Biblia Todo Logo
Bìoball air-loidhne

- Sanasan -

Mga Panambitan 5 - Marahay na Bareta Biblia


Pamibi Tanganing Maherakan

1 Giromdoma, Kagurangnan, an nangyari samo; masdan mo kami asin hilinga an samong kasosopgan.

2 An samong pagsadiri yaon na sa mga dayuhan, mga taga ibang nasyon na an nag-eerok sa samong mga harong.

3 An samong mga ama ginadan kan mga kaiwal, asin an samong mga ina balo na ngunyan.

4 Kaipuhan bayadan mi an tubig na samong iniinom, sagkod an mga kahoy na samong iganagatong.

5 Pinapagtrabaho kami arog sa mga asno o kamelyo; pagal na kami alagad dai tinutugotan na magpahingalo.

6 Tanganing mabuhay, nakilimos kami nin pagkakan sa Egipto asin sa Asiria.

7 Nagkasala an samong mga ginikanan, asin mayo na sinda ngunyan, alagad kami an nagtitios para sa saindang mga kasalan.

8 Mga oripon an namamayo samo; mayo nin maligtas samo sa saindang kapangyarihan.

9 Sa paghanap nin pagkakan, buhay mi nasa pag-alaman, sa kamot kan mga bandido sa kalangtadan.

10 Gutom an dahelan kan samong kalentura sagkod na an kublit mi magin arog kainit sa horno.

11 An samong mga agom linupigan sa Bukid nin Sion, an mga birhen sa mga banwa nin Juda.

12 An samong mga lider binihag dangan binitay; dai ginalangan maski an kamagurangan.

13 An mga hoben na lalaki pirit na pinatrabaho sa mga gilingan; mga aki pinanluluya sa gabat kan mga kahoy na saindang pasan.

14 Pinabayaan na kan mga gurang an pagtiripon sa trangkahan kan syudad, asin kan mga hoben na lalaki an saindang musika.

15 Naontok na an kaogmahan kan samong mga puso; an samong mga pagsayaw nagi nang mga pagmondo.

16 Mayo nang natada sa mga ipinag-oorgulyo nyamo; nagkasala kami, herak man samo!

17 Makuri an pagmondo kan samong mga puso asin dai na nakakamaan an samong mga mata huli kan mga luha,

18 huli ta an Bukid nin Sion rumpag na asin mayong nag-eerok, saka pinaglakaw-lakawan nin mga lalaw na ayam.

19 Alagad ika, Kagurangnan, hade sagkod pa man; an saimong trono magdadanay sa gabos na henerasyon.

20 Tadaw ta pinabayaan mo kami sa haloy na panahon? Magigiromdoman mo pa daw kami giraray?

21 Balikan kami saimo, Kagurangnan! Ibalik mo kami! Balikan an dati nyamong kamurawayan.

22 O totoo mananggad na isinikwal mo na kami sagkod lamang? Mayo na daw nin kasagkoran an saimong kaanggotan?

Marahay na Bareta Biblia © Philippine Bible Society, 1992.

Philippine Bible Society
Lean sinn:



Sanasan