanumpong sako.

¹⁸ Yaon sako an kayamanan asin an kaomawan, nagdadanay na kayamanan asin kauswagan.

¹⁹ An bunga ko mas marahay ki sa bulawan, mas marahay ki sa pinong bulawan, mas marahay ki sa pinakapiling plata.

²⁰ Naglalakaw ako sa dalan nin katanosan; sinusunod ko an mga agihan nin hustisya.

²¹ Tinatawan ko nin kayamanan an mga namomoot sako; pinapano ko nin kayamanan an saindang harong.

²² “Ako an enot na linalang nin Kagurangnan, an enot sa mga ginibo niya kaidtong panahon.

²³ Linalang niya ako sa kapinonan, sa kaenot-enote, bago nagpoon an kinaban.

²⁴ Namundag ako kan mayo pa an kadagatan, kan mayo pa an mga burabod nin tubig.

²⁵ Namundag ako bago an kabukidan, bago ibinugtak sa tamang lugar an kabubuldan,

²⁶ bago ginibo nin Dios an daga asin an kaomahan kaiyan; enot ako maski sa naenot na alpog kan kinaban.

²⁷ Idtoon ako duman kan lalangon niya an kalangitan, kan palibotan niya nin orisonte an ibabaw kan dagat.

²⁸ Idtoon ako kan an mga panganoron ibinugtak niya sa langit, kan bukasan niya an mga burabod kan kairaroman,

²⁹ kan itao niya sa dagat an pagdolonan kaiyan, tanganing an katubigan dai maglapas sa saiyang pagboot, kan ibugtak niya an pundasyon kan daga.

³⁰ Nasa kataed niya ako, arog sa sarong arkitekto. Ako an kaogmahan niya aroaldaw, asin sa atubang niya, ako danay na nag-oogma—

³¹ nag-oogma sa saiyang kinaban, asin nawiwili sa katawohan.

³² “Kaya ngunyan, mga aki ko, hinanyoga nindo ako. Giboha nindo an sinasabi ko, asin magigin maogma kamo.

³³ Maghinanyog kamo sa katukdoan, asin magigin madonong kamo; dai nindo pagpabayaan an katukdoan.

³⁴ Paladan an tawong naghihinanyog sako, na aroaldaw nagbabantay sa sakuyang mga trangkahan, na naghahalat sa may pintoan kan sakong harong.

³⁵ Huli ta an nakakakua sako, nakakakua nin buhay, asin nawiwilihan siya nin Kagurangnan.

³⁶ An dai nakakakua sako, nagkukulog sa sadiri; an naoongis sako, namomoot sa kagadanan.”