Mga Bilang 27 - Marahay na Bareta Biblia

An mga Aking Babae ni Zelofehad

¹ Si Mala, si Noe, si Hogla, si Milca, asin si Tirza iyo an mga aking babae ni Zelofehad na aking lalaki ni Hefer, na aking lalaki ni Gilead, na aking lalaki ni Makir, na aking lalaki ni Manases, na aking lalaki ni Jose.

² Nagdolok sinda ki Moises, sa pading si Eleazar, sa mga lider sagkod sa bilog na komunidad duman sa may pintoan kan Tabernakulo, asin nagsabi,

³ “Nagadan sa kalangtadan an samong ama na mayo nin aking lalaki. Dai siya kaiba sa mga parasunod ni Kora na nagrebelde tumang sa Kagurangnan; nagadan siya huli sa sadiring kasalan.

⁴ Tano ta paparaon an ngaran kan samuyang ama sa Israel sa dahelan na dai siya nin aking lalaki? Tawe kami nin daga sa kaibahan kan mga kadugo kan samong ama.”

⁵ Dinara ni Moises an saindang kaso sa Kagurangnan.

⁶ Nagtaram an Kagurangnan ki Moises,

⁷ “Tama an mga aking babae ni Zelofehad. Tawan mo sinda kan saindang kahirasan sa kaibahan kan mga kadugo kan saindang ama. Itao mo sainda an kahirasan niya.

⁸ Sabihan mo an banwaan nin Israel na kun igwa nin magadan na mayo nin aking lalaki, an saiyang daga itatao sa saiyang aking babae.

⁹ Kun mayo siya nin aking babae, an saiyang daga itatao sa saiyang mga tugang na lalaki.

¹⁰ Kun mayo siya nin tugang na lalaki, an saiyang daga itatao sa mga tugang na lalaki kan saiyang ama,

¹¹ asin kun mayo nin tugang na lalaki an saiyang ama, an saiyang daga itatao sa pinakaharani niyang kadugo, na iyo an magigin kagsadiri kaiyan. Kukuyogon ini kan banwaan nin Israel bilang sarong pagsusundon sosog sa togon, siring sa ipinagboot ko saimo. Ako an Kagurangnan.”

Pinili si Josue Bilang Kasalihid ni Moises

¹² Nagtaram an Kagurangnan ki Moises, “Tumukad ka sa Bukid nin Abarim asin tanawon mo an daga na itatao ko sa mga Israelita.

¹³ Pakatapos mong mahiling iyan, magagadan ka siring kan saimong tugang na si Aaron,

¹⁴ huli ta sinuhay nindo an sakong pagboot duman sa kalangtadan nin Zin. Kan magreklamo tumang sako an bilog na komunidad duman sa Meriba, dai nindo ipinamidbid an sakong banal na kapangyarihan sa atubangan ninda.” (An Meriba iyo an burabod sa Kades sa kalangtadan nin Zin.)

¹⁵ Namibi si Moises,

¹⁶ “Nakikimaherak ako Kagurangnan Dios, na ginikanan nin buhay, na magpili ka nin sarong lalaki na pwedeng mangenot sa banwaan

¹⁷ asin magboot sainda sa panahon nin gera, tanganing an saimong komunidad dai makaarog sa karnero na mayo nin pastor.”

¹⁸ Nagtaram an Kagurangnan ki Moises, “Kuaha si Josue na aking lalaki ni Nun, sarong lalaki na igwa kan espiritu, asin iduta mo an saimong mga kamot sa saiyang payo.

¹⁹ Patindogon mo siya sa atubangan kan pading si Eleazar asin sa bilog na komunidad, dangan ipahayag mo siya bilang saimong kasalihid.

²⁰ Itao mo saiya an iba mong kapangyarihan tanganing magkuyog saiya an bilog na komunidad nin Israel.

²¹ Magsasarig siya sa pading si Eleazar na makakaaram kan sakong kabotan para saiya huli sa paggamit kan Urim asin Tummim. Sa paaging ini gigiyahan ni Eleazar si Josue asin an bilog na komunidad sa gabos nindang gigibohon.”

²² Ginibo ni Moises an ipinagboot saiya nin Kagurangnan. Pinatindog niya si Josue sa atubangan kan pading si Eleazar asin kan bilog na komunidad;

²³ idinuta niya an saiyang mga kamot sa payo ni Josue asin itinalaga siya bilang saiyang kasalihid sosog sa pagboot nin Kagurangnan.