Mga Talinhaga 30 - Marahay na Bareta Biblia

An mga Tataramon ni Agur

¹ Iyo ini an mga tataramon ni Agur na aking lalaki ni Jake: “Dai ko kaibahan an Dios, asin mayo ako nin magiginibo.

² Saro akong mangmang, dai maninigo na magin tawo; maski kaisipan nin tawo, mayo ako.

³ Mayo ako nin nanodan na kadonongan, mayo ako nin naaaraman manongod sa Dios.

⁴ Siisay an nagsakat sa langit dangan naghilig? Siisay an nakapugol kan doros sa saiyang mga kamot? Siisay an nakapatos kan katubigan sa sarong pedaso nin tela? Siisay an nagbugtak kan mga pagdolonan kan kinaban? Siisay siya, kun aram mo? Siisay an saiyang aking lalaki?

⁵ “Inootob nin Dios an lambang panuga na saiyang ginibo. Siya an kalasag kan gabos na nagpapaili saiya.

⁶ Dai mo pagdugangan an saiyang mga tataramon, ta tibaad tuyawon ka niya dangan ipahiling niya na saro kang putikon.”

Dagdag na mga Talinhaga

⁷ O Dios, duwang bagay an hahagadon ko saimo bago ako magadan:

⁸ dai mo ako pagpabayaan na magin putikon asin dai mo ako pagpayamanon o pagin dukhaon. Itao mo sako an maninigo ko sanang kakanon.

⁹ Kun ako magyaman tibaad makapagsabi ako na dai taka kaipuhan. Alagad kun ako magin dukha, tibaad manghabon ako asin matawan ko nin kasosopgan an sakong Dios.

¹⁰ Dai mo pagpakaraoton an sarong sorogoon sa saiyang kagurangnan. Tibaad maldisyonon ka niya saka pabayadon huli kan ginibo mo.

¹¹ Igwa nin mga tawo na minamaldisyon sa saindang ama asin dai minaomaw sa saindang ina.

¹² Igwa nin mga tawo na naghohona na sinda malinig, alagad dai man ninda nalilinig an saindang ati.

¹³ Igwa nin mga tawo na mapaabaw-abaw—naghohona sinda na sinda marahay.

¹⁴ Igwa nin mga tawo na makuring nagbebentahe sa dukha asin sa daing sukat; sa paaging iyan sinda nabubuhay.

¹⁵ An linta igwa nin duwang aking babae, asin pareho sinda may ngaran na “Tawan mo ako!” Igwa nin apat na bagay na dai nakokontento:

¹⁶ An kinaban kan mga gadan, an babaeng mayong aki, an alang na daga na nangangaipo nin uran, asin an kalayo na nagkakaraba.

¹⁷ An siisay man na nag-oolog-olog sa saiyang ama o nagsisikwal sa saiyang ina sa paggurang kan mga ini dapat na ipakakan sa mga bwitre o ipatuka an mga mata sa mga uwak.

¹⁸ Igwa nin apat na bagay na makangangalas asin dai ko nasasabotan:

¹⁹ an agila na naglalayog sa kalangitan, an halas na nagkakanap sa ibabaw nin gapo, an barko na naglalayag sa kadagatan, asin an lalaki saka babae na nagkakaminootan.

²⁰ Siring kaini an ginigibo kan babaeng nagpapasambay: nakikidorog siya sa lalaki, minakarigos, dangan minasabi, “Mayo ako nin ginibong maraot!”

²¹ Igwa nin apat na bagay na dai matitios kan kinaban:

²² an oripon na nagin hade, an lolong na igwa kan boot niyang kakanon,

²³ an makauuyam na babae na naagom, asin an sorogoon na babae na nakasalihid sa saiyang kagurangnan na babae.

²⁴ Sa kinaban igwa nin apat na saradit na hayop, alagad madonong nin marahay:

²⁵ An mga tanga: maluluya sinda, alagad sinasaray ninda an saindang kakanon kun tig-init.

²⁶ An mga kuneho: bako sinda makosog, alagad ginigibo ninda an saindang mga harong sa kagapoan.

²⁷ An mga doron: mayo sinda nin hade, alagad nag-iiribahan sinda sa paglakaw.

²⁸ An mga tagaw: pwede mong kapotan, alagad mahihiling mo sinda sa mga palasyo.

²⁹ Igwa nin apat na bagay na magayon pagmasdan mantang naglalakaw:

³⁰ an leon, an pinakamakosog sa gabos na hayop asin dai natatakot sa kiisay man;

³¹ an kanding, an mabaskog na solog na manok, asin an mga hade sa atubang kan saindang nasasakopan.

³² Kun sa kalolongan mo nagin mapaabaw-abaw ka, asin nagpaplano ka nin maraot, mag-ontok ka saka maghorophorop!

³³ Kun magbate ka nin gatas, magkakaigwa ka nin mantikilya. Kun suntokon mo an dungo kan saimong kapwa, madugo iyan. Kun paanggoton mo an saimong kapwa, mapapahamak ka.