Mga Talinhaga 20 - Marahay na Bareta Biblia

¹ An arak mayo nin karahayan na itinatao sa tawo; asin kamangmangan an magpakaburat sa arak.

² An kaanggotan nin hade garo ungal kan leon; an minapaanggot saiya nawawaraan kan sadiring buhay.

³ Kaomawan para sa tawo an paglikay sa iriwal; alagad an mga lolong mag-iiriwal.

⁴ An sarong paraoma na habong mag-arado sa tamang panahon mayo nin aanihon.

⁵ Arog sa tubig na hararom an kaisipan nin tawo, alagad malaladop iyan nin sarong madonong.

⁶ Dakul na tawo an nagpapahayag kan saindang kaimbodan, alagad may makukua pa daw na maimbod na tawo?

⁷ Paladan an mga aki na igwa nin ama na onesto saka matanos.

⁸ Kun an hade magtukaw sa paghukom, mayo nin karatan na makakalampas sa saiyang panhiling.

⁹ Siisay an makakasabi na malinig an saiyang puso, asin mayo siya nin kasalan?

¹⁰ Naoongisan nin Kagurangnan an mga tawong naggagamit nin may dayang timbangan saka sukolan.

¹¹ Maski an aki namimidbid huli sa saiyang gibo; maaaraman mo sa saiyang gibo kun siya marahay asin onesto.

¹² Parehong ginibo nin Kagurangnan an talingang nakakadangog saka an matang nakakahiling.

¹³ Kun uboson mo an saimong panahon sa pagkatorog, magigin dukha ka. Alagad magmahigos ka asin magkakaigwa ka nin dakul na kakanon.

¹⁴ Minasabi an parabakal, “Halangkaw an saimong presyo.” Alagad paghale niya, ipinaghahambog niya na nakabakal siya sa hababang presyo.

¹⁵ Kadakul kan bulawan asin kan mamahalon na mga bato, alagad an tataramon na may kadonongan sarong pambihirang kayamanan.

¹⁶ An tawong minaako kan utang nin iba, dapat na kuahan nin rogaring bilang garantiya.

¹⁷ An anoman na nakua sa daya garo masiram na kakanon para sa sarong tawo, alagad maabot an panahon na garo iyan baybay sa saiyang ngoso.

¹⁸ Maootob an mga plano kun may matanos na hatol; makigera kun igwa nin matanos na plano.

¹⁹ An tsismoso dai nakakatago nin sekreto. Maglikay sa tawong matabil.

²⁰ An magmaldisyon sa magurang, matatapos an buhay na garo pinalsok na ilawan sa kadikloman.

²¹ An kayamanan na dai pinagpagalan, kadikit an itataong karahayan.

²² Dai ka mag-isip na balosan nin maraot an maraot; halaton mo an Kagurangnan, asin tatabangan ka niya.

²³ Naoongisan nin Kagurangnan an mga tawong naggagamit nin salang timbangan asin sukolan.

²⁴ Itinalaan nin Kagurangnan an mga lakad kan tawo kaya paano masasabotan nin siisay man an dalan na saiyang linalakawan?

²⁵ Isipa ngona nin marahay bago ka manuga nin dolot sa Dios. Tibaad magbasol ka ngapit.

²⁶ Aram kan hadeng madonong an naggigibo nin karatan, asin mayo nin pagkaherak na papadusahan niya an siring na tawo.

²⁷ Tinawan kita kan Kagurangnan nin isip saka konsyensya, kaya dai ta madadaya an satong sadiri.

²⁸ Magdadanay na pusog an trono kan hade kun maghahade siya sa katotoohan, kaimbodan, asin sa katanosan.

²⁹ An kamurawayan kan mga hoben iyo an saindang kosog, alagad an kagayonan kan mga gurang iyo an saindang puting buhok.

³⁰ Kun minsan kaipuhan na makulogan an sarong tawo tanganing maaraman an sala niyang gibo.