Mga Talinhaga 12 - Marahay na Bareta Biblia

¹ An namomoot sa disiplina namomoot sa pakaaram, alagad mangmang an naoongis sa pagsagwe.

² Nawiwilihan nin Kagurangnan an marahay na tawo, alagad pinapadusahan niya an nag-iisip nin karatan.

³ Mayo nin tawo na pinapapusog kan karatan, alagad an marahay na tawo dai nanggad matatanyog.

⁴ An marahay na babae orgulyo asin kaogmahan kan saiyang agom, alagad an babaeng minadara nin kasosopgan sa saiyang agom garo helang na kanser sa saiyang mga tolang.

⁵ Marahay an mga kaisipan kan matanos; an mga plano kan maraot pano nin pandadaya.

⁶ An mga tataramon kan maraot nakakagadan, alagad an mga tataramon kan matanos minaligtas nin mga tawo.

⁷ An mga maraot nagagadan asin mayong iwinawalat na kapagarakian, alagad an mga pamilya kan mga matanos magdadanay sagkod lamang.

⁸ Inoomaw an sarong tawo huli sa saiyang kadonongan, alagad isinisikwal an tawong may bikong kaisipan.

⁹ Mas marahay an magin ordinaryong tawo na nagtatrabaho para sa saiyang ikabubuhay ki sa magsagin-sagin na dakulang tawo alagad mayo nin kinakakan.

¹⁰ Inaataman kan marahay na tawo an saiyang mga hayop, alagad dai naheherak sa sainda an maraot.

¹¹ An mahigos na paraoma igwa nin dakul na kakanon, alagad kalolongan an magsayang nin panahon sa mayo nin halagang mga proyekto.

¹² Marurumpag an makosog na tore kan maraot, alagad an matanos dai nanggad matatanyog.

¹³ An maraot na tawo nasisiod kan sadiring tataramon, alagad nakakalikay sa anoman na pag-alaman an matanos.

¹⁴ Babalosan ka sosog sa saimong mga tataramon saka mga gibo; makakamtan mo an maninigo sa saimo.

¹⁵ An lolong danay na naghohona na siya an tama, alagad an madonong naghihinanyog sa hatol.

¹⁶ Nahihiling tolos sa lolong an pagkauyam, alagad an madonong dai nagtatao nin halaga sa insulto.

¹⁷ An nagtataram kan katotoohan nagsasaksi sa katanosan, alagad an bakong totoong saksi nagtataram nin kaputikan.

¹⁸ An makulog na mga tataramon arog sa espada, nakakalugad nin hararom, alagad an mga tataramon kan madonong nakakabolong.

¹⁹ Halipot an buhay kan kaputikan, alagad nabubuhay sagkod lamang an katotoohan.

²⁰ An kadayaan iyo an nasa puso kan mga nag-iisip nin karatan, alagad igwa nin kaogmahan an nagpaplano nin karahayan.

²¹ Mayo nin maraot na maabot sa matanos, alagad an tampalasan pano nin kasakitan.

²² Nauuyam an Kagurangnan sa mga putikon, alagad nawiwili siya sa mga tawong nag-ootob kan saindang panuga.

²³ Dai ipinaghahambog kan madonong na tawo an saiyang naaaraman, alagad ipinapahayag kan lolong an saiyang kalolongan.

²⁴ An kahigosan iyo an matao saimo nin kapangyarihan; an pagigin hugakon iyo an madara saimo sa kaoripnan.

²⁵ An kahaditan minapagabat kan puso nin tawo, alagad minapaogma saiya an marahay na tataramon.

²⁶ An matanos na tawo iyo an giya kan saiyang katood, alagad an dalan kan maraot minapasiring sa pagkalagalag.

²⁷ Kun hugakon ka, dai mo makakamtan an mawot mo, alagad kun mahigos ka, magkakaigwa ka nin mahalagang kayamanan.

²⁸ An katanosan iyo an dalan pasiring sa buhay; an karatan iyo an dalan pasiring sa kagadanan.