Mga Talinhaga 16 - Marahay na Bareta Biblia

¹ Nasa tawo an pagplano, alagad nasa Dios an huring tataramon.

² Naghohona an tawo na tama an gabos niyang ginigibo, alagad tinitimbang nin Kagurangnan an tunay niyang katuyohan.

³ Idusay mo sa Kagurangnan an gabos mong gibo, asin maootob an saimong mga plano.

⁴ An gabos na ginibo nin Kagurangnan igwa nin katuyohan; asin an kataposan kan maraot iyo an kapahamakan.

⁵ Ikinakaongis nin Kagurangnan an gabos na mapaabaw-abaw; laomon mo na dai sinda makakadulag sa saiyang padusa.

⁶ Pinapatawad an kasalan huli sa kaimbodan, asin malilikayan nin tawo an karatan huli sa pagkatakot sa Kagurangnan.

⁷ Kun an pamumuhay nin sarong tawo nawiwilihan nin Kagurangnan, pinapangyari niya na magin mga katood kan tawong iyan maski an saiyang mga kaiwal.

⁸ Mas marahay an kadikit na kwarta na pinagpagalan ki sa kadakul na nakua sa pandadaya.

⁹ Minaplano an tawo, alagad an Kagurangnan iyo an minagiya kan saiyang mga lakad.

¹⁰ Igwa nin banal na awtoridad an hade kun siya minataram; an saiyang mga hatol gabos tama.

¹¹ Boot nin Kagurangnan an tamang timbang saka sukol, asin an matanos na pagpabakal.

¹² Ikinakaongis kan mga hade an paggibo nin karatan, huli ta hustisya an nagpapakosog nin sarong gobyerno.

¹³ Boot kan hade na madangog an katotoohan, asin an nagtataram kaiyan saiyang nawiwilihan.

¹⁴ Hinihingowa kan madonong na mapaogma an hade huli ta kun maanggot an hade, igwa nin tawong magagadan.

¹⁵ An marahay na boot kan hade garo mga panganoron na nagdadara nin uran kun tig-init; buhay an makukua diyan.

¹⁶ Orog karahay an pakakua nin kadonongan saka pakaaram ki sa bulawan saka plata.

¹⁷ An dalan kan matanos paharayo sa karatan; an nag-iingat sa paglakaw, nag-iingat man kan saiyang buhay.

¹⁸ An kapaabaw-abawan minabunga nin kapahamakan, asin an kapalangkawan nin pagkahulog.

¹⁹ Orog karahay an magin mapakumbaba saka magdanay na dukha, ki sa magin saro kan mga mapaabaw-abaw saka makihiras kan saindang sinamsaman.

²⁰ An naghihinanyog sa katukdoan magigin mauswag; paladan an tawong nagsasarig sa Kagurangnan.

²¹ An madonong namimidbid huli kan saiyang pakasabot. An mahamis niyang tataramon orog na nakakadagka.

²² Para sa tawong madonong, an kadonongan burabod nin buhay; alagad an pagtukdo sa lolong pagsasayang nin panahon.

²³ An madonong minaisip ngona bago magtaram, kaya orog na nakakadagka an saiyang mga tataramon.

²⁴ An marahay na mga tataramon nakakaagid sa dugos—mahamis sa pagnamit asin marahay sa hawak.

²⁵ Igwa nin dalan na garo matanos sa paghiling nin tawo, alagad kagadanan an nasa poro kaiyan.

²⁶ An gana sa pagkakan an orog na nakakapahigos sa sarong trabahador, huli ta boot niyang mabolong an saiyang gutom.

²⁷ An tawong tampalasan nagpaplano nin karatan, asin an saiyang tataramon garo kalayong mainit nin marahay.

²⁸ An tawong biko an kaisipan nagpapalakop nin iriwal, asin an matabil nagpapasuhay nin magkatood.

²⁹ Dinadaya kan madahas an saiyang katood, dangan dinadara niya ini sa dalan na maraot.

³⁰ Mag-ingat sa tawong pangisingisi saka pakorokimlat saimo; igwa siyang iniisip na maraot.

³¹ An halawig na buhay iyo an balos sa matanos; an mga puting buhok korona nin kamurawayan.

³² Mas marahay an magin pasensyoso ki sa magin mapangyari. Mas marahay an pagpugol kan sadiri ki sa pagdaog kan bilog na syudad.

³³ Nagsasapalaran an mga tawo sa pagsabot kan kabotan nin Dios, alagad an Dios mismo an nagtatao kan kasimbagan.