Mga Bilang 22 - Marahay na Bareta Biblia

Ipinaapod kan Hade nin Moab si Balaam

¹ Nagpadagos sa pagbaklay an mga Israelita asin nagkampo sinda sa kapatagan nin Moab, sa sirangan kan Jordan asin kahampang kan Jerico.

² Kan maaraman ni Balak na aki ni Zippor, na hade nin Moab, an ginibo kan mga Israelita sa mga Amoreo asin kun gurano kadakul an mga Israelita,

³ natakot siya asin an saiyang banwaan.

⁴ Kaya nagsabi an mga Moabita sa mga lider kan Midian, “Uuboson kan mga tawong iyan an gabos na nakapalibot sato, siring na inuubos kan torong baka an mga doot sa oma.” Kaya nagpadara si Hadeng Balak

⁵ nin mga sugo ki Balaam na aki ni Beor, na idtoon sa Petor harani sa Salog nin Eufrates sa daga nin Amaw. Dara ninda an mensaheng ini hale ki Balak: “Boot kong maaraman mo na sarong nasyon an nag-abot hale sa Egipto. Nakakalakop na sinda sa gabos na lugar asin harani na sa samong daga.

⁶ Dumigdi ka tolos asin maldisyon mo sinda, huli ta mas dakul sinda ki sa samo; tibaad pa madaog mi sinda asin mapalayas sa daga. Aram kong nabebendisyonan an benebendisyonan mo asin namamaldisyonon an minamaldisyon mo.”

⁷ Kaya naglakaw an mga lider kan Moab asin Midian dara an bayad para sa pagmaldisyon. Nagduman sinda ki Balaam asin sinabi ninda saiya an mensahe ni Balak.

⁸ Sinabihan sinda ni Balaam, “Digdi kamo magtorog ngunyan na banggi, asin sa aga isasabi ko saindo an ano man na itataram sako nin Kagurangnan.” Kaya duman nagtorog an mga lider kan Moab.

⁹ An Dios nagduman ki Balaam asin naghapot, “Siisay an mga lalaking iyan na kaibahan mo?”

¹⁰ Nagsimbag siya, “Ipinadara sinda sako ni Hadeng Balak nin Moab tanganing sabihan ako

¹¹ na nakalakop na sa daga an sarong banwaan na hale sa Egipto. Boot niyang maldisyonon ko an banwaan na iyan para saiya, tanganing malabanan niya sinda asin mapalayas.”

¹² Tinaraman nin Dios si Balaam, “Dai ka mag-iba sa mga lalaking iyan, asin dai mo pagmaldisyonon an banwaan nin Israel, huli ta yaon sainda an sakong bendisyon.”

¹³ Pagkaaga, nagduman si Balaam sa mga sinugo ni Balak asin nagsabi, “Magpuli na kamo. Habo akong tugotan nin Kagurangnan na mag-iba saindo.”

¹⁴ Kaya nagpuli sinda asin nagsabi ki Balak na habong mag-iba sainda si Balaam.

¹⁵ Nagpadara giraray si Balak nin mas dakul na lider, na orog na ginagalangan ki sa mga naenot.

¹⁶ Nagduman sinda ki Balaam asin ipinahayag an mensahe ni Balak: “Mayo logod nin anoman na makaolang saimo sa pagdigdi sako!

¹⁷ Babayadan taka nin mahal asin gigibohon ko an ano man na sabihon mo sako. Dumigdi ka asin maldisyonon mo an mga tawong ini.”

¹⁸ Alagad nagsimbag si Balaam, “Maski itao pa sako ni Balak an gabos na plata asin bulawan sa saiyang palasyo, dai ko pwedeng lapason an pagboot sako nin Kagurangnan na sakong Dios maski sa pinakasadit na bagay.

¹⁹ Alagad digdi kamo magkatorog ngunyan na banggi, siring kan ginibo kan naenot saindo tanganing maaraman ko kun ano pa an itataram sako nin Kagurangnan.”

²⁰ Pagkabanggi nagtaram an Dios ki Balaam, “Kun napadigdi an mga lalaking iyan tanganing pakiolayan kang umiba sainda, mag-andam ka asin umiba ka sainda, alagad gibohon mo sana an itataram ko saimo.”

²¹ Kaya pagkaaga, kinamaderohan ni Balaam an saiyang asno dangan nag-iba sa mga lider na Moabita.

Si Balaam asin an Saiyang Asno

²² Alagad naanggot an Dios huli ta nagduman si Balaam, kaya nagtindog sa dalan an anghel nin Kagurangnan tanganing olangon an saiyang agihan. Nakalunad sa saiyang asno si Balaam asin kaiba niya an duwa niyang sorogoon.

²³ Kan mahiling kan asno an anghel nin Kagurangnan na kapot an espada saka nakatindog sa dalan, nagliklik an asno sa dalan asin nagpasiring sa kaomahan. Kaya hinampak ni Balaam an asno tanganing mapabalik sa dalan.

²⁴ Dangan nagtindog an anghel nin Kagurangnan sa sarong hayakpit na dalan sa tahaw nin duwang ubasan; nakukudalan nin gapo an mag-ibong kan dalan.

²⁵ Kan an anghel mahiling kan asno suminuksok ini sa kudal asin naipit an bitis ni Balaam. Hinampak giraray ni Balaam an asno.

²⁶ Dangan nagpaenotan an anghel asin nagtindog sa sarong lugar na dai na nin masusukian minsan pawala o patoo.

²⁷ Kan mahiling siya kan asno, luminukmo ini. Naanggot si Balaam asin hinampak niya kan saiyang sugkod an asno.

²⁸ Dangan pinataram nin Kagurangnan an asno asin nagsabi ini ki Balaam, “Anong ginibo ko saimo ta hinampak mo ako nin tolong beses?”

²⁹ Nagsimbag si Balaam, “Huli ta ginibo mo akong bua-bua, kun igwa kuta akong espada, ginadan ta ka na.”

³⁰ Nagsabi ki Balaam an asno, “Bakong ako sana an asno na linulunadan mo sa bilog mong buhay? Ginibo ko na daw saimo an siring kaidto?” “Dai,” an simbag ni Balaam.

³¹ Dangan binoot nin Kagurangnan na mahiling ni Balaam an anghel na nakatindog sa dalan na may kapot na espada. Nagdapa si Balaam sa daga.

³² Naghapot an anghel, “Tadaw ta hinampak mo nin makatolo an saimong asno? Napadigdi ako tanganing olangon an saimong agihan, huli ta dai mo dapat ginibo an paglakaw na ini.

³³ Alagad nahiling ako kan saimong asno asin nagliklik siya nin makatolo. Kun dai idto ginibo kan asno, nagadan taka kuta asin pinabayaan kong mabuhay an asno.”

³⁴ Nagsimbag si Balaam, “Nagkasala ako. Dai ko aram na nakatindog ka sa dalan tanganing olangon ako; alagad kun sa paghona mo maraot para sako an magpadagos, mapuli na ako.”

³⁵ Alagad nagtaram an anghel, “Umiba ka sa mga tawong iyan, alagad an itataram ko sana saimo iyo an sasabihon mo.” Kaya nagpadagos si Balaam kaiba kan mga lalaki.

Sinabat ni Balak si Balaam

³⁶ Kan maaraman ni Balak na nagdadangadang si Balaam, sinabat niya ini sa Ar, sarong syudad sa may Salog nin Arnon sa pagdolonan nin Moab.

³⁷ Sinabihan niya si Balaam, “Tadaw ta dai ka nagdigdi kan enot na pagpaapod ko saimo? Tibaad naghona kang dai ta ka mababayadan kan maninigo?”

³⁸ Nagsimbag si Balaam, “Uya na ako, bakong iyo? Alagad igwa daw ako nin kapangyarihan sa pagtaram? An itataram sako nin Dios iyo sana an sasabihon ko.”

³⁹ Kaya uminiba si Balaam ki Balak pasiring sa Kiriat-Huzot,

⁴⁰ saen nagpabuno si Balak nin mga baka saka mga karnero, dangan tinawan niya kan ibang karne si Balaam asin an mga lider na kairiba niya.

An Enot na Propesiya ni Balaam

⁴¹ Pagkaaga, ipinag-iba ni Balak si Balaam sa itaas kan Bamot-baal, saen pwedeng mahiling ni Balaam an sarong kabtang kan banwaan nin Israel.