Mga Talinhaga 6 - Marahay na Bareta Biblia

Dagdag na mga Patanid

¹ Aki ko, kun ika nanuga na magbabayad kan utang nin iba,

² magagakodan ka kan sadiri mong tataramon, masisiod ka kan sadiri mong panuga.

³ Kun siring, aki ko, mapapairarom ka sa kapangyarihan niya, alagad ini an paagi tanganing makatalingkas ka diyan: magduman ka tolos saiya asin makiolay ka na talingkasan ka niya sa ginibo mong panuga.

⁴ Dai ka magkatorog ni mag-ontok tanganing magpahingalo;

⁵ iligtas mo an saimong sadiri arog kan gamgam o kan usang nagdudulag sa paraayam.

⁶ Tawong hugakon, hilinga an mga tanga; masdan mo an saindang pamumuhay asin magin madonong ka.

⁷ Mayo sinda nin lider, opisyal o pamayo,

⁸ alagad nagtitipon sinda nin kakanon kun tig-init; nag-aandam sinda para sa tiglipot.

⁹ Sagkod nuarin ka maghihigda, o tawong hugakon? Nuarin ka mabangon sa saimong pagkakatorog?

¹⁰ Kadikit na pagkatorog, kadikit na pagtungka, kadikit na pagkurumo sa pagpahingalo,

¹¹ asin masalakay saimo an kadukhaan siring sa armadong mahabon.

¹² An sarong mayong halaga asin maraot na tawo minalibot sa pagpalakop nin mga kaputikan.

¹³ Minakimlat siya kan mata saka minapasabot sa paagi kan mga bitis saka mga muro niya tanganing madaya ka.

¹⁴ Karatan an nasa laog kan madaya niyang puso; maski saen, siya an nagpopoon nin iriwal.

¹⁵ Huli kaini, biglang maabot saiya an kapahamakan, asin an lugad na makukua niya dai nanggad mabobolong.

^16-19 Pitong bagay an ikinakaongis asin ikinakauyam nin Kagurangnan: An kapaabaw-abawan, an putikon na dila, an mga paragadan nin mga tawong mayo nin sala, an puso na nagmumukna nin mga maraot na plano, an mga bitis na naghihidali sa paggibo nin karatan, an saksi na nagpuputik, asin an tawong dahelan nin pag-iriwal kan mga magkaratood.

Patanid Laban sa Pakidorog sa Bakong Agom

²⁰ Aki ko, sunodon mo an pagboot kan saimong ama, asin dai mo ipagsikwal an itinukdo kan saimong ina.

²¹ Danay na rimposon mo iyan sa saimong puso.

²² An saindang katukdoan iyo an mangengenot saimo kun ika maglakaw, an magbabantay saimo kun banggi, asin an maghuhulit saimo kun aldaw.

²³ Huli ta an togon sarong ilaw asin an katukdoan sarong liwanag, saka an mga pagsagwe mga dalan nin buhay.

²⁴ Ililikay ka kaini sa maraot na babae, sa mahamis na dila kan agom nin ibang lalaki.

²⁵ Dai ka magpadagka sa saiyang gayon, ni magpasiod sa saiyang mapandagkang mga mata.

²⁶ Matatandanan nin lalaki an sarong maraot na babae sa halaga nin sarong tinapay, alagad an pakidorog sa bakong agom katimbang kan saiyang buhay.

²⁷ Makikilik daw nin sarong tawo an kalayo na dai masulo an saiyang gubing?

²⁸ Makakalakaw daw siya sa ibabaw kan mga baga na dai mapaso an mga bitis niya?

²⁹ Siring kaiyan an pagdorog sa agom nin ibang lalaki; an siisay man na minagibo kaiyan magtitios.

³⁰ Bakong ikinakaongis an sarong mahabon na naghabon nin kakanon, maski pa siya nagugutom?

³¹ Kun siya madakop, magbabayad siya nin pitong beses; ibabayad niya an gabos niyang rogaring.

³² An nakikidorog sa bakong agom mayo nin marahay na kaisipan; rinaraot man sana niya an saiyang sadiri.

³³ Mga lugad asin pagkawara nin onra an saiyang makukua; sagkod pa man dai mahahale an saiyang kasosopgan.

³⁴ An pag-imon iyo an nakakapaanggot sa sarong agom na lalaki; mayo nin kasagkoran an saiyang pagbalos.

³⁵ Dai siya maako nin anoman na bayad, ni mahahale an saiyang kaanggotan huli sa mga regalo.