Mga Talinhaga 3 - Marahay na Bareta Biblia

Hatol sa mga Hoben na Lalaki

¹ Aki ko, hare paglingawe an katukdoan ko, kundi tagoon mo iyan sa puso mo an mga pagboot ko.

² An katukdoan ko matao saimo nin halawig na buhay asin mauswag na pamumuhay.

³ Padanaya saimo an kaimbodan; ikulintas mo iyan sa saimong liog asin isurat sa saimong puso.

⁴ Kun gibohon mo iyan, mawiwili saimo an Dios asin magigin marahay an saimong ngaran sa mata nin tawo.

⁵ Manarig ka sa Kagurangnan sa bilog mong puso, asin dai ka magsarig sa sadiri mong kadonongan.

⁶ Giromdoma siya sa gabos mong gibo, asin an tamang dalan itutukdo niya saimo.

⁷ Dai mo ipaghambog an saimong kadonongan; matakot ka sa Kagurangnan, asin likayan mo an karatan.

⁸ Huli ta iyan magigin bolong kan saimong laman asin kaginhawahan kan saimong mga tolang.

⁹ Tawe nin kaomawan an Kagurangnan sa paagi nin pagdolot saiya kan pinakamarahay na bunga kan saimong daga.

¹⁰ Dangan an mga harong-harong mo magkakaparano nin inani, asin an mga lalagan mo nin arak magsusupay.

¹¹ Aki ko, dai mo ipagsikwal an pagdisiplina saimo kan Kagurangnan, o mauyam sa saiyang pagsagwe.

¹² Huli ta dinidisiplina nin Kagurangnan an saiyang namomotan, arog kan pagdisiplina nin sarong ama sa saiyang aking nawiwilihan.

¹³ Paladan an tawong nakakakua nin kadonongan asin an tawong nagkakamit nin pakasabot.

¹⁴ Huli ta an pakinabang hale digdi orog pa ki sa pakinabang na hale sa plata; mas mahalaga iyan ki sa bulawan.

¹⁵ An kadonongan mas mahalaga ki sa mga alahas, asin an ano man na saimong mawoton dai pwedeng ipantay diyan.

¹⁶ Idinodolot nin kadonongan an halawig na buhay, na may kaibang kayamanan asin kaomawan.

¹⁷ Magayagayang buhay an itinatao nin kadonongan asin matoninong ka niyang gigiyahan.

¹⁸ An kadonongan sarong kahoy nin buhay para sa mga namumugol saiya; an mga namumugol saiya nin maigot inaapod na paladan.

¹⁹ Huli sa kadonongan, linalang nin Dios an daga; huli sa pakasabot, pinamugtak niya an langit.

²⁰ Huli kan saiyang pakaaram, nagbubulos an mga salog, asin nagtatao nin uran sa daga an mga panganoron.

²¹ Aki ko, mamugol ka sa saimong kadonongan asin pakaaram. Dai mo pagpabayaan na mawara sinda saimo.

²² Tatawan ka ninda nin buhay—sarong magayagaya saka maogmang buhay.

²³ Dangan maglalakaw ka nin matiwasay asin dai ka nanggad masisingkog.

²⁴ Kun ika maghigda, dai ka matatakot; matoninong kang matotorog kun banggi.

²⁵ An mga kasakitan na biglang minaabot dai mo dapat ikahandal, na arog sa bagyong minaabot sa tampalasan.

²⁶ Huli ta an Kagurangnan iyo an mag-iingat saimo. Dai niya itutugot na mahulog ka sa sarong siod.

²⁷ Dai mo ipagsayuma an karahayan sa tawong nangangaipo kaiyan, kun makakaya mong gibohon iyan.

²⁸ Dai ka nanggad magsabi sa saimong kapwa na maghalat sagkod sa sunod na aldaw, kun makakaya mong tabangan siya ngunyan.

²⁹ Dai ka magplano nin maraot laban sa saimong kapwa, na nag-eerok sa kataed mo asin nananarig saimo.

³⁰ Dai ka makiiwal sa sarong tawo na mayo man nin dahelan, kun mayo man siya nin ginibo saimong karatan.

³¹ Dai ka maori sa madahas na tawo o mag-isip na arogon an saiyang gibo.

³² Huli ta ikinakaongis nin Kagurangnan an tawong naggigibo nin karatan, alagad an mga tawong matanos saiyang inaataman.

³³ An maldisyon nin Kagurangnan yaon sa harong kan maraot, alagad benebendisyonan niya an erokan kan matanos.

³⁴ An mga mapaabaw-abaw dai pinapahalagahan nin Kagurangnan, alagad an mga mapakumbaba saiyang naheherakan.

³⁵ An madonong magmamana nin kaomawan, alagad kasosopgan an makukua kan mga lolong.