Mga Bilang 34 - Marahay na Bareta Biblia

An mga Pagdolonan kan Daga

¹ Itinao nin Kagurangnan ki Moises

² an minasunod na mga katukdoan para sa banwaan nin Israel: “Paglaog nindo sa Canaan, an dagang itinatao ko saindo, iyo ini an magigin pagdolonan nindo.

³ An pagdolonan sa habagat mapoon sa kalangtadan nin Zin, dangan minasosog kan pagdolonan nin Edom. Mapoon iyan sa sirangan, sa habagat na poro kan Gadan na Dagat.

⁴ Dangan mapahabagat iyan pasiring sa Dalan nin Akrabbim, maagi sa Zin asin masagkod sa habagat kan Kades-barnea. Dangan madagos iyan sa Hazar-addar asin sa Azmon,

⁵ saen maliko iyan pasiring sa kapantayan na nasa pagdolonan nin Egipto saka matapos sa Mediteraneo.

⁶ “An pagdolonan sa solnopan iyo an Dagat nin Mediteraneo.

⁷ “An pagdolonan sa amihan masosog sa sarong linya na minapoon sa Dagat nin Mediteraneo sagkod sa Bukid nin Hor;

⁸ hale duman mapasiring sa Dalan nin Hamat. Mapadagos iyan sa Zedad

⁹ asin sa Zifron, dangan matapos sa Hazar-enan.

¹⁰ “An pagdolonan sa sirangan masosog sa sarong linya na minapoon sa Hazar-enan sagkod sa Sefam.

¹¹ Dangan mapahabagat pasiring sa Harbel, sa sirangan nin Ain, asin mapadagos sa kabubuldan sa parteng sirangan na baybayon kan Danaw nin Galilea,

¹² dangan mapahabagat na sinususog an Salog nin Jordan sagkod sa Gadan na Dagat. “An mga ini iyo an apat na pagdolonan kan saindong daga.”

¹³ Kaya sinabihan ni Moises an mga Israelita, “Iyo ini an daga na mamanahon nindo sa paagi nin ripa, an dagang itinao nin Kagurangnan sa siyam may kabangang tribu.

¹⁴ An mga tribu ni Ruben, ni Gad, asin kan kabangang tribu ni Manases nag-ako na kan saindang kahirasan sosog sa saindang mga pamilya,

¹⁵ duman sa sirangan na kabtang kan Jordan, kahampang kan Jerico.”

An mga Lider na namahala sa Pagbanga kan Daga

¹⁶ Nagtaram an Kagurangnan ki Moises,

¹⁷ “An pading si Eleazar asin si Josue na aking lalaki ni Nun iyo an mabanga kan daga para sa mga tawo.

¹⁸ Kumua ka nin sarong lider hale sa lambang tribu tanganing tabangan sinda sa pagbanga kaiyan.”

^19-28 Iyo ini an mga lalaking pinili nin Kagurangnan: Tribu Lider Juda si Caleb na aking lalaki ni Jefunne Simeon si Selumiel na aking lalaki ni Ammihud Benjamin si Elidad na aking lalaki ni Kislon Dan si Bukki na aking lalaki ni Jogli Manases si Hanniel na aking lalaki ni Efod Efraim si Kemuel na aking lalaki ni Siftan Zabulon si Elizafan na aking lalaki ni Parnac Issakar si Paltiel na aking lalaki ni Azzan Aser si Ahihud na aking lalaki ni Selomi Neftali si Pedahel na aking lalaki ni Ammihud.

Tribu Lider

²⁹ Iyo ini an mga lalaking pinili nin Kagurangnan na magbanga kan pagsadiri para sa banwaan nin Israel sa daga nin Canaan.