Mga Bilang 8 - Marahay na Bareta Biblia

An Pagbugtak kan mga Ilawan

¹ Nagtaram an Kagurangnan ki Moises,

² “Sabihan mo si Aaron na pagbugtak niya kan mga ilawan sa kandelero, kaipuhan magliwanag an mga iyan pasiring sa atubangan.”

³ Ginibo ini ni Aaron; ibinugtak niya an mga ilawan sa kandelero tanganing maliwanagan an nasa atubangan kan kandelero siring sa ipinagboot nin Kagurangnan ki Moises.

⁴ An kandelero gibo sa pinulpog na bulawan, magpoon sa ibaba sagkod sa itaas sosog sa aarogan na ipinahiling nin Kagurangnan ki Moises.

An Paglinig asin an Pagkonsagra kan mga Levita

⁵ Nagtaram an Kagurangnan ki Moises,

⁶ “Isuhay mo sa ibang mga Israelita an mga Levita asin linigan mo sinda.

⁷ Ini an gibohon mo sa paglinig sainda: wirikan mo sinda kan tubig na panlinig dangan aarisan ninda an saindang bilog na hawak, lalabahan an saindang mga gubing, asin magigin malinig na sinda.

⁸ Pakatapos, padarahon mo sinda nin torilyong baka, kaiba an dolot na pagkakan na arinang sinalakan nin lana; makua ka man nin sarong torong baka bilang dolot para sa kasalan.

⁹ Tiponon mo an bilog na komunidad nin Israel dangan patindogon mo an mga Levita sa atubang kan Tabernakulo.

¹⁰ Ibubugtak kan mga Israelita an saindang mga kamot sa payo kan mga Levita,

¹¹ asin an mga ini itatalaga ni Aaron bilang espesyal na regalo kan mga Israelita tanganing maglingkod sa sako.

¹² Pakatapos, ibubugtak kan mga Levita an saindang mga kamot sa payo kan duwang torong baka; an saro idodolot mo para sa kasalan asin an saro bilang tinutong na atang, tanganing gibohon an pagtubos sa mga Levita.

¹³ “Konsagrahon mo para sako an mga Levita bilang espesyal na regalo, asin italaga mo sinda na mga katabang ni Aaron sagkod kan mga aki niya.

¹⁴ Isuhay mo sinda sa ibang mga Israelita sa siring na paagi tanganing magin sadiri ko.

¹⁵ Pakalinig mo asin pakakonsagra kan mga Levita, pwede na sindang maglingkod sa Tabernakulo.

¹⁶ Kinua ko sinda bilang kasalihid kan mga matuang lalaki kan mga Israelita; sakuya sana nanggad sinda.

¹⁷ An matua kan banwaan nin Israel sadiri ko, tawo man o hayop; kinonsagra ko sinda para sako kan aldaw na gadanon ko an gabos na matua sa daga nin Egipto.

¹⁸ Kinukua ko ngunyan an mga Levita embes kan gabos na matua nin Israel,

¹⁹ asin itinatao ko sinda ki Aaron saka sa mga aki niya, bilang sarong regalo na gikan sa mga Israelita, tanganing maglingkod sa Tabernakulo para sa banwaan nin Israel, asin tanganing ikalikay an mga Israelita sa maraot na mangyayari kun magrani sinda sa Banal na Lugar.”

²⁰ Kaya an mga Levita kinonsagra ni Moises, ni Aaron asin kan bilog na banwaan nin Israel, sosog sa pagboot nin Kagurangnan ki Moises.

²¹ Lininigan kan mga Levita an saindang mga sadiri sa saindang mga kasalan asin linabahan ninda an saindang mga gubing. Itinalaga sinda ni Aaron bilang sarong espesyal na regalo sa Kagurangnan, asin ginibo niya an dolot para sa kasalan, tanganing linigan an mga Levita.

²² Sinunod kan mga tawo an gabos na ipinagboot nin Kagurangnan ki Moises manongod sa mga Levita. Pakatapos, ginibo kan mga Levita an saindang katongdan sa Tabernakulo bilang mga katabang ni Aaron sagkod kan mga aki niya.

²³ Nagtaram an Kagurangnan ki Moises,

²⁴ “Maglilingkod an lambang Levita sa Tabernakulo pag-abot niya sa edad na beynte y singko,

²⁵ asin mapahingalo siya pag-abot sa edad na singkwenta.

²⁶ Pakatapos, pwede niyang tabangan an kapwa niya Levita alagad dai na siya magibo kan dati niyang trabaho. Iyan an saimong gigibohon sa pagtao sa mga Levita kan saindang mga katongdan.”