Mga Bilang 26 - Marahay na Bareta Biblia

An Ikaduwang Pagsenso

¹ Pakatapos kan peste, nagtaram an Kagurangnan ki Moises asin ki Eleazar na aking lalaki kan padi na si Aaron,

² “Sensohon nindo an bilog na komunidad nin Israel sosog sa pamilya, asin ilista nindo an gabos na lalaki na beynteng taon an edad paitaas na maninigong maglingkod sa hukbo.”

^3-4 Nagkuyog si Moises asin si Eleazar; tinipon ninda an gabos na lalaki na beynteng taon an edad paitaas. Nagtiripon sinda sa kapatagan nin Moab, sa ibong kan Salog nin Jordan hale sa Jerico. Iyo ini an mga Israelita na naghale sa Egipto:

⁵ An mga kaayon sa tribu ni Ruben na matuang aking lalaki ni Jacob iyo an mga kamaganakan ni Hanok, ni Pallu,

⁶ ni Hezron, asin ni Carmi.

⁷ An bilang kan mga kamaganakan na ini uminabot sa kwarenta y tres mil, syete syentos treynta.

⁸ An aking lalaki ni Pallu iyo si Eliab

⁹ asin an mga aking lalaki ni Eliab iyo si Nemuel, si Datan, saka si Abiram. (Iyo ini an Datan saka an Abiram na pinili kan komunidad. Nagrebelde sinda ki Moises asin ki Aaron, dangan nag-apil sa grupo ni Kora kan magtumang siya sa Kagurangnan.

¹⁰ Nagbuka an daga dangan hinalon sinda. Nagadan sinda kaiba si Kora asin an mga kairiba niya kan masulo an dos syentos singkwentang kalalakihan; sinda nagin sarong patanid para sa mga tawo.

¹¹ Alagad dai ginadan an mga aking lalaki ni Kora.)

¹² An mga kaayon sa tribu ni Simeon iyo an mga kamaganakan ni Nemuel, ni Jamin, ni Jakin,

¹³ ni Zera, asin ni Shaul.

¹⁴ An bilang kan mga kamaganakan na ini uminabot sa beynte y dos mil, dos syentos.

¹⁵ An mga kaayon sa tribu ni Gad iyo an mga kamaganakan ni Zefon, ni Haggi, ni Suni,

¹⁶ ni Ozni, ni Eri,

¹⁷ ni Arod, asin ni Areli.

¹⁸ An bilang kan mga kamaganakan na ini uminabot sa kwarenta mil, kinyentos.

^19-21 An mga kaayon sa tribu ni Juda iyo an mga kamaganakan ni Sela, ni Perez, ni Zera, ni Hezron, asin ni Hamul. (An duwa sa mga aking lalaki ni Juda na si Er asin si Onan, nagadan sa daga nin Canaan.)

²² An bilang kan mga kamaganakan na ini uminabot sa setenta y seis mil, kinyentos.

²³ An mga kaayon sa tribu ni Issakar iyo an mga kamaganakan ni Tola, ni Pua,

²⁴ ni Jasub, asin ni Simron.

²⁵ An bilang kan mga kamaganakan na ini uminabot sa sesenta y kwatro mil, tres syentos.

²⁶ An mga kaayon sa tribu ni Zabulon iyo an mga kamaganakan ni Sered, ni Elon, asin ni Jaleel.

²⁷ An bilang kan mga kamaganakan na ini uminabot sa sesenta mil, kinyentos.

²⁸ An mga kaayon sa tribu ni Jose iyo an kamaganakan kan duwa niyang aking lalaki na si Manases asin si Efraim.

²⁹ An mga kaayon sa tribu ni Manases iyo si Makir na aking lalaki ni Manases. Si Makir iyo an ama ni Gilead, asin masososog ki Gilead an ginikanan kan minasunod na kamaganakan ninda:

³⁰ an mga kamaganakan ni Iezer, ni Helek,

³¹ ni Asriel, ni Shekem,

³² ni Semida, asin ni Hefer.

³³ Si Zelofehad na aking lalaki ni Hefer dai nagkaigwa nin mga aking lalaki kundi mga babae sana. An ngaran kan mga babae iyo si Mala, si Noe, si Hogla, si Milca, asin si Tirza.

³⁴ An bilang kan mga kamaganakan na ini uminabot sa singkwenta y dos mil, syete syentos.

³⁵ An mga kaayon sa tribu ni Efraim iyo an mga kamaganakan ni Sutela, ni Beker, asin ni Tahan.

³⁶ Masososog ki Sutela an ginikanan kan kamaganakan ni Eran.

³⁷ An bilang kan mga kamaganakan na ini uminabot sa treynta y dos mil, kinyentos. Iyo ini an mga kamaganakan na guminikan ki Jose.

³⁸ An mga kaayon sa tribu ni Benjamin iyo an mga kamaganakan ni Bela, ni Asbel, ni Ahiram,

³⁹ ni Sefufam, asin ni Hufam.

⁴⁰ Masososog ki Bela an ginikanan kan kamaganakan ni Ard asin ni Naaman.

⁴¹ An bilang kan mga kamaganakan na ini uminabot sa kwarenta y singko mil, seis syentos.

⁴² An mga kaayon sa tribu ni Dan iyo an kamaganakan ni Husim,

⁴³ na an bilang uminabot sa sesenta y kwatro mil, kwatro syentos.

⁴⁴ An mga kaayon sa tribu ni Aser iyo an mga kamaganakan ni Imna, Isvi, asin ni Berias.

⁴⁵ Masososog ki Berias an kamaganakan ni Heber asin ni Malkiel.

⁴⁶ Si Aser igwa nin aking babae na an ngaran Sera.

⁴⁷ An bilang kan mga kamaganakan na ini uminabot sa singkwenta y tres mil, kwatro syentos.

⁴⁸ An mga kaayon sa tribu ni Neftali iyo an mga kamaganakan ni Jazeel, ni Guni,

⁴⁹ ni Jezer, asin ni Sillem.

⁵⁰ An bilang kan mga kamaganakan na ini uminabot sa kwarenta y singko mil, kwatro syentos.

⁵¹ An kabilogan na bilang kan mga Israelitang lalaki uminabot sa seis syentos uno mil, syete syentos treynta.

⁵² Nagtaram an Kagurangnan ki Moises,

⁵³ “Bangaon mo an daga sa mga tribu sosog sa saindang kadakulaan.

^54-56 Bangaon mo an daga sa paagi nin ripa; tawan mo nin dakulang kahirasan an dakulang tribu, asin nin sadit na kahirasan an sadit na tribu.”

⁵⁷ An mga kaayon sa tribu ni Levi iyo an mga kamaganakan ni Gerson, ni Kohat, asin ni Merari.

⁵⁸ Kaiba sa saindang kapagarakian an mga pamilya ni Libni, ni Hebron, ni Mali, ni Musi, asin ni Kora. Si Kohat iyo an ama ni Amram,

⁵⁹ na an agom iyo an aking babae ni Levi na si Jokebed na namundag sa Egipto. Nagin aki ninda si Aaron, si Moises asin si Miriam.

⁶⁰ Si Aaron nagkaigwa nin apat na aking lalaki na iyo si Nadab, si Abihu, si Eleazar asin si Itamar.

⁶¹ Nagadan si Nadab asin si Abihu kan magdolot sinda sa Kagurangnan nin bakong banal na kalayo.

⁶² An mga lalaking Levita na sarong bulan an edad paitaas uminabot sa bilang na beynte y tres mil. Ilinista sindang suhay sa ibang mga Israelita, huli ta dai sinda tinawan nin ano man na kahirasan sa Israel.

⁶³ Ilinista ni Moises asin ni Eleazar an mga kamaganakan na ini kan sensohon ninda an mga Israelita sa kapatagan nin Moab, sa ibong kan Salog nin Jordan hale sa Jerico.

⁶⁴ Mayo nin natada minsan saro sa mga ilinista ni Moises asin ni Aaron sa enot na pagsenso duman sa Desyerto nin Sinai.

⁶⁵ Nagtaram an Kagurangnan na sinda gabos magagadan sa kalangtadan, asin nagadan mananggad sinda pwera ki Caleb na aking lalaki ni Jefunne, asin ki Josue na aking lalaki ni Nun.