Mga Talinhaga 2 - Marahay na Bareta Biblia

An mga Bunga nin Kadonongan

¹ Aki ko, akoon mo an gabos na itinukdo ko asin ingatan mo an mga pagboot ko.

² Paghinanyog sa kadonongan asin hingowahon mong masabotan iyan.

³ Kun maghagad ka nin pakaaram asin makimaherak nin pakasabot,

⁴ kun hanapon mo ini arog kan paghanap nin tawo sa plata asin hanapon iyan siring sa paghanap sa natatagong kayamanan—

⁵ dangan masasabotan mo kun ano an pagkatakot sa Kagurangnan, asin maaaraman mo an kahulogan kan pakamidbid sa Dios.

⁶ Huli ta an Kagurangnan iyo an nagtatao nin kadonongan; siya an nagtutukdo nin pakaaram asin pakasabot.

⁷ Siya an nagtatabang asin nag-iingat sa mga matanos saka onestong mga tawo.

⁸ Iniingatan niya an mga tawong marahay an pagtratar sa iba, asin binabantayan niya an mga maimbod saiya.

⁹ Kun maghinanyog ka sako, maaaraman mo kun ano an tama, matanos, saka dai nagpapalaen sa kapwa. Maaaraman mo kun ano an saimong gigibohon.

¹⁰ Magigin madonong ka, asin an saimong pakaaram iyo an matao saimo nin kaogmahan.

¹¹ An pakaaram iyo an mag-iingat saimo; an pakasabot iyo an mabantay saimo.

¹² Ililigtas ka niya sa maraot na gawe, sa mga tawong nagpaparibok huli kan saindang itinataram—

¹³ mga tawong nagbabaya kan matanos na pamumuhay tanganing mamuhay sa kadikloman nin kasalan,

¹⁴ mga tawong naoogma sa paggibo nin maraot asin naggagayagaya sa bikong gibo,

¹⁵ mga tawong dai mapapaniwalaan asin mapapanarigan.

¹⁶ Makakalikay ka sa maraot na babae na madagka saimo huli kan saiyang mahamis na mga tataramon,

¹⁷ na bakong maimbod sa sadiri niyang agom, asin nakakalingaw kan saiyang banal na panuga.

¹⁸ Kun magduman ka sa saiyang harong, maglalakaw ka sa dalan pasiring sa kagadanan. An pagduman sa saiyang harong nangangahulogan nin pagharani sa kinaban kan mga gadan.

¹⁹ An minaduman saiya dai na nakakapuli; dai na nakakabalik sa dalan nin buhay.

²⁰ Kaya maglakaw ka sa dalan kan mga marahay na tawo, asin magdanay ka sa mga agihan kan mga matanos.

²¹ Huli ta an mga matanos iyo an mag-eerok sa dagang ini asin an mga tawong mayo nin digta an mabubuhay diyan.

²² Alagad an mga tampalasan mawawara sa daga asin an mga madaya magagabot arog sa mga tinanom diyan.