Mga Bilang 31 - Marahay na Bareta Biblia

An Banal na Gera Laban sa Midianita

¹ Nagtaram an Kagurangnan ki Moises,

² “Padusahan mo an mga Midianita huli kan ginibo ninda sa banwaan nin Israel. Pakagibo mo kaiyan, magagadan ka.”

³ Kaya sinabihan ni Moises an mga tawo, “Mag-andam kamo para sa gera tanganing salakayon nindo an mga Midianita dangan padusahan huli kan ginibo ninda sa Kagurangnan.

⁴ Magpadara kamo nin sangribong mga lalaki hale sa lambang tribu nin Israel.”

⁵ Kaya sangribong lalaki an pinili ninda hale sa lambang tribu nin Israel. Uminabot sa dose mil an bilang kan mga lalaking andam gabos sa pakilaban.

⁶ Ipinadara sinda sa gera ni Moises sa pamamahala ni Finehas na aking lalaki kan pading si Eleazar. Siya man an namahala kan mga banal na kagamitan asin kan mga trompeta para sa alarma.

⁷ Sinalakay ninda an Midian siring sa ipinagboot nin Kagurangnan ki Moises, asin ginadan ninda an gabos na lalaki,

⁸ kaiba an limang hade kan Midian na si Evi, Rekem, Zur, Hur, asin Reba. Ginadan man ninda si Balaam na aking lalaki ni Beor.

⁹ Binihag kan mga Israelita an mga babaeng Midianita saka an mga sadit na aki. Sinamsam ninda an mga baka, karnero sagkod an gabos na kayamanan kan mga Midianita.

¹⁰ Dangan sinulo ninda an mga syudad saka mga kampo.

¹¹ Kinua ninda an mga sinamsam asin an mga nabihag, kaiba an mga bilanggo saka an mga hayop,

¹² dangan dinara ki Moises, ki Eleazar asin sa komunidad nin Israel na nasa kampo sa kapatagan nin Moab, sa ibong kan Jordan hale sa Jerico.

Nagbalik an Hukbo

¹³ Nagluwas sa kampo si Moises, si Eleazar asin an gabos na lider kan komunidad sa pagsabat kan hukbo.

¹⁴ Naanggot si Moises sa mga opisyal kan hukbo, sa mga namamayo nin rinibo asin sa mga namamayo nin ginatos, na nagbaralik hale sa gera.

¹⁵ Sinabihan sinda ni Moises, “Tano ta dai nindo ginadan an mga babae?

¹⁶ Giromdoma nindo na mga babae an nagkuruyog sa katukdoan ni Balaam dangan sa Peor, sinda an nagdagka sa mga Israelita tanganing talikodan an Kagurangnan. Ini an dahelan kun tadaw ta nagkaigwa nin peste sa banwaan nin Kagurangnan.

¹⁷ Kaya gadanon nindo ngunyan an mga aking lalaki saka an mga babaeng nadorogan na.

¹⁸ Alagad itada nindong buhay para saindo an gabos na babaeng birhen.

¹⁹ Kamo gabos na nakagadan asin nakakapot nin gadan kaipuhan mag-erok sa luwas kan kampo sa laog nin pitong aldaw. Sa ikatolo asin sa ikapitong aldaw, linigan nindo an saindong sadiri, sagkod an saindong mga bihag.

²⁰ Linigan man nindo an lambang pedaso nin gubing saka an gabos na gibo sa anit, sa balukag nin kanding o sa kahoy.”

²¹ Sinabihan kan pading si Eleazar an mga lalaking nagbalik hale sa gera, “Iyo ini an mga pagsusundon na itinao nin Kagurangnan ki Moises.

^22-23 An gabos na bagay na dai masusulo arog kan bulawan, plata, bronse, lansang, lata asin timga, kaipuhan paagihon nindo sa kalayo tanganing malinigan. An ibang bagay, kaipuhan linigan sa paagi kan tubig.

²⁴ Sa ikapitong aldaw kaipuhan labahan nindo an saindong mga gubing; dangan magigin malinig na kamo asin tutugotan nang maglaog sa kampo.”

An Paghiras kan mga Sinamsam

²⁵ Nagtaram an Kagurangnan ki Moises,

²⁶ “Bilangon nindo ni Eleazar saka kan mga lider kan komunidad an gabos na bihag, tawo man o hayop,

²⁷ dangan bangaon mo sa duwang kabtang, an saro para sa mga soldados asin an saro para sa komunidad.

²⁸ Hale sa kahirasan kan mga soldados, kuahon nindo bilang buhis para sa Kagurangnan an saro sa lambang kinyentos na tawo, asin siring man sa baka, asno, karnero saka kanding.

²⁹ Itao iyan ki Eleazar na padi bilang sarong espesyal na regalo sa Kagurangnan.

³⁰ Hale sa kahirasan kan komunidad, kuahon mo an saro sa lambang singkwentang tawo, siring man sa baka, asno, karnero saka kanding. Itao nindo an mga iyan sa mga Levita na iyo an mga namamahala kan Tabernakulo nin Kagurangnan.”

³¹ Ginibo ni Moises asin ni Eleazar an pagboot nin Kagurangnan.

^32-35 Iyo ini an mga nasamsam kan mga soldados laen pa kan kinua ninda para sa saindang sadiri: seis syentos setenta y singko mil na karnero asin kanding, setenta y dos mil na baka, sesenta y uno mil na asno, asin treynta y dos mil na birhen.

^36-40 An kabanga kaini nagin kahirasan kan mga soldados: tres syentos treynta y syete mil, kinyentos na karnero asin kanding an napasainda, asin an seis syentos setenta y singko kaini iyo an buhis para sa Kagurangnan; treynta y seis mil an baka asin an setenta y dos kaini iyo an buhis para sa Kagurangnan; treynta mil, kinyentos an asno asin an sesenta y uno kaini iyo an buhis para sa Kagurangnan; dyes y seis mil na birhen, asin an treynta y dos kaini iyo an buhis para sa Kagurangnan.

⁴¹ Kaya itinao ni Moises ki Eleazar an buhis bilang sarong espesyal na regalo sa Kagurangnan, siring sa ipinagboot niya ki Moises.

^42-46 An kahirasan kan komunidad pareho kan kahirasan kan mga soldados: tres syentos treynta y syete mil, kinyentos na karnero asin kanding; treynta y seis mil na baka; treynta mil, kinyentos na asno; asin dyes y seis mil na birhen.

⁴⁷ Hale sa kahirasan na ini, kinua ni Moises an saro sa lambang singkwentang bilanggo saka hayop; dangan siring kan ipinagboot nin Kagurangnan, itinao an mga ini sa mga Levita na iyo an mga namamahala kan Tabernakulo nin Kagurangnan.

⁴⁸ Dangan nagdolok ki Moises an mga opisyal kan hukbo

⁴⁹ asin nagsabi, “Binilang mi an mga soldados na samong nasasakopan asin mayo nin kulang minsan saro sainda.

⁵⁰ Dara nyamo an mga bulawan na alahas, mga pulseras, singsing, hikaw, asin mga kulintas, na kinua kan lambang saro samo. Idinodolot mi sa Kagurangnan an mga alahas na ini bilang kabayadan kan samong buhay, tanganing atamanon niya kami.”

⁵¹ Inako ni Moises asin ni Eleazar an bulawan na nasa porma gabos nin alahas.

⁵² An timbang kan dolot kan mga opisyal uminabot sa dos syentos kilos.

⁵³ An mga bakong opisyal dai nagtarao kan saindang sinamsam.

⁵⁴ An bulawan dinara ni Moises asin ni Eleazar sa Tabernakulo tanganing atamanon nin Kagurangnan an banwaan nin Israel.