Mga Talinhaga 1 - Marahay na Bareta Biblia

Halaga kan mga Talinhaga

¹ An mga talinhaga ni Solomon, na aking lalaki ni David asin hade nin Israel.

² Uya an mga talinhaga na makakatabang saindo sa pagmidbid kan kadonongan saka marahay na hatol, asin sa pagsabot kan mga kasabihan na may hararom na kahulogan.

³ Tutukdoan kamo kaini kan matanos na paagi nin pamumuhay, pagigin onesto, matanos, asin mayong pagpapalaen sa kapwa.

⁴ Ginigibo kaining madonong an mayong eksperyensya asin tinutukdoan kaini an mga hoben kun paano an pagdesisyon nin tama.

⁵ An mga talinhagang ini makakadagdag sa naaaraman kan mga madonong asin makakagiya sa mga tawong may inadalan,

⁶ tanganing masabotan ninda an mga natatagong kahulogan kan mga talinhaga asin mga problemang ipinapahayag kan madodonong.

Hatol sa mga Hoben na Lalaki

⁷ An pagkatakot sa Kagurangnan iyo an kapinonan nin pakaaram; an kadonongan asin katukdoan mayo nin halaga para sa mga lolong.

⁸ Aki ko, hinanyoga an hulit kan saimong ama, asin dai mo ipagsikwal an katukdoan kan saimong ina;

⁹ huli ta iyan nakakaagid sa sarong magayon na korona sa saimong payo asin kulintas sa saimong liog.

¹⁰ Aki ko, dai ka maghonod kun sugotan ka kan mga parakasala.

¹¹ Kun magsabi sinda, “Madya, maghipa kita nin tawong magagadan! Maski mayo nin dahelan, salakayon ta an tawong mayo nin kasalan.

¹² Pwedeng buhay asin mabaskog sinda kun makua ta sinda, alagad magigin gadan sinda, pakatapos ta sainda!

¹³ Hanapon ta an gabos na klase nin kayamanan, dangan panoon ta nin sinamsaman an satong mga harong!

¹⁴ Madya, umiba ka samo asin barangaon ta an satong hinabonan.”

¹⁵ Aki ko, dai ka maglakaw sa kaibahan ninda; likayan mo sinda.

¹⁶ An saindang mga bitis nagdadalagan sa paggibo nin karatan, naghihidali sinda sa panggagadan.

¹⁷ Mayo nin mangyayari sa pagbiklad mo nin hikot kun an gamgam na boot mong dakopon nagmamasid.

¹⁸ Alagad an mga tawong ini minabugtak nin litag para sa sadiri man sana ninda, litag na magagadanan ninda.

¹⁹ Siring kaiyan an nangyayari sa kiisay man na nabubuhay sa kadahasan; an panghahabon iyo an magadan sa mahabon.

Nag-aapod an Kadonongan

²⁰ An kadonongan makosog na nag-aapod sa tinampo asin sa mga saodan;

²¹ nagkukurahaw siya sa ibabaw kan mga kudal asin nagpapahayag sa trangkahan kan syudad:

²² “O mga lolong, kontento na daw kamo sa saindong pagkalolong? Sagkod nuarin nindo pag-oolog-ologon an pakaaram? Dai pa nanggad kamo nakakanood?

²³ Kun hinanyogon nindo an sakong pagsagwe, itatao ko saindo an marahay na hatol asin ihihiras ko saindo an sakong naaaraman.

²⁴ Alagad huli ta habo kamong magdangog kan ako nag-apod asin mayo nin nagdolok kan iunat ko an sakong kamot;

²⁵ huli ta dai nindo pinahalagahan an sakong hatol asin dai nindo inako an sakong pagsagwe,

²⁶ ngingisihan ko kamo sa saindong kasakitan asin tutuyatuyaon ko kamo kun abotan kamo nin takot—

²⁷ kun ini mag-abot saindo siring sa bagyo, na may darang doros nin kasakitan, asin kun kamo nakukulogan saka nagmomondo.

²⁸ Dangan maapod kamo sako, alagad dai ako masimbag; hahanapon nindo ako, alagad dai nindo ako makukua.

²⁹ Huli ta naongis kamo sa pakaaram asin dai nindo pinili an pagkatakot sa Kagurangnan;

³⁰ huli ta dai nindo inako an sakong hatol asin isinikwal nindo an sakong pagsagwe,

³¹ kakakanon nindo an bunga kan saindong gibo asin mababaldi kamo sa saindong mga plano.

³² An pagtalikod sa kadonongan iyo an minagadan sa mayong eksperyensya, asin an dai pakilabot kan mga lolong iyo an minaraot sainda.

³³ Alagad an naghihinanyog sako mag-eerok sa katiwasayan asin mabubuhay sa katoninongan, na mayo nin natatakotan.”