Mga Bilang 33 - Marahay na Bareta Biblia

An Pagbaklay Hale sa Egipto Pasiring sa Moab

¹ An minasunod na kasaysayan nagtatao kan ngaran kan mga lugar na pinagkampohan kan mga Israelita pakahale ninda sa Egipto sosog sa saindang mga tribu sa pangengenot ni Moises saka ni Aaron.

² Sa pagboot nin Kagurangnan, isinurat ni Moises an ngaran kan lambang lugar na saindang pinagkampohan.

³ Naghale sa Egipto an mga Israelita kan ikakinseng aldaw kan enot na bulan kan taon, sarong aldaw pakalihis kan enot na Paskwa. Maogmang binayaan kan mga Israelita an syudad nin Rameses mantang naghihiling an mga Egipcio,

⁴ na naglulubong kan mga matua nindang aking lalaki na ginadan nin Kagurangnan. Huli kan ginibong ini nin Kagurangnan ipinahiling niya na mas mapangyari siya ki sa mga dios-dios nin Egipto.

⁵ Naghale sa Rameses an mga Israelita asin nagkampo sa Sukkot.

⁶ Sunod sindang nagkampo sa Etam na nasa tampi kan kalangtadan.

⁷ Hale sa Etam, nagbalik sinda sa Pi-hahirot, sa sirangan kan Baal-zefon, asin nagkampo sa harani kan Migdol.

⁸ Binayaan ninda an Pi-hahirot dangan uminagi sa Dagat na Pula pasiring sa kalangtadan nin Sur; pakalihis nin tolong aldaw na pagbaklay nagkampo sinda sa Mara.

⁹ Hale duman, nagpasiring sinda sa Elim asin nagkampo sinda huli ta igwa duman nin doseng burabod nin tubig asin setentang kahoy na palma.

¹⁰ Naghale sinda sa Elim asin nagkampo harani sa Dagat na Pula.

¹¹ Sunod nindang kampo iyo an Desyerto nin Sin.

¹² Pakatapos, nagkampo sinda sa Dofka,

¹³ dangan sa Alus.

¹⁴ Hale duman nagkampo sinda sa Refidim, saen mayo sindang nakuang tubig na maiinom.

^15-37 Magpoon sa Refidim sagkod sa Bukid nin Hor, nagkampo sinda sa minasunod na mga lugar: Desyerto nin Sinai, Kibrot-Hattaava, (o “Mga Lulubngan nin Pagmawot”), Hazerot, Ritma, Rimmon-perez, Libna, Rissa, Kehelata, Bukid nin Sefer, Harada, Makelot, Tahat, Tera, Mitka, Hasmona, Moserot, Bene-Jaakan, Hor-haggidgad, Jotbata, Abrona, Ezion-geber, kalangtadan nin Zin (o Kades), asin sa Bukid nin Hor, sa gilid kan daga nin Edom.

^38-39 Sa pagboot nin Kagurangnan, nagtukad an pading si Aaron sa Bukid nin Hor. Nagadan siya duman sa edad na syento beynte y tres na taon sa enot na aldaw kan ikakwarentang taon pakahale kan mga Israelita sa Egipto.

⁴⁰ Nadangog kan hade nin Arad, na nag-eerok sa habagat na parte kan daga nin Canaan, na nagdadangadang an mga Israelita.

^41-49 Magpoon sa Bukid nin Hor sagkod sa kapatagan nin Moab, nagkampo an mga Israelita sa mga lugar na ini: Zalmona, Punon, Obot, Iye-abarim sa teritoryo nin Moab, Dibon-gad, Almon-diblataim, Bukid nin Abarim harani sa Nebo, asin sa kapatagan nin Moab sa ibong kan Salog nin Jordan hale sa Jerico, sa pagultanan kan Bet-Jesimot asin kan Abel-sittim sa kapatagan nin Moab.

Mga Katukdoan bago Magbalyo sa Jordan

⁵⁰ Duman sa kapatagan nin Moab sa ibong kan Jordan hale sa Jerico, itinao nin Kagurangnan ki Moises

⁵¹ an minasunod na mga katukdoan para sa mga Israelita: “Kun magbalyo na kamo sa Jordan pasiring sa daga nin Canaan,

⁵² pahaleon nanggad nindo an gabos na nag-eerok sa daga. Raoton nindo an gabos nindang ladawan na gibo sa gapo saka sa metal. Gabaon man nindo an gabos nindang lugar na pinagsasambahan.

⁵³ Sakopon nindo an daga asin erokan nindo, huli ta itinatao ko iyan saindo bilang pagsadiri.

⁵⁴ Bangaon mo an daga sa manlaen-laen na tribu asin kamaganakan sa paagi nin pagripa. Tawan mo nin dakulang kahirasan an dakulang kamaganakan asin sadit na kahirasan an sadit na kamaganakan.

⁵⁵ Alagad kun dai nindo pahaleon an gabos na nag-eerok sa daga, an matatada magigin garo mga puling sa saindong mga mata asin mga tonok sa saindong mga hirog. Lalabanan ninda kamo sa dagang eerokan nindo.

⁵⁶ Kun dai nindo sinda pahaleon sa daga, kamo an tutunawon ko siring kan inisip kong gibohon sainda.”