Mga Talinhaga 21 - Marahay na Bareta Biblia

¹ An isip kan hade sarong sapa nin tubig sa kamot nin Kagurangnan; siya an nagboboot kan direksyon kaiyan.

² An paghona kan tawo tama an gabos niyang gibo, alagad an Kagurangnan an naghuhukom kan nasa saiyang puso.

³ An paggibo kan matanos asin hustisya orog na nawiwilihan nin Kagurangnan ki sa mga sakripisyo.

⁴ Pagkamoot sa sadiri asin kapaabaw-abawan—iyo an tanda kan maraot saka iyan kasalan.

⁵ An mga plano kan mahigos nagbubunga sa kaginhawahan, alagad an naghihidali matatapos sa kadukhaan.

⁶ An kayamanan na nakukua sa pandadaya sarong ambon na madaling mapara asin litag nin kagadanan.

⁷ Napapahamak an mga tampalasan huli kan sadiri nindang kadahasan; isinisikwal ninda an paggibo kan matanos.

⁸ Naglalakaw sa tikong dalan an tampalasan, alagad matanos an gawe kan mayong kasalan.

⁹ Mas marahay pang mag-erok sa sarong gilid sa ibabaw kan bubong kan harong ki sa laog kaini na an kaibahan sarong maribok na babae.

¹⁰ Danay na karatan na iniisip kan tampalasan; mayo siya nin pagkaherak sa kiisay man.

¹¹ Kun pinapadusahan an paraolog-olog, an mangmang nagigin madonong; kun tukdoan mo an madonong, minaorog an saiyang pakaaram.

¹² Aram kan banal na Dios an nangyayari sa laog kan harong kan mga maraot, asin dadarahon niya sinda sa kapahamakan.

¹³ An dai nagdadangog sa inagrangay nin dukha, mag-aagrangay man, alagad mayo saiya nin mahinanyog.

¹⁴ Hilom na regalohan mo an anggot saimo asin mahahale an saiyang kaanggotan.

¹⁵ Kun nangyayari an hustisya, naoogma an matanos, alagad namomondo an mga tawong naggigibo nin maraot.

¹⁶ An kagadanan naghahalat sa kiisay man na minaharayo sa dalan nin pakasabot.

¹⁷ An tawong maluho magigin dukha; an mahilig sa arak asin sa masiram na kakanon dai nanggad mayaman.

¹⁸ Minabalik sa tampalasan an kasakitan na saiyang pinaplano laban sa mga matanos.

¹⁹ Mas marahay pang mamuhay sa desyerto ki sa makiiba sa babaeng maribok saka mareneklamo.

²⁰ Nagdadanay an mahalagang kayamanan sa laog kan harong kan madonong, alagad madali sanang mawara an kwarta kan lolong.

²¹ An namumuhay na matanos saka maboot mahalawig an buhay asin oomawon.

²² Masasakop kan madonong na heneral an syudad na may makokosog na bantay, asin magagaba niya an mga kudal na saindang sinasarigan.

²³ Kun boot mong makalikay sa ribok, mag-ingat ka sa pagtaram.

²⁴ Itukdo mo sako an mahambog na tawo asin itutukdo ko man saimo an tawong mapaabaw-abaw, mapalangkaw saka dai nag-iisip kan karahayan nin iba.

²⁵ Ginagadan nin tawong hugakon an saiyang sadiri huli ta habo niyang magtrabaho;

²⁶ mayo siya nin ginigibo kundi an mag-isip dapit sa mga bagay na boot niyang mapasaiya. Alagad an matanos maogmang nakakapagtao.

²⁷ Ikinakauyam nin Kagurangnan an sakripisyo kan tampalasan, orog na kun an katuyohan kaini maraot.

²⁸ An patotoo nin putikon dai pinapaniwalaan, alagad inaako an tataramon kan tataong maghiling kan katotoohan.

²⁹ Midbid kan matanos an saiyang sadiri, alagad an tampalasan kaipuhan pang magsagin-sagin.

³⁰ An kadonongan, pakasabot asin hatol nin tawo dai makakatabang kun an Kagurangnan laban saimo.

³¹ Pwedeng iandam an mga kabayo para sa ralaban, alagad an Kagurangnan iyo an minatao nin kapangganahan.