Mga Talinhaga 29 - Marahay na Bareta Biblia

¹ An tawong habong magdangog kun sinasaway, mahuhulog asin dai na makakabangon pag-abot kan panahon.

² Kun an matanos iyo an nagkakapot kan kapangyarihan, nag-oogma an banwaan; alagad kun an maraot iyo an namamayo, nag-aagrangay an katawohan.

³ An namomoot sa kadonongan minapaogma kan saiyang ama; alagad an nakikiiba sa mga babaeng maraot nagtatapok kan saiyang kabuhayan.

⁴ Kun may pagmakulog an hade sa hustisya, nagigin pusog an nasyon; alagad kun kwarta sana an saiyang pinagmamakulogan, raraoton niya an saiyang banwaan.

⁵ An tawong sagin-sagin na nag-oomaw sa saiyang mga katood, nagbubugtak nin litag para sa saiya man sana.

⁶ An maraot nadadakop sa sadiring kasalan, mantang an matanos nag-aawit asin nag-oogma.

⁷ Minimidbid kan matanos an deretso kan dukha, alagad dai iyan nasasabotan kan mga maraot.

⁸ An mapaabaw-abaw minaparibok kan bilog na banwaan, alagad pinapara kan mga madonong an kaanggotan.

⁹ Kun an madonong makipagdiskutiran sa sarong lolong, pagngingisihan sana siya kaini asin pag-oolog-ologon.

¹⁰ Ikinakaongis kan mga madahas an tawong onesto, alagad susurogon kan matanos an siring na tawo.

¹¹ Hayag kun maanggot an mangmang, alagad mayong girong na pinupugol kan madonong an saiyang kaanggotan.

¹² Kun an sarong pamayo maghinanyog sa kaputikan, magigin putikon an gabos niyang opisyal.

¹³ Magkapareho sa sarong bagay an dukha asin an nang-aapi—pareho sinda tinawan kan Kagurangnan nin pakahiling.

¹⁴ Kun sinusurog kan hade an deretso kan dukha, maghahade siya sa halawig na panahon.

¹⁵ An pagsaway asin pagdisiplina marahay para sa aki. Alagad kun siya pabayaan sa saiyang kamawotan, ikakasopog siya kan saiyang ina.

¹⁶ Kun an maraot iyo an nagkakapot nin kapangyarihan, nagdadakul an krimen. Alagad mahihiling kan mga matanos an pagbagsak kan mga tawong iyan.

¹⁷ Disiplinahon mo an saimong aki, asin tatawan ka niya nin kapahingaloan. An saimong puso tatawan niya nin kaogmahan.

¹⁸ An nasyon na mayo kan pangenot nin Dios, sarong nasyon na mayo nin katoninongan. Paladan an tawo na nag-ootob kan katogonan!

¹⁹ Dai mo pagdisiplinahon an saimong sorogoon sa paagi nin tataramon, huli ta maski masabotan niya iyan, dai niya iyan ootobon.

²⁰ Mas may paglaom an sarong mangmang ki sa tawong basta na sana minataram.

²¹ Kun magpoon sa pagkaaki itao mo sa saimong sorogoon an gabos niyang magustohan, maabot an panahon na mapapasaiya an gabos mong nasasadirihan.

²² An tawong madaling maanggot iyo an nagigin dahelan nin dakul na pag-iriwal asin karibokan.

²³ An mabagsak sa tawo iyo an saiyang kapaabaw-abawan, alagad an mapakumbaba mag-aako nin kaomawan.

²⁴ An kaiba kan mahabon naoongis sa sadiri niyang buhay huli ta papadusahan siya kan hukom kun magsabi siya kan katotoohan, asin mamaldisyonon siya nin Dios kun dai niya gibohon iyan.

²⁵ An pagkatakot sa sasabihon kan ibang tawo iyo an mapahamak saimo, alagad an pagsarig sa Kagurangnan iyo an maligtas saimo.

²⁶ Dakul an nagmamawot na mawilihan sinda kan hade, alagad sa Kagurangnan sana pwede kang makakua nin hustisya.

²⁷ An tampalasan ikinakaongis kan matanos, asin an matanos ikinakaongis kan tampalasan.