Mga Talinhaga 19 - Marahay na Bareta Biblia

¹ Mas marahay an magin dukha alagad matanos an pamumuhay, ki sa magin putikon na lolong.

² Bakong marahay para sa sarong tawo an mayo nin pakaaram; an naghihidali dai nakakakua kan dalan.

³ Huli sa kalolongan, rinaraot kan tawo an saiyang sadiri, dangan binabasol an Kagurangnan.

⁴ An mga mayaman padagos na nakakakua nin bagong mga katood, alagad an dukha binabayaan kan saiyang katood.

⁵ Dai mangyayari na dai mapadusahan an putikon na saksi; an nagpuputik dai makakadulag.

⁶ Kadakul an naghihingowa na makadolok sa haralangkaw na tawo; an lambang saro nagsasabing katood sinda kan mga tawong nagtatao nin karahayan.

⁷ An dukha ikinakaongis kan sadiri niyang mga tugang; kaya mayo siyang mga katood. Maski siya maghingowa, mayo siya nin makukuang katood.

⁸ An naghihingowang magin madonong, namomoot sa saiyang sadiri; an nagpapahalaga sa saiyang nanodan, magigin mauswag.

⁹ An putikon na saksi papadusahan asin an nagpuputik mapapahamak.

¹⁰ An luhong pamumuhay bakong angay sa lolong; orog nang bakong maninigo para sa sarong oripon na siya mamayo sa mga prinsipe.

¹¹ An marahay na pag-isip nin tawo iyo an minapugol kan saiyang kaanggotan; kamurawayan niya an magpasensya sa mga karatan na ginibo saiya.

¹² An kaanggotan kan hade garo ungal kan leon, alagad an saiyang karahayan garo ambon sa ibabaw kan doot.

¹³ An aking lolong nagdadara nin karatan sa saiyang ama. An madaldal na agom garo uran na dai nag-oontok.

¹⁴ Namamana sa mga magurang an harong asin kayamanan, alagad hale sa Kagurangnan an marahay na agom.

¹⁵ An hugakon minapakatorog sa tawo nin haloy, asin an tawong hugakon mayo nin kakakanon.

¹⁶ An nag-iingat kan mga togon nin Dios, nag-iingat kan sadiring buhay; an naoongis kan mga iyan magagadan.

¹⁷ Kun magtabang ka sa dukha, garo ka nagpapautang sa Kagurangnan, asin an Kagurangnan an mabayad saimo.

¹⁸ Disiplinahon mo an saimong aki mantang igwa pa nin panahon. Kun dai mo iyan gibohon, ika an nagtatabang saiya sa pagraot kan saiyang sadiri.

¹⁹ An tawong may dakulang kaanggotan magbabayad kan padusa; kun iligtas mo siya, gigibohon mo man sana giraray iyan.

²⁰ Hinanyogon mo an hatol asin akoon mo an katukdoan tanganing magkaigwa ka nin kadonongan sa maabot na panahon.

²¹ Kadakul kan mga plano nin sarong tawo, alagad an kabotan nin Kagurangnan an magdadanay.

²² Kaimbodan an hinahagad sa sarong tawo; mas marahay an sarong dukha ki sa sarong putikon.

²³ Matakot ka sa Kagurangnan asin mabubuhay ka sa halawig na panahon, na pano nin kapahingaloan saka ligtas sa kapahamakan.

²⁴ Mapagal para sa sarong hugakon maski an paghungit kan saiyang kakanon.

²⁵ Padusahan mo an paraolog-olog asin makakanood maski an mangmang. Sagweon mo an may pakasabot, asin madadagdagan an saiyang naaaraman.

²⁶ An naggigibo nin kadahasan sa ama asin nagsusubol sa ina, sarong aking maraot saka mayo nin sopog.

²⁷ Aki ko, kun mag-ontok ka sa pag-adal, mapapabayaan mo ngapit an saimo nang naaraman.

²⁸ An maraot na saksi minabiko kan hustisya; an maraot na tawo namomoot sa karatan.

²⁹ Inandam na an padusa para sa mga paraolog-olog, asin an pamakol para sa mga lolong.