Mga Talinhaga 22 - Marahay na Bareta Biblia

¹ Mas marahay na pilion an malinig na ngaran ki sa dakul na kayamanan.

² An mayaman saka an dukha parehong linalang nin Kagurangnan.

³ Nahihiling kan madonong an nagdadangadang na pag-alaman, asin minaingat siya; alagad dai iyan naririparo kan mangmang kaya nahuhulog siya sa kapahamakan.

⁴ An balos sa kapakumbabaan asin pagkatakot sa Kagurangnan iyo an kayamanan, kaomawan, saka buhay.

⁵ Mga tonok saka mga siod an nasa dalan kan tampalasan; an namomoot sa sadiri minalikay sa mga iyan.

⁶ Tukdoan mo an aki kun paano siya mamuhay, asin dai niya iyan malilingawan sa bilog niyang buhay.

⁷ An dukha oripon kan mayaman, asin an parautang oripon kan pinagkautangan.

⁸ Kun nagtanom ka nin inhustisya mag-aani ka nin kapahamakan, asin matatapos an pang-aapi mo sa iba.

⁹ Magin matinao ka asin hirasan mo an dukha kan saimong kakanon. Huli kaiyan bebendisyonan ka.

¹⁰ Palayasa an mahambog, asin mahahale man an diriskutiran, iriwal, sagkod an baransagan.

¹¹ An tawong dalisay an puso saka magalang sa pagtaram magigin katood kan hade.

¹² Binabantayan nin Kagurangnan an katotoohan, alagad dai niya pinapangyari an mga tataramon kan mga putikon.

¹³ An hugakon habong magluwas sa harong asin an idinadahelan iyo na tibaad gadanon siya sa luwas kan leon.

¹⁴ Sarong siod an pakidorog sa bakong tunay na agom—dinadakop kaiyan an mga tawong ikinakaongis nin Kagurangnan.

¹⁵ Natural sa aki an pagigin pilyo alagad sa paagi kan hampak makakanood siyang maggibo nin marahay.

¹⁶ An nagreregalo sa mayaman, o an nag-aapi sa dukha tanganing magyaman magigin dukha man.

An Treyntang Kasabihan

¹⁷ Paghinanyog asin tutukdoan taka kan mga tataramon kan mga madonong. Adalan mo an saindang mga katukdoan,

¹⁸ asin maoogma ka kun magiromdoman mo saka masambit an mga iyan.

¹⁹ Boot kong manarig ka sa Kagurangnan, kaya sasabihon ko iyan saimo ngunyan.

²⁰ Isinurat ko an treyntang kasabihan para saimo. An mga kasabihan na ini pano nin pakaaram saka marahay na hatol,

²¹ asin magtutukdo saimo kan katotoohan. Dangan kun ika sugoon sa pagsiyasat kan katotoohan, igwa ka nin ikakasimbag sa pagbalik mo.

-1-

²² Dai mo paghabonan an dukha huli ta siya dukha, o pag-apihon an mayong sukat sa atubang kan hukoman.

²³ Susurogon sinda nin Kagurangnan, asin hohomaan niya an buhay nin siisay man na naghohoma kan buhay ninda.

-2-

²⁴ Dai ka makipagkatood sa mga tawong mainit an payo.

²⁵ Tibaad manodan mo an saindang gawe asin masakit na para saimo an magbago.

-3-

²⁶ Dai ka manuga para sa utang nin iba.

²⁷ Kun dai ka makabayad, kukuahon ninda maski an saimong higdaan.

-4-

²⁸ Dai mo paghiroon an suanoy na muhon na ibinugtak kan saimong mga ginikanan.

-5-

²⁹ Itukdo mo sako an tawong marahay magtrabaho, asin itutukdo ko man saimo an tawong orog karahay sa gabos saka maninigo sa kaibahan kan mga hade.