Mga Talinhaga 15 - Marahay na Bareta Biblia

¹ An mahuyong pagsimbag nakakahale nin kaanggotan, alagad an matarom na tataramon minapaorog kaiyan.

² An dila kan madonong nagwawaras nin pakaaram, alagad an ngoso kan mga mangmang nagbubuga nin kamangmangan.

³ An Kagurangnan naghihiling maski saen; minamasdan niya an maraot saka an marahay.

⁴ An marahay na mga tataramon minataong buhay, alagad an matarom na dila nakakakulog nin boot.

⁵ An tawong minasikwal kan katukdoan kan saiyang ama sarong lolong, alagad an minaako nin pagsagwe sarong madonong.

⁶ Sinasaray kan matanos an saindang kayamanan, alagad an kayamanan kan tampalasan nauubos sa panahon nin kasakitan.

⁷ An pakaaram pinapalakop kan mga tawong madonong, bako kan mga lolong.

⁸ Ikinakaongis nin Kagurangnan an sakripisyo kan maraot, alagad nawiwilihan niya an pamibi kan matanos.

⁹ Ikinakauyam nin Kagurangnan an pamumuhay kan maraot, alagad namomotan niya an naggigibo nin matanos.

¹⁰ Igwa nin makuring padusa sa naggigibo nin maraot; an naoongis sa pagsagwe magagadan.

¹¹ An kinaban kan mga gadan bukas sa atubang nin Kagurangnan; gurano pa daw an puso kan mga tawo?

¹² An mahambog na tawo habong pagsawayon; dai nanggad siya naghahagad nin hatol sa sarong madonong.

¹³ An pusong magayagaya minapaogma nin lalawogon, alagad an pusong mamondo minapaluya nin boot.

¹⁴ An tawong may pakasabot naghahanap nin pakaaram, alagad an mangmang kontento na sa saiyang kamangmangan.

¹⁵ Mapagal an lambang aldaw para sa nasasakitan, alagad an tawong maogma igwa nin nagdadanay na bangkete.

¹⁶ Mas marahay pa an magin dukha na may pagkatakot sa Kagurangnan ki sa magin mayaman na pano nin kahandalan.

¹⁷ Mas marahay pang magkakan nin gulay kaiba an saimong mga namomotan ki sa magkakan nin masiram na karne na igwa nin kaanggotan.

¹⁸ An mainit na payo minapoon nin diskutiran, alagad an pagpugol sa sadiri minadara nin katoninongan.

¹⁹ An dalan kan hugakon pano nin mga tonok, alagad an tinampo kan matanos mahiwas asin patag.

²⁰ An madonong na aki nakakapaogma sa sarong ama. Lolong sana an minasikwal sa saiyang ina.

²¹ An mangmang naoogma sa saiyang kalolongan, alagad ginigibo kan madonong an matanos.

²² Masasayang an mga plano kun mayo nin maigot na pag-aadal, alagad kun kadakul kan parahatol marahay an magigin bunga kaiyan.

²³ Nakakaogma an pakakua kan tamang tataramon para sa tamang okasyon!

²⁴ An dalan kan madonong patukad sa buhay, tanganing malikayan niya an kagadanan na nasa ibaba.

²⁵ Rinaraot nin Kagurangnan an mga harong kan mapaabaw-abaw, alagad iniingatan niya an mga pagsadiri kan babaeng balo.

²⁶ Naoongis an Kagurangnan sa mga kaisipan na maraot, alagad nawiwili siya sa mga tataramon na mahuyo.

²⁷ An tawong gutom sa kwarta nagdadara nin problema sa saiyang pamilya, alagad an naoongis sa suhol mabubuhay sa halawig na panahon.

²⁸ An matanos minaisip ngona bago magsimbag. An maraot minasimbag tolos, alagad nagigin dahelan kan ribok.

²⁹ Dinadangog nin Kagurangnan an pamibi kan matanos, alagad dai niya dinadangog an maraot.

³⁰ An nakahuyom na lalawogon minapaogma nin puso, asin an marahay na bareta minapakosog nin boot.

³¹ An tawong naghihinanyog sa tamang hatol magdadanay na kaibahan kan mga madonong.

³² An tawong minasikwal nin katukdoan naoongis sa sadiri man sana niya, alagad an naghihinanyog sa hatol magigin madonong.

³³ An pagkatakot sa Kagurangnan nagtutukdo nin kadonongan, asin an kapakumbabaan nagbubunga nin kaomawan.