Mga Bilang 24 - Marahay na Bareta Biblia

¹ Kan maaraman ni Balaam na boot nin Kagurangnan na bendisyonan niya an mga Israelita, dai na siya naghanap nin mga tanda siring kan enot niyang ginibo. Nagtanaw siya sa desyerto

² asin nahiling niya an Israel na tribu-tribung nakakampo. Dangan uminabot saiya an espiritu nin Dios,

³ asin sinabi niya an propesiyang ini: “An mensahe ni Balaam, na aking lalaki ni Beor, An mensahe kan tawong may malinaw na panhiling,

⁴ Kan nakakadangog kan tataramon nin Dios, Kan nakakahiling kan bisyon kan Makakamhan; Kan natutumba, alagad malinaw an mga mata.

⁵ Magagayon an saimong mga tolda, O Jacob, An saimong mga eerokan, O Israel!

⁶ Arog sa mga kapantayan na mahiwas, Arog sa mga tatamnan sa tampi nin salog; Arog sa mahamot na mga tinanom nin Kagurangnan, Arog sa mga kahoy na sedro sa kataed nin katubigan.

⁷ Magkakaigwa sinda nin abundang uran. Asin itatanom ninda an saindang banhi sa matubig na kaomahan! An saindang hade magigin mas makosog ki Agag, Asin an kahadean ninda ilalangkaw.

⁸ Kinua sinda nin Dios sa Egipto; Nakilaban siya para sainda siring sa lalaw na toro. Uuboson niya an saindang mga kaiwal, Roronoton an saindang mga tolang, tutuhogon kan saiyang mga pana.

⁹ An nasyon nin Israel arog sa makosog na leon; Mayo nin mangangahas na magpukaw kun natotorog siya. Bebendisyonan an magbebendisyon saimo, Asin mamaldisyonon an magmamaldisyon saimo.”

¹⁰ Ginugom ni Balak an saiyang mga palad sa kaanggotan ki Balaam dangan nagsabi, “Inapod taka tanganing maldisyonon an sakong mga kaiwal alagad tolong beses mo sindang benendisyonan.

¹¹ Puli na saindo. Nanuga akong babayadan taka nin mahal alagad inolang ka nin Kagurangnan na makamtan an kayamanan.”

¹² Nagsimbag si Balaam, “Sinabihan ko an mga sinugo mo sako na

¹³ maski na itao mo sako an gabos na plata saka bulawan sa saimong palasyo, dai ko pwedeng lapason an pagboot nin Kagurangnan. Dai ko magigibo an sadiri kong kabotan. An itinaram sako nin Kagurangnan iyo sana an sakong sasabihon.”

An Huring Propesiya ni Balaam

¹⁴ Sinabihan ni Balaam si Balak, “Mabalik ako sa sadiri kong banwaan, alagad bago ako mahale, papatanidan taka kun ano an gigibohon kan banwaan nin Israel sa saimong banwaan sa maabot na aldaw.”

¹⁵ Dangan sinabi niya an propesiyang ini: “An mensahe ni Balaam, na aking lalaki ni Beor, An mensahe kan tawong malinaw an panhiling;

¹⁶ Kan nakakadangog kan tataramon nin Dios, Asin nakakaisi kan kadonongan kan Kahorohalangkawe. Kan nakakahiling kan bisyon kan Makakamhan, Kan natutumba, alagad malinaw an mga mata.

¹⁷ An maabot na aldaw sakong tinatanaw, Asin an nasyon nin Israel sakong nahihiling. Sarong bitoon an maluwas ki Jacob, sarong hade an magikan sa Israel. Siya an maronot kan payo ni Moab Asin mapatumba kan mga aki ni Set.

¹⁸ Dadaogon niya an saiyang mga kaiwal sa Edom, An saindang daga saiyang sasakopon Mantang padagos an panggagana nin Israel.

¹⁹ Titimaktimakan sinda ni Jacob Asin an matatada sa mga syudad, saiyang tutunawon.”

²⁰ Dangan sa saiyang bisyon nahiling ni Balaam an mga Amalekita asin nagpropesiya siya: “An Amalek iyo an mapangyari sa gabos na nasyon, Alagad sa kataposan mapapara siya sagkod lamang.”

²¹ Nahiling ni Balaam an mga Cineo, asin nagpropesiya siya: “Pusog an saimong erokan, Siring sa salagan na namumugtak sa kagapoan,

²² Alagad kamong mga Cineo totoong matutunaw Kun kamo darahon nang bihag kan Asiria.”

²³ Nagpropesiya pa si Balaam: “Siisay an mabubuhay kun ini gibohon nin Dios?

²⁴ Alagad madatong an mga barko hale sa Chipre Tanganing saindang sakopon an Asiria asin an Eber Alagad sa kataposan mapapara sinda sagkod lamang.”

²⁵ Dangan nagpuli na si Balaam asin naghale man si Balak.